ሲኦል (ኣብ በዅሪ ቛንቋታት መጽሓፍ ቅዱስ፡ “ሲኦል” ወይ “ሃደስ” ዚብሃል) ተራ መቓብር ደኣ እምበር፡ ሰባት ብሓዊ ዚሳቐዩሉ ቦታ ኣይኰነን። እሞ ደኣ መን እዮም ናብ ሲኦል ዚኣትዉ፧ ቅኑዓትን ክፉኣትን ሰባት ናብ ሲኦል ይኣትዉ እዮም። (እዮብ 14:13፣ መዝሙር 9:17) መጽሓፍ ቅዱስ ነዚ ሓፈሻዊ መቓብር ደቂ ሰብ እዚ፡ “ኵሉ ህያው ዚራኸበሉ ቤት” ኢሉ ጸዊዕዎ ኣሎ።—እዮብ 30:23።

 የሱስ እኳ ምስ ሞተ ናብ ሲኦል ኣትዩ እዩ። ይኹን እምበር፡ ኣምላኽ ካብ ምዉታት ስለ ዘተንስኦ፡ “ነፍሱ ኣብ ሲኦል ከም ዘይትተርፍ” ተገሊጹ ኣሎ።—ግብሪ ሃዋርያት 2:31, 32፡ ትርጉም 1956።

ሲኦል ዘለኣለማዊ ድዩ፧

 ኵሎም እቶም ናብ ሲኦል ዚኸዱ፡ ካብኡ ኺወጹ እዮም፣ የሱስ ብሓይሊ ኣምላኽ ገይሩ ኼተንስኦም እዩ። (ዮሃንስ 5:28, 29፣ ግብሪ ሃዋርያት 24:15) ኣብ ራእይ 20:13 ዚርከብ ትንቢት ብዛዕባ እቲ ናይ መጻኢ ትንሳኤ ኺገልጽ ከሎ፡ “ሞትን ሲኦልንውን ኣባታቶም ዘለዉ ምዉታት ወፈዩ” ይብል እዩ። (ትርጉም 1956) ሲኦል ጥራዩ ምስ ኰነ፡ ደጊም ኣይኪህሉን እዩ፣ ‘ደጊም ሞት ስለ ዘይከውን’ ድማ፡ ድሕሪኡ ናብ ሲኦል ዚኸይድ ኣይኪህሉን እዩ።—ራእይ 21:3, 4፣ 20:14።

 ይኹን እምበር፡ ኵሉ ሰብ ኣይኰነን ናብ ሲኦል ዚኣቱ። ገሊኦም ሰባት ኣመና እኩያት ካብ ምዃኖም እተላዕለ፡ ናብ ንስሓ ኺበጽሑ ዚኽእሉ ዘይምዃኖም መጽሓፍ ቅዱስ ይገልጽ እዩ። (እብራውያን 10:26, 27) ከምዚኣቶም ዝበሉ ሰባት ምስ ሞቱ፡ ናብ ሲኦል ዘይኰነስ፡ ናብ ገሃነም እዮም ዚኣትዉ፣ ገሃነም ከኣ ንዘለኣለማዊ ጥፍኣት እዩ ዜመልክት። (ማቴዎስ 5:29, 30) ንኣብነት፡ ገሊኦም ኣብ ቀዳማይ ዘመን ዝነበሩ ግቡዛት መራሕቲ ሃይማኖት ናብ ገሃነም ከም ዚኣትዉ፡ የሱስ ሓቢሩ እዩ።—ማቴዎስ 23:27-33።