ITYOUGH 25

Me er nena ve Me de ieren i ngirigh ilyeegh yagh ki yavaor laa?

“Yange m hii u ngirigh ilyeegh yagh ki yaven a or la shighe u m lu anyom anigheni la. Shighe kar yô mhen m fa er ieren ne i doo Aôndo ga yô. Hanma shighe u m hide m ngirigh ilyeegh yagh ki yavaor yô, ishima i vihim ker kpishi. Maa m pine iyol yam mer’ ‘a er nan ve Aôndo una soom shawono?” —Luiz

Ka wea hiin u hian or yô, isharen i yaven a or la i hingir ken a we taveraa. Kwagh ne ka a na u hingir u ngirigh ilyeegh you ki yaven a or la. * Kpa Ior kpishi ka ve kaa ér kwagh u or ngirigh ilyeegh ki nan ki yaven a or la ka zege kwagh ga. Ka ve kaa ér, i er or kwagh u vihin ga. Nahan cii kpa ityôkaa injaa ngi i i gbe u se palegh ieren ne yô. Apostoli Paulu yange nger ér: “Nahan yô, wua nen alegh a iyolough a en a a lu shin tar la, sha kwagh u isharen i yaven a or la.” (Mbakolose 3:5) Sha nahan yô, ieren i ngirigh ilyeegh ki yaven a or la i wuan a wua isharen i yavaor la ga, kpa ka i seer kenden isharen la ken or. U seer yô, de se nenge akaa a dondo ne:

● Ieren i ngirigh ilyeegh ki yavaor la ka i na or nan lu a ieren i i hemban soon iyol i nan tseegh la. U tesen ikyav yô, shighe u or nan lu ngirigh ilyeegh ki nan ki yaven a or yô, ka nan hemba veren ishima u kuren isharen i nan i yolough la tseegh.

● Nomsoo shin kwase u nan ngirigh ilyeegh ki nan ki yaven a or yô, nan nengen nomso shin kasev mbagenev sha gbenda u kuren isharen ve i yaven a or la tseegh.

● Ieren i ngirigh ilyeegh ki yaven a or la ka i na yô or nan hemban henen sha kwagh u kuren asaren a nan tseegh, man kwagh la ka a na yô i hingir nan ican u kuren isharen i yavaor i sha gbaaaôndo i or u nan vôso la.

Sha nahan yô, u we ngirigh ilyeegh you ki yaven a or sha u kuren isharen you i yaven a or la yô, nôngo fa u kôron iyol tsaha. (1 Mbatesalonika 4:4, 5) Man kwagh u una wase u yô ka kwaghwan u Bibilo u i kaa ér se palegh hanma kwagh u una na ve or nana hingir u lun a isharen i yaven a or la cii. (Anzaakaa 5:8, 9) Nahan kpa aluer ieren i ngirigh ilyeegh you ki yaven a or la ya tor ken a we di ye? Alaghga je yô u nôngo sha afatyô wou cii wer u de ieren shon kpa u kanshio. Alaghga u kure ikyaa fese wer kwagh hemba u shi u kuma u eren kwagh u Aôndo a soo ga. Kape wan nomso ugen u i yer iti na ér Pedro kpa yange nenge iyol na je la. “A kaa wener, hen shighe u yange mea hide mea er ieren ne yô, i hemba vihin mo cii.” “Shi yange m hen mer mayange a fatyô u den mo a isolibo yam ga. Kwagh ne na yô i taver mo u eren msen.”

Aluer kape i lu u la yô, mayange je de yen ishima ga. Kwagh ngu a hemba u ve ga. Agumaior kua mbaganden kpishi de ieren i ngirigh ilyeegh vev ki yavaor la. Man we kpa u fatyô u den ieren ne.

Kwagh u U Er ve Ishima Ia De u Nan We Ibo Yô

Er se vande ôron nahan, ior mbagenev mba ieren i ngirigh ilyeegh vegh ki yavaor la yange i ya tor ken a ve yô ishima ka i zer nan ve ibo. Nahan kpa “er ve zungwe sha gbenda u doon Aôndo” yô kwagh la wase ve u den ieren la, man we kpa u fatyô u den ieren ne je ka u henen a hen ga. (2 Mbakorinte 7:11) Kpa aluer ishima ngi nan we ibo kpishi za karen ikyaa nya yô, u kera hen kwagh sha gbenda u vough ga. Man kwagh la una na yô iyol a kpe u shi a kera lu u pe nôngon wer u de ieren la ga.—Anzaakaa 24:10.

Sha nahan yô, nôngo lu a mnenge u vough sha kwagh shon. Ieren i ngirigh ilyeegh ki yavaor la kpa ngi môm ken aeren a wang ga. Ieren ne ka i na yô ‘se lu ikpan i asaren man ugurgurmbaakaav atô kposo kposo.’ Shi se hingir u lun a aeren a bo. (Titu 3:3) Nahan cii kpa ieren i ngirigh ilyeegh ki yavaor la ka isholibo i vesen er iday i eren shin ijimba i eren nahan ga. (Yuda 7) Aluer u ngu a ieren ne kpa, mayange de kuren ikyaa wer u er isholibo i i gande u a de u a mi ga ze. Kwagh u vesen yô, ka u nôngon den ieren la shi palegh i!

Ka i hemba lun se ican ga u eren ma kwagh u yange se de u eren la shighe u iyol i kpe se yô. Shighe u kwagh a er u nahan yô, umbur kwaghwan u a lu ken Anzaakaa 24:16 ne ér: “Gadia orperapera ka nan gba kwa taankaruhar kpa nan mough, kpa iferor yô, ka nan gba ken bocan.” Aluer yange u er kwagh u sha mi ga kpa, kwagh la a de nan we u henen wer u hingir iferor ga. Mayange de haan iyol nya ga. Kpa tôv fa kwagh u yange na ve u hide u er kwagh shon la, nahan nôngo sha afatyô wou cii palegh u eren kwagh shon.

