ER UUMACE lu seer a seer iyenge yô, isholibo man ifer kpa gba samber sha tar fele fele. Nahan Enoki u lu profeti tswen hen shighe la, gba tan ior icin ér iyange igen yô, Aôndo una tim mbaaferev cii. Nahan kpa, ifer za a za hemen kpoghuloo. Hen shighe la mbatyomov mbagenev hemba Yehova ato, ve undu ajiir a ve a sha la ve sen shin tar, ve gema ve hingir ior, ve sase eren ônkasev mba iorov. Er mtse u ve tsa a ônkasev mba iorov la lu kwagh u sha gbaaôndo ga yô, ve mar ônov mba ageev, mba nzughul a ior, i yilan ve ér Akôraior. Akôraior ne seer vihin tar sha ipila ve i eren la man iwoo-or kpaa. Ishima yange i vihi Aôndo kpishi zum u a nenge uumace mba yange gba ve ver shin tar mbara lu saan ishe yô.

Enoki yange kpen kera yô, orgen gema lu sha ayange a tar vihi kpishi la, or ne lu kposo. Iti na ér Noa. Or ne eren ishima i Aôndo vea tsombor na. Nahan zum u Aôndo soo u timin mbaaferev mba sha ayange la yô, gema gba un ishima u waren Noa kua uzendenya. Nahan Aôndo kaa a na ér a̱ er tso, lu zegetso u lun azongo anyiin er iyou nahan. Lu u Noa vea tsombor na kua uzendenya kposo kposo vea nyôr ken tso ne vea war mngerem ma deemee ma ma a va sha tar cii la. Noa er kwagh u Aôndo kaa un la. Noa lu eren tso la shi lu “yôôn kwagh u perapera.” Yange er tso la kuma anyom 40 shin 50 nahan. (2 Peteru 2:5) Noa ta ior icin sha kwagh u Mngerem ma Deemee mara, kpa ve ungwa un her ga. Ayange nga kar yô, kuma shighe u Noa man tsombor na kua uzendenya vea nyôr ken tso la. Aôndo maa wuhe ve kimi. Tsô ura gba nôôn.

Zegeura nôô ayange 40, tugh man atetan zan zan mngerem uve tar cica cii. Mbaaferev kpe cica cii. Iwer ngi kar yô, mngerem gba panden kure kure, zan zan tso la mase za hangen sha uwo ugenegh. Noa man tsombor na kua uzendenya yange ve tsa ken tso la kuma inyom jimin cii ve ve mase duen ye. Tsô Noa na Yehova nagh sha u sughun un. Nahan Aôndo tôndo zwa a Noa man tsombor na ér mayange una kera va a mngerem ma deemee sha u timin akaauma sha tar kera ga. Yehova yange ver ikyume sha u i lu ikyav i ityendezwa na i doon tsung ne.

Aôndo timin tar sha mnger kera cii yô, Aôndo shi na uumace atindi a he agen. A na ve ian ér ve gema yan inyam. Kpa awambe yô, ve de ye ga. Shi Aôndo kaa a ônov mba Noa ér ve samber sha tar cii, kpa mbagenev ken ve hemba un ato. Ior yange ve kohol imôngo sha hemen u Nimrodi, ve hii u maan gôgôyou u taven sha ken gar u Babel, u i va gema iti na hingir Babilon la. Awashima ve yô, lu u peren tindi u Aôndo kaa ér ve samber sha tar cii la. Kpa Aôndo nzughul zwa u mbahembanato mbara lamen môm la, nahan ve hii u lamen ijô kposo kposo, tsô ve kera fatyô u kuren awashima ve la ga. Er ve kera fatyô u lamen ayol a ve ga yô, ve de u maan gôgôyou la, ve sambe wue wue.

—I zua a kwagh u i nger heen ne ken Genese 6 zan zan 11; Yuda 14, 15.