1 Yohane 2:1-29
2 Mbayev av, m ngu ngeren ne akaa ne sha er ne er isholibo ga yô. Kpa aluer or er ma isholibo yô, se mba a orwasen* u a lu vea Ter yô, ka Yesu Kristu je la, un ka u perapera.
2 Un ka nagh ku wamen* sha ci u asorabo a ase, nahan kpa, ka sha ci u asorabo a ase tseegh ga, kpa kua sha ci u asorabo a tar jimin cii.
3 Man aluer se za hemen u kuran atindi a na yô, ka sha kwagh ne a tese ér se fa un ye.
4 Or u nan kaan ér, “M fa un,” kpa nan lu kuran atindi a na ga yô, nan ngu or u eren aie, mimi ngu ken imbaor la ga.
5 Kpa or u nan we kwaghôron na ikyo cii yô, Aôndo doo imbaor la ishima sha mimi. Ka sha kwagh ne ka se fa ser se mba ken mzough vea na ye.
6 Or u nan kaan ér nan ngu ken mzough vea na yô, gba keng u nana za hemen u zenden vough er un shon la yange zenden nahan.
7 Ne mba doon mo ishima, m ngu ngeren ne, ka tindi u he ga, kpa ka tindi u tse u yange ne ungwa sha hiihii la. Tindi u tse ne ka kwaghôron u yange ne ungwa yô.
8 Nahan cii kpa, shi m ngu ngeren ne tindi u he, u Yesu yange dondo shi ne kpa ne lu dondon yô, sha ci u ime ngi karen kera, shi iwanger i mimi la ngi tan.
9 Or u nan kaan ér nan ngu ken iwanger kpa nan ker anmgbian u nan ihyom yô, nan ngu ken ime her.
10 Or u anmgbian u nan a doo nan ishima yô, nan ngu ken iwanger her, shi kwagh u nan gbeev mbu nôngon ngu ken a nan ga.
11 Kpa or u nan ker anmgbian u nan ihyom yô, nan ngu ken ime shi nan ngu zenden ken ime, nahan nan fa ape nan lu zan ga, sha ci u ime pir nan ashe.
12 M ngu ngeren ne, mbayev, gadia i de ne asorabo a en sha ci u iti na.
13 M ngu ngeren ne, uter, sha ci u ne fa un u sha hiihii je lu la. M ngu ngeren ne, agumaior, sha ci u ne hemba Iferor ityav. M ngu ngeren ne, mbayev, sha ci u ne fa Ter.
14 M ngu ngeren ne, uter, sha ci u ne fa un u sha hiihii je lu la. M ngu ngeren ne, agumaior, sha ci u ne mba gbong gbong, shi kwaghôron u Aôndo ngu ken a ven her, shi ne hemba Iferor ityav.
15 Tar u de doon ne ishima ga, shin akaa a shin tar kpaa ga. Aluer tar doo or ishima yô, Ter doo nan ishima ga;
16 sha ci u hanma kwagh u a lu shin tar cii—isharen i iyolough man isharen i ashee man shagba u eren*—ka hen Ter a duen ga, kpa ka shin tar a duen ye.
17 Bee kera yô, tar ne ngu karen kera kua isharen i u kpaa, kpa or u nan eren ishima i Aôndo yô, nana lu her gbem sha won.
18 Mbayev av, ka shighe u* masetyô je ne, man er ne vande ungwan ner antikristu* ngu van nahan, hegen je kpa uantikristu due mba kpishi, ka sha kwagh ne je se fe ser ka shighe u* masetyô je ne ye.
19 Ka ken a vese ve dugh ye, kpa yange ve lu ior asev ga, gadia vea lu ior asev yô, ma ve lu a vese her. Kpa ve due kera sha er a tese er i lu ior cii ve lu ior asev ga yô.
20 Kpa un u a lu icighan la tsegha ne, shi ne cii ne mba a mfe.
21 M ngu ngeren ne kwagh ne, ka sha ci u ne fa mimi ga ze, kpa ka sha er ne fe yô, gadia aie duen ken mimi ga.
22 Ka an nan lu oraie? Ka or u nan venda u lumun ér Yesu ka Kristu la gaa? Ka nan je nan lu antikristu ye, un u a vendan Ter man Wan la.
23 Or u nan vendan Wan cii yô, Ter kpa nan ngu vea na ga. Kpa or u nan lumun Wan cii yô, nan ngu vea Ter kpaa.
24 Kpa ne yô, kwagh u yange ne ungwa sha hiihii la a̱ lu ken a ven her. Aluer kwagh u yange ne ungwa sha hiihii la ngu ken a ven her yô, ne lu ken mzough vea Wan kpaa, shi ne lu ken mzough vea Ter.
25 Heela tseegh ga, ka kwagh u un iyol na a tende zwa u nan se je ne—uma u tsôron.
26 M ngu ngeren ne akaa ne sha kwagh u mba ve lu nôngon ér vea tsume a ven la.
27 Man ne yô, Aôndo yange tsegha* ne sha jijingi, shi jijingi la ngu ken a ven her, nahan kera gba u or môm nana tesen ne ga; kpa jijingi u a tsegha ne a mi la ngu tesen ne akaa cii, shi ka u mimi, ka u aie ga. Lu nen ken mzough vea na her, vough er jijingi la a lu tesen ne nahan.
28 Sha nahan yô, mbayev av, lu nen ken mzough vea na her, sha er zum u a va tese un ken igbar la, se nyura se kar hen a na kera sha ihyeen ga, kpa se ôr kwagh a ishima i gbar gbar, sha shighe u una va lu vea vese imôngo la yô.
29 Aluer ne fa er a lu u perapera yô, shi ne fa kpaa er hanma or u nan eren kwagh u perapera cii i lu un a mar nan yô.
Ngeren mba shin kpe
^ Shin “or u ôron kwagh sha ci wase.”
^ Shin “nagh ku himen se a Aôndo; gbenda u nan ér ishima i pever Aôndo.”
^ Shin “ieren i or kaan ihyagh sha akaa a nan lu a mi la.”
^ Zwa Grika, “ihwa i.”
^ Ka, “or u hendan a Kristu” je la.
^ Zwa Grika, “ihwa i.”
^ Ishember i ken zwa Grika i i gem nahan ne ngi ôron kwagh u shighen or mkurem.