Tôô shighe gbidye kwar sha dooshima u Aôndo kua mhôônom nam ma zugwen la. Orpasalmi Davidi u un kpa ashighe agen yange a er isholibo sha ci u mba myen nav la, kaa ér: “Er mhôônom ka ma kôr ter a ônov nahan, kape TER kpaa mhôônom ma ker Un a mba ve cie Un la. Gadia Un yô, A fa mlu wase, A umbur er se lu vuulevu je yô.” (Pasalmi 103:13, 14) Sha mimi yô, Yehova ka a fa mbamyen asev nahan a ‘kegh a kegh iyol u den se kwaghbo.’ (Pasalmi 86:5) Kpa shi a soo ér se nôngo sha afatyô wase se sôr ieren yase la. Nahan ka nyi akaa u er ve u hemba ieren i u soo u den nee?

Gbidye kwar sha akaa a nan we msaanyol la tsembelee. Ka i doo u nengen ufiim shin u zan sha ajiir a sha intanet a a tesen akaa a jimbaa yôô? Orpasalmi yange er msen hen Aôndo ér: “Gemam ashe kera sha u kenger gbilinkwagh.” *—Pasalmi 119:37.

Kange ishima wer u hide u ver ishima sha akaa agen. Orkristu ugen u i yer un ér Wiliam yô kaa ér: Cii ve u yav yô, ôr ma ngeren u a har sha Bibilo yô. Kwagh u hemban lun a inja u u er cii ve u yav yô, i lu u henen ken mkaanem ma Aôndo.”—Mbafilipi 4:8.

Lam a orgen sha zayol shon. Alaghga a taver we u ôron orgen sha ci u kunya ngu kôron we a iyol you. Nahan kpa aluer u er nahan yô, kwagh la una wase u u hemban ieren shon! Man ka kwagh u Orkristu ugen u i yer un ér David yange ôr je ne. “A kaa ér yange m lam vea terem se uhar.” Mayange me hungur a kwaghwan na la ga. Yange wam kwagh kundu kundu shi kaa ér mo m na saan un iyol.’ Yange fa er gba u me taver ishima cii ve me ôr un er i lum ken ishima la ye. Man lu ishimataver i kwagh gbam a mi je la, shi kwagh la yange wasem nahan m kange shima u seer sôron ieren yam.

“Terem maa tesem avur a Bibilo a yange wasem u fan er m lu or u bo ga yô, kua avur a bibilo a gen a yange wasem u nengen er kwagh u m lu eren la lu u vihin kpishi yô. Yange kaa ér mo m hungur a akaa a ken ijime la, kpa m gema m ver ishima sha kwagh u ken hemen shi m dondo kwaghwan la nahan se va mase lamen sha mi shighe u gen. Shi yange kaa a mo ér, kwagh la a de nem iyolkpen ga shi m de zeren henen sha mi gbem ga. David mase kuren nahan ér: “Er yange m ôr orgen mer nana wasem u nôngon a zayol wam ne yô, kwagh la wasem kpen kpen je.” *

KEN ITYOUGH KI DONDON NE

Se hen se fa er u gban yaven a or tsô la i lu beer kwagh ga yô. Tôv fa er i hii ve kwagh ne a lu beer kwagh ga yô.

[Ngeren mba shin kpe]

AVUR A BIBILO A HANGE HANGE

“Nahan yevese asaren a agumaior la, gema eren kwagh u perapera shi za hemen u lun a jighjigh u nan shi tesen dooshima shi keren bem, a mba ve yilan sha iti i Ter a ishima i wang la.”—2 Timoteu 2:22.

KWAGHWAN

Shighe u isharen i yavaor i ve u ken ishima yô, er msen cii ve ia va hingir taveraa ye “sha er u zua a agee a a gande a orumace” nahan u fatyô u hemban imeen la yô.—2 Mbakorinte 4:7.

U FA KPA . . . ?

Hanma or u nan vôr ken jijingi cii nana fatyô gban ken imeen i eren idya. Kpa or u nan taver ken jijingi yô, ka nan kôr iyol i nan tsaha shighe u nan lu tswen je kpaa.

KWAGH U Ú WE ISHIMA U EREN YÔ!

Me fatyô u veren ishima yam sha akaa a a lu a wang la aluer m ․․․․․

Aluer ka u me de mer isharen la i hembam yô guda me ․․․․․

Kwagh u i doo u me pine mbamaren av sha ikyaa ne yô ka ․․․․․

WE U KAA WER NYI?

● Er nena ve i lu hange hange u se umbur ser Yehova kegh a kegh iyol u den kwaghbo?—Upasalmi 86:5.

● Er i lu Aôndo u a gbe u a isharen i yavaor la, shi akaa ér we u kôron iyol you tsaha yô, ngu a vangertiôr ér we u fatyô u eren nyi?

[Mkaanem ma]

Er m va hemba zaiyol wam ne yô, m hingir u lun a imoshima i wang hen Yehova, man me fatyô u tan i kera sha u zuan kwagh u gen ga!—Sarah

[Foto]

Aluer u ngu yevese maa u za gba yô, kwagh la tese ér gba u u hide u hii ayem la ga, kpa gba u u mough u za hemen u yevese. Sha nahan yô, aluer yange u de ieren i ngirigh ilyeegh you ki yavaor la kpa shi u va hide u hii ieren shon kpa de henen wer iniôngon you la i saa ishe ga.