•  Er nan i gbe u me er tom a shie wam sha injaa?

•  Kwagh u u fatyô u eren yô

•  Kwagh u mbakwav wou ve ôron yô

• Shie ngu er ka inyaregh nahan. Aluer u vihi un yô, kwagh a gbaan we a mi yô, u kera zua a mi ga. Nahan kpa, aluer u sôr shie wou u ver vough vough yô, u fatyô u zuan a shie u eren akaa agen a nga a doo u eren la kpaa!

  Kwaghwan u Bibilo: “Uma u oruhwe, kwagh ka a sar un, kpa a zua a kwagh ga, kpa uma u mbatavershima yô, una mgbough a akaa.”—Anzaakaa 13:4.

  Jindikwagh: Aluer u ngu eren akaa a shie wou sha inja yô, u hemba lun a shie man ian i eren akaa; shie a banen we yum ga.

• U eren tom a shie sha inja la ka ieren i injaa i ia va wase u shie u u hingir organden la yô. Kwagh ne una na u fatyô u zan hemen a tom wou her, gayô a de u tom. We aluer u tôô or tom hen ijiir you i eren kpenga, man hanma shie yô, ka nan yaren tom leti nahan, u de wer nana za hemen u eren we tomo?

  Kwaghwan u Bibilo: “Or u nan eren kwagh u kiriki sha mimi yô, kwagh u vesen kpa nan eren sha mimi.”—Luka 16:10.

  Jindikwagh: Aluer u fetyô u eren kwagh sha shie vough shin u fetyô ga kpa, kwagh ne una na ior vea fa injaor i u lu yô.

Nahan kpa u ôron kwagh haan mbabov kera yô, ka zange u eren akaa sha shie vough vough ga. Nenge ase mbamtaver kpuaa mba u fatyô u tagher a mi ne.

Mtaver u sha #1: Azende

“Azende am nga a kaa ér se due se za ma ahumbe yô, ka mea lu a shie ga nan kpa, m nôngo sha afatyô wam cii se za. Ka m hen mer, ‘me hide kpa me nôngo me er akaa a i gbe u me er la fele fele me bee. Kpa ka hanma shie akaa ka i va lu er m hen la ga, man kwagh ne va a akaa a vihin kpishi.”—Cynthia.

Mtaver u sha #2: Akaa a danen or

“Televishen ka a fa u meen or kpen kpen. Ka i taver kpishi u den wer uporogeram kua ufiim mbagen mba i lu tesen sha mi la ve kar u.”—Ivy.

“Ka m tôô ave sha tablet wam ga je i kuma ahwa imôngo. Batere ka una va kpeen a gbaan u me ver inya yô, ishima i nam ibo kpishi; gadia luun er a kpe ga yô, i taver.”—Marie.

Mtaver u sha #3: Ahôawan

“Ka a gba u me er asaimenti u sha makeranta kpa m waan a wa ahô. Hanma kwagh u i gbe u me er cii, ka m waan a wa ahô u eren. Ka m yem vihin shie sha abumeakaa zan zan saa ashe a va nyian ve me mase eren asaimenti wam ye; kpa doo u eren tom a shie nahan ga cii.”—Beth.

1. Nger akaa a i gbe u ú er hange hange la shin inya. Akaa ne wa ityom i hen ya i i gbe u ú er la man mbaasaimenti mba ken makeranta. Hanma kwagh u i gbe u u er yô, nger shie u kwagh shon una fatyô u tôôn we la. Er kwagh ne sha akaa a i gbe u u er ken kasua la jimin cii.

   Kwaghwan u Bibilo: ‘Fa akaa a a hembe lun a inja la.’—Mbafilipi 1:10.

2. Nger akaa a u soo u eren shie u ú va lu gbilin la. Akaa ne a fatyô u lun ambaakaa er u zan sha ajiir a lamen a ior sha Intanet shin nengen televishen nahan. Shi nger shie u u tee u eren akaa shon la ken kasua jimin.

   Kwaghwan u Bibilo: “Eren nen kwagh . . . sha kwaghfan, shi eren nen kwagh a shighe wen sha inja.”—Mbakolose 4:5.

3. Due a mhen. Hide nenge sha akaa a ahar a u nger shin inya la. U ver shie tsembelee u eren akaa a hange hange la kpa? A gba u u pande shie u eren akaa a nan we msaanyol laa?

   Kar kwagh ne: Hanma iyange yô, nger akaa a u soo u eren la, shi hanma kwagh u er ma kwagh u bee yô, kpile hwange sha mi.

   Kwaghwan u Bibilo: “Mbamhen mba ortseenshima, ka sha u kwagh ma a ngee yô.”—Anzaakaa 21:5.

4. Dondo mhen wou la. Alaghga gba u u venda u zan ma iniongo i ior ve lehe u yô sha er u er akaa a hange hange a i gbe u u er yô. Nahan kpa, u er nahan yô, u va mase kaven wer u ngu a shie kpishi u ú dugh gbilin yô, nahan u hemba lun a shie u eren akaa a ou.

   Kwaghwan u Bibilo: “Eren nen tom kpoghuloo, de eren nen tom uwer uwer ga.”—Mbaroma 12:11, NW.

5. Tôô anshie kpase mem; kpa i de lu fese yum ga. Wankwase ugen u i yer iti na ér Tara yô, kaa ér: “Ashie agen ka m nôngo m er akaa ahar nahan ken akaa a m soo u eren la m bee, maa m kaa mer, ‘Hegen me fatyô u tôôn miniti 15 nahan memen, nengen televishen tsô me mase moughon been akaa agen la.’ Maa miniti 15 ve hingir miniti 30, i yem zan zan i nyôr ihwa jimin, shie u m va fa ne yô, m vihi shie i kuma ahwa ahar sha televishen u nengen!”

   U er nena sha gbaa nee? Tôô ian i memen eren iemberyolough la wer ka kwagh u u er akaa a ou u bee cii ve u va mase eren yô; de nengen wer ka kwagh u i gbe u u er ken iyange hange hange ga.

   Kwaghwan u Bibilo: ‘Kwaghdoon ugen ngu ga, saa u i kpe uma u or iyol ken tom u nan u sha ican la.’—Orpasenkwagh 2:24.