ኣምላኽ ንሰባት ብጸሎት ኣቢሎም ምስኡ ኺራኸቡን ስምዒቶም ኪገልጹን ፍሉይ ውህበት ሂብዎም እዩ። ነብዪ ዳዊት፡ “ኦ ሰማዕ ጸሎት፡ ኵሉ ዓይነት ሰብ ናባኻ ኺመጽእ እዩ” ኢሉ ጸልዩ እዩ። (መዝሙር 65:2) ግናኸ፡ ኣምላኽ ምእንቲ ኺሰምዓናን ኪባርኸናን ከመይ ጌርና ኽንጽሊ ንኽእል፧

ብሕታዊ ጸሎትኩም ናይ ሓቂ ስምዒትኩም ዚገልጽ ምእንቲ ኪኸውን፡ ልብኹም ኣብ ቅድሚ ኣምላኽ ኣፍስሱ። (መዝሙር 62:8) እቲ ዅሉ ዚኽእል ኣምላኽ ብቕንዕና ንዚቐርብ ልባዊ ጸሎት ኣኽቢሩ ይርእዮ እዩ።

ኣምላኽ ብዙሕ መዓርጋት እኳ እንተ ኣለዎ፡ ብሕታዊ ስሙ ግና ሓንቲ ጥራይ እያ። “ኣነ የሆዋ እየ። ስመይ እዚ እዩ።” (ኢሳይያስ 42:8) እቲ የሆዋ ዚብል ስም ኣምላኽ ኣብ ቅዱሳት ጽሑፋት ኣስታት 7,000 ሳዕ ተጠቒሱ ይርከብ እዩ። ሓያሎ ነብያት ንኣምላኽ ብብሕታዊ ስሙ ይጽውዕዎ ነይሮም እዮም። ኣብርሃም፡ “ምስ የሆዋ ኽዛረብ ደፊረ” ኢሉ እዩ። (ዘፍጥረት 18:27) ንሕና እውን ክንጽሊ ኸለና፡ ነቲ የሆዋ ዚብል ስም ኣምላኽ ክንጥቀም ኣሎና።

እንዛረቦ ቛንቋ ብዘየገድስ፡ ኣምላኽ ንሓሳባትናን ንስምዒትናን ይርድኣልና እዩ። ቃሉ ድማ፡ “ኣምላኽ ከም ዘየዳሉ . . . የግዳስ፡ ኣብ ኵሉ ህዝቢ፡ ንኣምላኽ ዚፈርሆን ቅኑዕ ዚገብርን፡ ብእኡ ቕቡል” ምዃኑ የረጋግጸልና እዩ።—ግብሪ ሃዋርያት 10:34, 35።

ይኹን እምበር፡ ኣምላኽ ምእንቲ ኺባርኸና፡ ጸሎት ጥራይ ኣኻሊ ኣይኰነን። ኣብዘን ዚስዕባ ዓንቀጻት፡ እንታይ ክንገብር ከም ዘሎና ኽንምርምር ኢና።