ቅድሚ 500 ዓመት ናብ ኮስታ ሪካ ንመጀመርታ እዋን ዝመጹ፡ ስጳኛውያን እዮም። ኣብኡ ብዙሕ ወርቂ ዚረኽቡ ስለ ዝመሰሎም ድማ፡ ኮስታ ሪካ (ሃብታም ገማግም) ኢሎም ሰመይዋ፣ ግናኸ ኸምቲ ዝሓሰብዎ ኣይኰነሎምን። ሎሚ እዛ ሃገር እዚኣ፡ በቲ ኽቡር ማዕድናት ዘይኰነስ፡ በቶም ኣብ ውሽጣ ዝሓዘቶም እተፈላለዩ ዓይነት እንስሳታትን ኣትክልትን እያ እትፍለጥ።

ተቐማጦ ኮስታ ሪካ፡ ቲኮስ ተባሂሎም እዮም ዚፍለጡ፣ ከመይሲ፡ ንሓደ ነገር ኣንኢሶም ኪዛረቡሉ እንተ ደልዮም፡ ኣብ መወዳእታ እቲ ቓል፡ “ኢኮ” ይውስኹ እዮም። ንኣብነት፡ “ኡን ሞመንቶ” (ሓንሳእ ጽንሓኒ) ኣብ ክንዲ ዚብሉ፡ “ኡን ሞመንቲኮ” (ሓንሳእ እስከ ቝሩብ ጽንሓኒ) እዮም ዚብሉ። መብዛሕትኡ እዋን፡ ሞሳኦም ወይ ስምምዖም ንምግላጽ፡ ከምኡ እውን ኪራኸቡን ኪሰናበቱን ከለዉ፡ “ፑራ ቢዳ!” (ንጹህ ህይወት!) እዮም ዚብሉ።

ሓደ ኻብቲ ኣብ ኮስታ ሪካ ኣዝዩ ዚፍቶ ምግቢ፡ ጋሎ ፒንቶ (ቃል ብቓሉ፡ “ትኳዕ ዘለዎ ኹኩናይ”) እዩ፣ እዚ ኸኣ ሩዝን ፋጆልን ነንበይኑ ድሕሪ ምብሳሉ፡ ምስ ቀመማት ብሓባር ሓዋዊስካ እዩ ዚስራሕ። ጋሎ ፒንቶ ኣብ ቍርሲ፡ ኣብ ምሳሕ፡ ወይ ኣብ ድራር ኪቐርብ ይኽእል እዩ።  ሓደ ኻብቶም ኣብ ኮስታ ሪካ ኸም ባህላዊ መስተ ጌርካ ዚርኣዩ፡ ካፈ ቾሪያዶ እዩ፣ እዚ ኸኣ ኣብ ዕንጨይቲ ኣብ ኣብ እተንጠልጠለ ዓለባ፡ ቡን ትገብር እሞ፡ ኣብ ልዕሊኡ ውዑይ ማይ ብምፍሳስ እዩ ዚዳሎ።

ኣብ ኮስታ ሪካ ኣስታት 450 ጉባኤታት ናይ የሆዋ መሰኻኽር ኣለዋ። እተን ጉባኤታት ብዓሰርተ ቛንቋ እየን ዚምርሓ፣ እዚ ኸኣ ንቛንቋ ምልክት ኮስታ ሪካ ኸምኡ እውን ብሪብሪን ከበካርን ንዚብሃል ክልተ ቛንቋ ደቀባት ኮስታ ሪካን ዜጠቓልል እዩ።