Yohane 18:1-40
18 Yesu ôron akaa ne cii yô, a mough vea mbahenen nav ve per Uwagh* u Kederon yande la, ve yem ape sule* ugen lu yô, a za nyôr ker vea mbahenen nav.
2 Yuda, un shon u tee un la, kpa fa ijiir la, sha ci u Yesu kohol her vea mbahenen nav ashighe kpishi.
3 Tsô Yuda za va a kwe shojaa man mbakuran mba upristi mba tamen man mba Mbafarishi her, ve tsar iusu ve kôr* shi ve lu a amenger man ikyav mbi numuv.
4 Er Yesu vande fan akaa a aa va er un la cii yô, a due a tile sha hemen, a pine ve ér: “Ka an ne kerene?”
5 Ve kaa a na ér: “Ka Yesu, Ornasareti.” A kaa a ve ér: “Ka mo un je ne.” Yuda, u tee un la kpa tile vea ve her.
6 Kpa Yesu kaan a ve ér, “Ka mo un je ne” yô, ve hide ijime, ve gba inya.
7 Shi a pine ve ér: “Ka an ne kerene?” Ve kaa ér: “Ka Yesu, Ornasareti.”
8 Yesu kaa ér: “M vande kaan a ven mer ka mo un je ne. Nahan aluer ka mo ne lu keren yô, de nen ior mban ve yem.”
9 Lu sha u kuren kwagh u yange ôr la, ér: “Ken mba u nem la cii, mô ve môm saa ga.”
10 Tsô Shimon Peteru lu a sanker, nahan a tsua a gber kpan u pristi u vesen, a bugh un tough ku yanegh. Iti i kpan la ér Malku.
11 Kpa Yesu kaa a Peteru ér: “Wa sanker ken var. Gba u me ma shin kôôpu u Terem a nem la gaa?”
12 Tsô ushoja mbara man kurutya kua mbakuran mba Mbayuda mbara kôr Yesu kange un ave.
13 Ve hii zan a na hen Anasi, gadia lu terkem u Kayafa, u lu pristi u vesen ken inyom shon la.
14 Man lu Kayafa ne je vande wan Mbayuda kwagh ér, á hemba lun ve a iwasen u or môm nana kpe sha ci u ior ye.
15 Tsô Shimon Peteru, man orhenen ugen, lu dondon Yesu ijime. Pristi u vesen la fa orhenen shon, nahan a nyôr vea Yesu ken tembeya u pristi u vesen la,
16 kpa Peteru tile sha hunda ken won. Nahan orhenen shon, u pristi u vesen fa un la, due za lam a wankwase u kuran hunda la, maa a nyôr a Peteru ker.
17 Wankwase u lu kuran hunda la pine Peteru ér: “We kpa u ngu môm ken mbahenen mba or nee?” Peteru kaa ér: “M ngu ga.”
18 Tsô ikpan man mbakuran mbara tile kase usu u ve keer sha aka a usu la, ve lu ôson, sha ci u ndôhôr. Peteru kpa tile her vea ve, lu ôson.
19 Nahan pristi u tamen la* pine Yesu mpin sha kwagh u mbahenen nav kua ityesen na la.
20 Yesu gema kaa a na ér: “M ôr tar kwagh ken igbar. Hanma shighe ka m tesen ken shinagoge man ken tempel, ape Mbayuda cii ve kohol imôngo la, shi m ôr kwagh môm ken myer ga.
21 Nahan er nan u pinen mo kwagha? Pine mba ve ongo kwagh u m ôr ve la. Nenge! Mban fa kwagh u m ôr yô.”
22 Ôron akaa ne yô, orkuran ugen u tile her la, ta Yesu sambe sha ishi, kaa ér: “Kape u lam a pristi u tamen laa?”
23 Yesu gema kaa a na ér: “Aluer m ôr kwagh shami ga yô, er shiada sha kwagh u m ôr shami ga la; kpa aluer kwagh u m ôr la ka u shami yô, er nan u tem sambe?”
24 Tsô Anasi na zwa i yem a Yesu hen Kayafa, pristi u vesen, er lu a ikyangenev sha ave her la.
25 Shimon Peteru gema tile her lu ôson usu. Nahan ve pine un ér: “We kpa u ngu môm ken mbahenen nav gaa?” A tuna a kaa ér: “Mo ga.”
26 Môm ken ikpan i pristi u vesen, u lu anmgbian u or u Peteru bugh un tough la, kaa ér: “M nenge zan a we ken sule la vea na gaa?”
27 Kpa Peteru shi tuna, fese nahan ikyegh maa tôngo.
28 Maa ve mough a Yesu hen Kayafa, ve yem a na hen ya u gomna. Hen shighe ne lu pepe pepe. Kpa ve ayol a ve yô, ve nyôr ken ya u gomna la ga, sha er vea hôngor ayol a ve ga, nahan vea ya Paseka yô.
29 Tsô Pilatu due ken won va kohol ve, maa a pine ve ér: “Ka nyi or ne a er ve ne lu va yilan un ijiri?”
30 Ve gema ve kaa a na ér: “Or ne una lu orsholibo* ga yô, ma se ve a na hen a we ga.”
31 Nahan Pilatu kaa a ve ér: “Yem nen a na za ôr un nen ijir sha atindi a en.” Mbayuda gema kaa a na ér: “Tindi na se ian i wuan or ga.”
32 Kwagh ne er sha u kuren kwagh u Yesu yange ôr sha u tesen inja ku i una kpe la.
33 Tsô Pilatu hide nyôr ken ya u gomna za yila Yesu pine un ér: “U ngu Tor u Mbayuda?”
34 Yesu gema kaa ér: “U ngu pinen kwagh ne sha mnenge wouwee? Shin ka mbagenev ve ôr u kwagh wama?”
35 Pilatu gema kaa ér: “Nahan mo m ngu Oryuda? Ka nongoior wou kua upristi mba tamen ve va ne u sha ikyev yam ye. Ka nyi u ere?”
36 Yesu kaa ér: “Tartor wam ka u shin tar ne ga. Tartor wam ua lu u shin tar ne yô, mba eren mo tom ma ve nôngo ityav, sha er i de nem sha ikyev i Mbayuda ga yô. Nahan kpa, Tartor wam ka u heen ga.”
37 Pilatu gema pine un ér: “Nahan u ngu tor zee?” Yesu kaa a na ér: “U kaa vough, m ngu tor. Gadia ka sha ci u nahan i marem ye, shi ka sha ci u nahan m ve shin tar ye, sha er me pase mimi la ken igbar yô. Hanma or u nan lu ken mimi la yô, nan ongo imo yam.”
38 Pilatu gema pine un ér: “Ka nyi i lu mimi?”
Ôron nahan yô, shi a due ken won, a za kaa a Mbayuda ér: “M zua or ne a ibo ga.
39 Bee kera yô, ka i gba u me pase or sha ci wen, sha shighe u Paseka. Nahan ne soo ner m pase Tor u Mbayuda la sha ci wenee?”
40 Tsô shi ve ôr taver taver ér: “I de lu or ne ga, kpa i lu Baraba!” Kpa Baraba gema lu ornumungbenda.
Ngeren mba shin kpe
^ Shin “pev.”
^ Sule u ahuaiue man ufaluwa man atam a ikyon.
^ Shin “ve lu a akagh a usu.”
^ Ka, “Anasi” je la.
^ Shin “iferor.”
