Imo i Aôndo Ka Ana, man Kwaghôron Shin Mkaanem ma Aôndo Ka Nyi?
Mlumun u Bibilo i ne yô
Ka a ter ishember i “kwaghôron u Aôndo” la yô, i lu loho u Aôndo shin mkaanem nam ma i zom i nger ijiir i môm yô. (Luka 11:28) Ajiir kpuaa ken Bibilo ter orgen sha ititom ér “Imo i Aôndo,” shin “Imo.”—Mpase 19:13; Yohane 1:14.
Loho u Aôndo. Ashighe kpishi, uprofeti yange vea ôron ior loho u Aôndo yô, ve kaa ér ka kwaghôron u Aôndo, shin mkaanem ma Aôndo. U tesen ikyav yô, Yeremia yange una hii u ôron kwaghôron u profeti yô, a kaa ér: “Kwaghôron u TER [Yehova] va her a mo.” (Yeremia 1:4, 11, 13; 2:1) Cii man Profeti Samuel pase Saulu er Aôndo a tsough un u lun tor yô, a kaa a Saulu ér: “Tile heen, me ôr u mkaanem ma Aôndo.”—1 Samuel 9:27.
Ititom i or. I ter Yesu sha ititom ken Bibilo ér “Imo,” sha ci u tom na u ortyom u sha, kua shi tom u yange va er shin tar ken mlu u orumace la. Nenge atôakyaa a a ne ve se fe nahan yô:
Yange Imo lu cii ve i mase gban akaa agen a a lu cii ye. ‘Sha hiihii je Imo lu. Un yô, lu vea Aôndo sha hiihii je.’ (Yohane 1:1, 2) Yesu ka ‘Waniunda ken akaa a i gbe a cii. Un vande a akaa cii.’—Mbakolose 1:13-15, 17.
Yange Imo la va hingir orumace shin tar. “Imo la hingir or je, va tema her a vese.” (Yohane 1:14) Yesu Kristu yange “gema iyol Na hingir gbilin er A tôô mlu u ortom, A hingir kwagh môm a ior la.”—Mbafilipi 2:5-7.
Imo la ka Wan u Aôndo. Apostoli Yohane yange ôron ér “Imo la hingir or,” er i ter sha heen nahan yô, shi kaa ér: “Se kenger icivir Na, icivir la lu er ka i Wan u môm môm u Ter nahan.” (Yohane 1:14) Shi Yohane nger ér: “Yesu ka Wan u Aôndo.”—1 Yohane 4:15.
Imo la ngi er Aôndo nahan. ‘Imo la lu aôndo je.’ (Yohane 1:1) Yesu ka “mmondo u iengem Na [Aôndo] man shi eev mbu mlu Na vough kpaa.”—Mbaheberu 1:2, 3.
Imo la tema tor. Bibilo kaa ér ‘ader a tor nga imôngo’ sha ityough ki Imo i Aôndo ne. (Mpase 19:12, 13) Shi i ii Imo shon iti ér “Tor u utor man Ter u uter.” (Mpase 19:16) I yila Yesu ér “Tor u utor man Ter u uter.”—1 Timoteu 6:14, 15.
Imo la ngi ôron kwagh sha ci u Aôndo. Ikyav tese wang er ititom i “Imo” la i lu i ôr u Aôndo a tindin nan sha u za kaan loho na shin kwaghwan na yô. Yesu yange kaa ér un er tom ne: ‘Ka Ter u A tindim la je, A nem tindi sha kwagh u Me kaa man shi Me ôr kpaa ye. Nahan akaa a M lu ôron ne ne M ngu ôron vough er Ter A kaam nahan.’—Yohane 12:49, 50.
Kwagh Ugen u Alaghga Shi Una Doo U Yô
MBAMPIN MBA BIBILO I NE MLUMUN SHA MI LA
Er Nan Ve I Yer Yesu Ér Wan u Aôndo?
Aluer Aôndo yange mar Yesu er uumace ve maren ônov nahan ga yô, er nan ve i yer Yesu ér Wan u Aôndo?
ATESEN A BIBILO A HANGE HANGE
Aôndo Ngu a Iti Jee?
Aôndo ngu a atiatom kpishi, er Uhembanagee, Orgbanakaa, man Ter nahan. Kpa iti i Aôndo kpôô kpôô la ngi ken Bibilo kuma ajiir 7,000.
MBAMPIN MBA BIBILO I NE MLUMUN SHA MI LA
Ka An Nan Lu Yehova?
Un ka Aôndo u ikyurior i môm tseegh, er Mbaiserael nahana?
