Mbaheberu 9:1-28
9 Ikyuryan i tse la yange i̱ lu a atindi a sha kwagh u icighantom* shi i̱ lu a icighanjiir shin tar ne.
2 Gadia vegher u tenti u masen sha hunda u̱ yange i er la, daarimenger lu ker kua tebul man ikpenberedi i i ver sha ishigh ki Aôndo yô;* i yilan vegher shon ér Icighan Kpar.
3 Kpa vegher u tenti u shin atô la lu ken ijime i ikyondo i yisan i sha uhar la, i yilan vegher shon ér Icighan Kpar u Hemban Cii;
4 mkam ma sha zanaria ma nanden insensi shimi lu ker, kua areki u ikyuryan, i cir un zanaria iyol cica cii, i gema i wa ityegh ki sha zanaria shimi, mana lu shin ki, shi gbough ku Aron ku yange ku kpar la lu shimi, kua ikpandeawen i ikyuryan;
5 ucerubi mba mondon lu sha ijime na, akper a ve samber gba mure sha kuur, pe i naan* nagh ku wamen* la. Kpa hegen ka shighe u ôron akaa ne vighe vighe ga.
6 Mba eren akaa ne sha gbenda ne mba been kera yô, upristi gema nyôron ken vegher u tenti u sha hunda la hanma shighe sha u eren icighantom;
7 kpa pristi u vesen ka a nyôr ken vegher u shin atô la un tswen, kwa môm ken inyom, a awambe, a za na nagh sha ci na iyol na kua sha ci u asorabo a ior ve er sha lan yô.
8 Sha kwagh ne yô, icighan jijingi ngu tesen wang ér, shighe u tenti u hiihii la lu her la, i lu a̱ pase gbenda u karen nyôron ken icighanjiir la ga.
9 Tenti la ka ikyav i tesen kwagh u sha shighe u hegen ne, man ka sha gbenda ne i eren tom u nan uiyua kua iniav ye. Nahan cii kpa, akaa ne nga ne imoshima i or u nan lu civir Aôndo la ngi hingir vough ga.
10 Kpa uiyua man iniav mbin saa sha akaayan man akaaman kua uiniongo man anza a batisema kposo kposo di tsô. Lu atindi a sha akaa a sha iyol, a i wa ve ér ve eren zan zan shighe u sôron akaa la a kar kuman yô.
11 Nahan kpa, zum u Kristu va sha inja i pristi u vesen u akaa a dedoo a a vande eren la yô, a nyôr ken tenti u a hembe lun a inja shi a hembe lun vough, u i er un sha ave ga yô, inja na yô, ka u shin tar ne ga.
12 Yange nyôr ken icighanjiir, a awambe a ivo shin a agumabua ga, kpa nyôr a awambe a na iyol na kwa môm maa kure kwagh la, sha u nan se myom* u tsôron.
13 Gadia aluer awambe a ivo man a anomabua man mtwem ma wanbua* ma ka i mishi sha ior mba ve hôngor la, ka akaa a ka a wanger ve ve lu wang sha iyol yô,
14 awambe a Kristu, un u jijingi u tsôron la mgbegha un u nan Aôndo nagh sha iyol na i i lu a acôghor shio la, aa hemba wanger imoshima yase cii sha ityom i gbilinigh, sha er se er Aôndo u uma la icighantom gaa?
15 Ka nahan ve a lu orhimen u ikyuryan i he ye, sha er a fatyô u eren ityendezwa i yan dyako u tsôron a mba i yer ve la sha ci u ku u a kpe sha u paan ve sha atindi a ve lu peren sha ikyev i ikyuryan i tse la yô.
16 Gadia Aôndo ka una ya ikyur yô, ka i gba u orumace u i tôô nan i ye ikyur a mi la nana kpe,
17 sha ci u ka shighe u nan kpe la ikyuryan la ka i lu a iwasen ye, gadia er orumace u i tôô nan i ye ikyur a mi la nan lu uma her je, ia er tom ga.
18 Sha nahan yô, ikyuryan i tse la kpa yange i̱ hii tom* zum u i haa awambe inya yô.
19 Gadia zum u Mose ôr ior cii hanma kwagh u Atindi a kaa la bee yô, a tôô awambe a agumabua man a ivo, kua mngerem, man ikyondo i sha aive, i̱ nyian dindee, kua hisop,* a gba mishin sha takeda* la man sha ior cii,
20 kaan ér: “Ka awambe a ikyuryan i Aôndo a kaa ér ne kuran je ne.”
21 Shi a mishi awambe la sha tenti man sha mkam ma eren icighantom* a mi cica cii.
22 Nahan sha kwagh u Atindi a tese yô, akaa cii ka i nôngo u wanger a sha awambe, shi saa a haa awambe inya, gayô a fatyô u den or môm isholibo ga.
23 Sha nahan yô, yange gba hange hange u a wanger akaa a a lu ikyav i akaa a sha la sha gbenda ne, kpa akaa a sha la yô, gba u a wanger a sha iniav mbi mbi hembe doon ica je yô.
24 Gadia lu ken icighanjiir u i er sha ave, a lu ikyav i kwagh u a lu kwagh jim jim la Kristu nyôr ga, kpa lu sha kpôô kpôô nyôr ye, sha er hegen una za sha ishigh ki Aôndo sha ci wase yô.
25 Yange er kwagh ne lu sha u una naan nagh sha iyol na hanma shighe, er pristi u vesen ka a nyôr ken icighanjiir hanma inyom a awambe a a lu a na ga la nahan ga.
26 A lu nahan yô, ma i gbe u una zer yan ican, hii sha shighe u i hii u gban tar* la je. Kpa a va kwa môm vough maa a kure kwagh la, sha shighe u mkur u tar ne,* sha u va karen a isholibo kera sha nagh ku a ne sha iyol na la.
27 Man er i gbe u or a kpe kwa môm vough maa kwagh a bee, kpa a karen kera yô, a ôr nan ijir nahan,
28 kape Kristu kpa yange i na nagh sha a na kwa môm vough, sha u tôôn asorabo a ior kpishi kera, maa kwagh la kure je la; una vaan kwa u sha uhar yô, a kera lu sha ikyaa i isholibo* ga, nahan a lu mba ve lu keren un sha gbashima sha ci u myom ve la vea nenge a na ye.
Ngeren mba shin kpe
^ Shin “a sha kwagh u civir Aôndo.”
^ Shin “kua beredi u sha ishi.”
^ Shin “hen ijiir i nan.”
^ Shin “nagh ku himen ior a Aôndo.”
^ Zwa Grika, “mpaa.”
^ Shin “tulebua.”
^ Zwa Grika, “tsegha i.”
^ Nenge Ngeren u Pasen Asember.
^ Shin “ihyurenruamabera.”
^ Shin “akaa a civir Aôndo.”
^ Zwa Grika, “tan (ivor),” inja na yô ér, er i hii u jilen ônov mba Adam man Ifa la je.
^ Shin “kôv ne.” Ka tar u Mbayuda je la. Nenge Ngeren u Pasen Asember.
^ Shin “a kera lu sha u va been a isholibo kera.”
