Iceghzwa i lun iniun ka ityendezwa i or ka nan er sha zwa shin nan nger shin takerada ér nana yav a or ga zan zan nana kar vôson kwase shin nom yô.

 Kwagh u or eren iceghzwa ér nana lu iniun her la yange hii ken kwavanyom u 1990 shighe u kwaghaôndo u Southern Baptist Convention, u ken tar u Amerika hii u keren gbenda u taver agumaior asema ér a dondo ityesen i Bibilo shi mgbeghan agumaior agen kpa ér a dondo ieren i mbakwav ve la. Ve ver itinekwagh ér “Dooshima u Mimi Keghen.”

 Ica i gba ga je maa i hii u lôhôn mbamkombo mbagenev sha ambaakaa ne. Mba zan mbamkohol mba yange vea er iceghzwa ne cii, i na ve ikunya i sha azurfa sha u i lu ikyav i (shin i umbur ve) kwagh u iceghzwa ve i yaven a or ga zan zan karen eren ivese la.

 Mlumun u sha mpin ne har sha or u u pine nan un la.

•   Kwase u timen sha akaa ugen mba yer un ér Christine C. Kim, man or u timen sha akaa ugen mba yer un ér Robort Rector, ve kaa ér “akaatôvon kpishi tese ér ieren i agumaior eren iceghzwa ér vea lu iniun la na yô, agumaior agen hii u yaven ior fele ga, shin ve pande u yaven a ior.”

•   Mzough u tôvon sha kwagh ugen mba yer un ér Guttmacher Institute, a gber ibaver igen a kaa ér, akaa a zough a mi ken kwaghtôvon yô tese ér, “agumaior kpishi a a er ‘iceghzwa i lun iniun’ la ka a va nôngo u yaven a ior vough er agumaior a a er iceghzwa shon ga la nahan.”

 Er nan ve akaa a ior ve zough a mi ken kwaghtôvon la a gbe zwa môm ga nahana?

•   Mbatôvon kwagh mbagenev tôô kwagh u mbaeren iceghzwa kar sha mbaeren iceghzwa ga, mba ve lu a mbamnenge kposo kposo sha kwagh u yaven a or yô.

•   Mbatôvon kwagh mbagen di tôô kwagh u mbaeren iceghzwa kar sha mbaeren iceghzwa ga, mba ve lu a mnenge môm sha kwagh u yaven a or yô.

 Kwaghtôvon u sha uhar u i mase teren heen la tese se nyi? Kwase ugen u nengen sha kwagh u twer u agumaior, mba yer un ér Dr. Janet Rosenbaum, akaa ér anyom ka aa karen ataan yô, “mba kera fe mkposo u mbaeren iceghzwa man mbaeren iceghzwa ga la ga. Ve cii ka ve yaven a ior fee.”

 Ior mba ve due a kwagh u taver agumaior ishima ér ve er iceghzwa i lun iniun la mba a awashima u dedoo. Kpa zayol u a lu yô, mba fe wasen agumaior u lun a aeren a a wase ve u kuren iceghzwa ve la ga. Dr. Rosenbaum shi kaa wener, agumaior kpishi a a er iceghzwa ér aa lu iniun la “nga eren kwagh ne a ishima ve ga. . . . Gba u iceghzwa ne ia har sha kwagh u or nan ne jighjigh a mi la, ka u eren tsô ér i kaa ér ior ve er ga.”

 Bibilo taver ior asema ér ve lu a imba jighjigh u nan ne sha u kaan a ve ér ve er iceghzwa shin ve nger iceghzwa ga, kpa ka sha u wasen ve ér ve lu “mba ve er tom sha mkav u ken ishima, [i] hoghor ve u paven kwagh u dedoo a kwagh u bo” yô. (Mbaheberu 5:14) Kera kpa, mba lu iniun sha ci u yangen angev shin yav mbu wan tseegh tsô ga, kpa ka gbenda u nan Or u a ver kwagh u ivesegh la icivir.—Mateu 5:19; 19:4-6.

 Atindi a i nger ken Bibilo la nga sha ci u iwasen yase. (Yesaia 48:17) Jighilii yô, hanma wase, sea lu mbayev shin mbaganden kpaa, se fatyô u kangen ishima ser se kura tindi u Aôndo a we ér “yevese nen idya” la. (1 Mbakorinte 6:18) Zum u se va er ivese yô, se fatyô u yaven a or u se vese la sha ishima yase, se kera nyôr ken ishimanyian shin afanyô a vaan a idya i eren i ve a mi la ga.