Bibilo ôr kwagh ter taav u man * shin igbenda igen i ior ve eren tom a taav la ga. Nahan kpa, ngi a akaawan a a tese ér Aôndo lumun a ieren i nan or angev shin i wang ga ne ga yô, sha nahan yô, a nenge ér taav u man ka isholibo.

• Tese icivir sha uma. Ka “Aôndo . . . A ne uumace cii uma man iôôn” ye. (Aerenakaa 17:24, 25) Er uma a lu iyua i i dugh hen Aôndo yô, gba u se er kwaghmôm u una pande ayange a uma wase ga, er u man taav nahan. Taav u man ka môm ken akaa a vesen a a ne ior ikyu, i ma i fetyô u yangen i, tar shawon cii yô.

• Dooshima u orwanndor. “Or u nan we ndor a we yô, nana̱ doo u ishima er we iyol you nahan.” (Mateu 22:39) Aluer u ngu man taav haan mnyim ape ior ve lu yô, a tese dooshima ga. Mba ve lun ape ior ve me taav ve haan mnyim hanma shighe yô, uma ve ngu sha zongo, sha ci u vea fatyô u zuan a iangev mbi ashighe kpishi mba ve me taav ka ve zua a mi la.

• Gba u se lu uicighanmbaiorov. “Gema nen ayol a en na nen nagh ku uma a mi, icighannagh ku doon Aôndo.” (Mbaromanu 12:1) “Se wanger nen ayol a ase sha hanma kwagh u hôngorough u ken iyol kua ken jijingi cii, se sôr nen mtsegh wase, a̱ hingir vough sha mcie u cian Ter la.” (2 Mbakorinte 7:1) Taav u man zua vea kwagh u lun icighan la ga, inja na yô, ka u lun wang man a acôghor ga je la, sha ci u mba man taav ka ve maan megh sha apera, ku kua vihi ayol a ve vindi vindi yô.

Bibilo ter kwagh u ikya shin mcimbim ma bom ma lun er ikya nahan ma or ka nana ma ve i taver u den la sha ati ati ga. Kpa ngi a akaawan a a vende kwagh u or man ambaakaa la, sha ci u zuan a agee man msaanyol la cii. Kwagh ugen u seer sha akaawan a se vande teren la yô, akaa a a lu shin heen ne kpa a a wase:

• Gba u se kura gbenda u se henen kwagh la. “Ter Aôndo wou A̱ doo u ishima . . . a mfe wou cii.” (Mateu 22:37, 38) “Lu nen tsevaa sha hanma gbenda cii, [NW].” (1 Peteru 1:13) Aluer or nan ngu man mcimbim ma bom yô, nana fatyô u kuran gbenda u nan henen kwagh la ga, shi mbagenev je yô, mcimbim ma bom ma man ka ma ya tor ken a ve. Ka ve hemba veren ishima sha u yamen shi man mcimbim ma bom, aa u maan a maa mbamhen vev la.—Mbafilipi 4:8.

• Gba u se kuran atindi a gomoti. “Ungwan imo i mbatarev man mbautahav.” (Titu 3:1) Ken ityar kpishi i wa atindi sha gbenda u i eren tom a mcimbim magen la. Aluer se soo u eren ishima i Aôndo yô, gba u se ungwan imo i mbatarev man mbautahav.—Mbaromanu 13:1.