Kwaghôron u profeti ka kwagh u Aôndo ka a kaa a or ér nana ôr yô, ka kwagh u Aôndo iyol na ka a pase or yô. Bibilo kaa ér yange “Icighan Jijingi mgbegha [uprofeti] man ve ôr kwagh u Aôndo ye.” (2 Peteru 1:20, 21) Sha nahan yô, profeti ka or u Aôndo ka a lam a nan, nan di nan pase ior kwagh u Aôndo a kaa la yô.—Aerenakaa 3:18.

Aôndo yange lamen a uprofeti nena?

 Aôndo yange pasen uprofeti mbamhen nav sha igbenda kposo kposo. Ka igbenda shon je ne:

•   Sha kwaghngeren. Aôndo yange lam sha imba gbenda ne kwa môm shin kwa har nahan, shighe u kende Atindi a Pue a i nger a nger la jighilii na Mose la.—Ekesodu 31:18.

•   Yange a tindi ortyom a loho nan va ôr u sha zwa. U tesen ikyav yô, Aôndo yange tindi ortyom ugen va wa Mose kwagh sha loho u yange gba u una za ôr Farao, tor u Igipiti la. (Ekesodu 3:2-4, 10) Yange a gba hange hange u profeti nana ôr loho u Aôndo sha asember a u gedee yô, Aôndo a tindi ortyom nan va ôron profeti la loho shon, profeti la di nan ngeren u. U tesen ikyav yô, yange kaa a Mose ér: “Nger akaaôron ne; gadia ka sha akaaôron ne M ya ikyur a we kua Iserael kpaa ye.”—Ekesodu 34:27. *

•   Yange a er or nan nenge a kwagh u ken jijingi noon. Aôndo yange a er profeti nan nenge a kwagh u ken jijingi noon, shighe u nan lu per shi nan lu tsevaa kpaa yô. (Yesaia 1:1; Habaku 1:1) Profeti yange nan nenge a akaa a ken jijingi a agen vighe vighe je, profeti iyol i nan kpa nan eren akaa ken mlu u ken jijingi shon. (Luka 9:28-36; Mpase 1:10-17) Ashighe agen Aôndo yange a er or nan hingir er zuzu kar nan nahan, maa a tese nan kwagh u ken jijingi, nan nenge a mi noon. (Aerenakaa 10:10, 11; 22:17-21) Shi Aôndo yange a lam a profeti ken mnyam ma cier, shighe u nan lu yaven yô.—Daniel 7:1; Aerenakaa 16:9, 10.

•   Yange a kôôm mhen u profeti. Aôndo yange a kôôm mhen u profeti na ve nan pase ior loho na ye. Ka kwagh u mkaanem ma Bibilo man ma tese kpaa je la. Ma kaa ér: “Icighanruamabera cii ka Aôndo A ne i nger ye.” (2 Timoteu 3:16) Ngeren u shin kpe u sha ivur ne, ken Bibilo i The New Testament with References la kaa ér, ishember i “Aôndo A ne” la, shi a fatyô u geman i ér “Aôndo A fehe.” Aôndo yange “fehe” mbamhen nav ken asema a mbacivir un, sha icighan jijingi na, shin tahav nav mbu eren tom a mi. Yange lam a uprofeti, nahan ve di ve gema ve tsua asember a vea ôr ior mkaanem nam a mi ve, vea kav yô.—2 Samuel 23:1, 2.

Kwaghôron u profeti cii ka a tsenga pasen akaa?

 Ei, kwaghôron u profeti u ken Bibilo saa sha u tsengan pasen akaa ga. Nahan kpa, akaa kpishi, Aôndo yange a ôr a sha u tesen er uma u ior una va za a ve yô. U tesen ikyav yô, uprofeti mba Aôndo yange ve ta Mbaiserael mba tsuaa mbara icin kwa kimbir kimbir sha akaabo a ve lu eren la. Yange a taan ve icin yô, i pase ve averen a aluer ve ungwa icintan la ve vea zua a mi yô, kua ican i aluer ve wa ikyo ga yô, vea ya la kpaa. (Yeremia 25:4-6) Nahan i lu kwagh u Mbaiserael ve tsough u eren la jighilii, ve zua a injar sha mi ye.—Duteronomi 30:19, 20.

Akaaôron a profeti agen ken Bibilo, a a tsenga pasen kwagh ga yô

•   Kwa gen la Mbaiserael zamber a Yehova ér a wase ve, nahan Yehova tindi profeti ugen ér nana pase ve ér un ngu wasen ve ga, sha ci u ve venda u eren kwagh u Un kaa ve yô.—Mbaajiriv 6:6-10.

•   Shighe u Yesu lu lamen a kwase u ken Samaria la, Yesu pase kwase shon akaa a kwase la vande eren, a yange gba u saa Aôndo una ôr or ve nana fatyô u pasen la. Nahan kwase la nenge ér Yesu ka profeti, shin er Yesu tsengaôron kwagh u ken hemen ga nahan kpaa.—Yohane 4:17-19.

•   Shighe u i lu ôron Yesu ijir la, mbaihyomov nav kange un ashe, ve lu gbidyen un kaan ér: “Pase ase, ka [an] nan gbidi We?” Ve lu kaan ér Yesu a pase kwagh u ken hemen ga, kpa er a fa ase or u nan gbidye un la sha tahav mbu Aôndo.—Luka 22:63, 64.