Mbaheberu 5:1-14
5 Gadia hanma pristi u vesen u i tsough nan hen ior yô, ka i ver nan sha u nana̱ eren tom u Aôndo sha ci ve, sha er nana naan uiyua man iniav sha ci u asorabo yô.
2 Ka nan eren kwagh sha mhôôn a mba ve er kwaghbo sha lan* yô, sha ci u nan iyol i nan kpa nan ngu a myen u nan.*
3 Sha nahan yô, ka i gba u nana naan iniav sha ci u asorabo a nan, vough er ka nan na sha ci u asorabo a ior nahan.
4 Or gbe zuan a icivir ne a ishima i nan ga, kpa ka nan zua a mi zum u Aôndo a tsough nan la tseegh, vough er Aron nahan.
5 Nahan Kristu kpa zua a icivir i hingir pristi u vesen ne iyol na ga, kpa a zua a icivir la hen Un u yange kaa a na ér: “U ngu wan wam; nyian ne m hingir teru” la.
6 Shi ka vough er a kaa hen ijiir igen la nahan, ér, “U ngu pristi, imba i Mekisedeki la, man u lu pristi gbem sha won.”
7 Shighe u Kristu lu shin tar* la, eren mbamsen mba zamber man mba sônon kwagh genger genger a mliam ashe, hen Un u yange fatyô u yiman un ken ku la, nahan i ungwa mbamsen nav sha ci u un cian Aôndo.
8 Shin er lu wan nahan kpa, a hen u ungwan kwagh sha akaa a yange ya ican sha mi la.
9 Shi mba va eren un hingir vough yô, lu u mbaungwan un cii vea zua a myom u tsôron sha ikyev na,
10 sha ci u Aôndo ver un ngu pristi u vesen, imba i Mekisedeki la.
11 Se mba a akaa kpishi a ôron sha kwagh na, man a taver u pasen, sha ci u ne hingir mba ungwan tumbuluu.
12 Gadia er hegen* i doo u ma ne lu mbatesen nahan kpa, gema gba u shi orgen nana hide a hii u tesen ne akaa a yange ne hii henen ken icighan loho u Aôndo la, ne hide ne hingir mba i gbe u a na ve atumba, a lu kwaghyan u taver ga yô.
13 Gadia or u nan lu man atumba her cii, nan ngu a hoghor a mkaanem ma perapera ga, sha ci u nan ngu wanye u cuku.
14 Kpa kwaghyan u taver ngu sha ci u mbaganden mba ve er tom a mkav ve u ken ishima gbem i hoghor ve, ve tsaase un u fan mkposo u kwagh u dedoo a kwagh u bo la.
Ngeren mba shin kpe
^ Shin “abu.”
^ Shin “nan yina.”
^ Zwa Grika, “Sha ayange a Kristu lu ken iyol i inyam man awambe.”
^ Zwa Grika, “er hen shighe ne nahan.”
