1-3. Lu nyi Peteru nenge Yesu er sha iyange igene, man lu nyi gema tagher a mi hen tugh mbu sha iyange laa?

TÔÔ ASE wer, u ngu nengen a Peteru er a lu urugh iyol nahan tso, shi a lu yengen ken ime yemen yô. Ken masejime yô, a nenge hii u wanger sha kwavaôndo vegher u sha ityoughkitaregh la miimii, u tesen ér sev hii u aven. Er Peteru naha tso shighe gôgônan yô, iyol nyoon un, hii ken ijime due sha akende. Ahumbe a a lu kpianger a Zegemnger u Galilia sha utaha la lu daase a ice na i sha ityou. Agôndo a zegemnger ne lu tan sha ishigh ki tso la, nahan mngerem ma ndôhôr keghelee lu tsendan Peteru iyol, ma heen un iyol cica cii. Kpa lu nahan tso la her.

² Peteru man akar a na undu Yesu hen ijiir igen sha kpetar, lu her tswen. Sha iyange la, ve nenge er Yesu koso ikpelaior udubu imôngo sha ikpenbredi man ishu kpuaa tseegh yô. Kwagh ne na yô, ior mbara soo ér vea kôr Yesu tor, kpa Yesu soo u nyôron iyol ken gomoti ve la ga. Shi a kange ishima ér una tese mbadondon un, ve de lu a isharen ne ga. Er Yesu soo u karen hen ape ikpelaior lu la kera yô, a torough a mbahenen nav ér ve nyôr shin tso, ve naha ve per zegemnger yande la. Mba ngur yemen yô, un gema yem sha uwo tswen, lu za eren msen.—Mar. 6:35-45; ôr Yohane 6:14-17.

³ Shighe u tso mough a mbahenen la, uwer lu sha ityou jighjigh. Ve yem zan zan uwer kpeese lu miren kure kure vegher u shin ityôtar la, kpa ve lu a fatyô ve za ica ga. Er ahumbe lu toron shi agôndoamnger lu kpianger pever ga yô, lu ve ican u lamen kpishi. A̱ shi nan kpa, Peteru lu henen akaa ken ishima hen shighe ne.

4. Peteru ver se ikyav i dedoo nena?

⁴ Akaa lu kpishi a una hen sha mi yô! Peteru hii zuan vea Yesu u  Nasareti anyom kar ken ijime er ahar nahan, cii man shighe ne ye. A zua a ityesen hen Yesu sha akaa kpishi, kpa shi akaa lu her kpishi a una hen yô. Er kegh iyol ér una hen u tilen dông, ma kwagh a de ne un gbeev mbu nôngon sha er una hingir u cian kwagh shi tan akperan sha kwagh u Yehova kua Yesu ga yô, a ver se ikyav i dedoo i se dondo yô. De se nenge er i hii ve i doo u se dondo ikyav na yô.

5, 6. Peteru eren nyi?

⁵ Mayange Peteru hungur iyange i hii zuan vea Yesu u Nasareti la ga. Anngô na Anderia vande ôron un loho u kpiligh un iyol ér: “Se zua a Mesiya ve.” Mkaanem man gema uma u Peteru. Mayange una kera lu or u yange vande lun la ga.—Yoh. 1:41.

⁶ Peteru lu ken gar u Kapernahum. Gar ne lu hen kpe u ber u i yilan ér Zegemnger u Galilia la, vegher u ken imbusutarimese. Un man Anderia, kua ônov mba Sebedeu, Yakobu man Yohane cii, ve lu mba eren kpenga u kôron ishu la. Lu kwase u Peteru tseegh lu vea na ga, ngô na kem man anmgbian na Anderia kpa lu a na hen ya. Yange gba u una eren kpenga na u kôron ishu la kpoghuloo, shi una eren u a agee a na man a mfe u zua a mi ker la ve, una kôrcio u nengen sha ugbayol mba tsombor na ne ye. Sha mimi yô, nomsombaiorov mban yange vea yaren ikyôr tugh ayange imôngo, vea haan ukper vev shin mnger hen atô u utso uhar, vea urugh nyityô ishu i ve ker cii vea haan shin tso. Shi nenge ken ishima you er yange sev mbua av ve, ve ya ican kpoghuloo ve sange ishu i dedoo ken ikpela ishu i ve ker la ve tee, shi ve cinge ukper vev shi ve kile ve wang yô.

7. Lu nyi Peteru ungwa sha kwagh u Yesu, man er nan ve loho la sagher un iyol yumu?

⁷ Bibilo kaa a vese ér Anderia lu orhenen u Yohane u eren Batisema. Yange a doo Peteru u ungwan loho u Yohane u anngô na va ôr un la tsung je. Iyange igen yô, Anderia nenge a Yohane lu ôron kwagh hônon uwegh sha Yesu u Nasareti la kaan ér: “Nenge, Waniyôngo u Aôndo Ngura!” Anderia maa hingir ordondon u Yesu her ave ave je, shi kar torough torough za ôr Peteru loho u sagher iyol ne, ér: Mesiya va ve! (Yoh. 1:35-40) Cii man shighe ne yô, Yehova Aôndo vande tôndon zwa anyom kar ken ijime 4,000, shighe u uumace hemba ato ken Eden la, ér una tindi icuwan or u nana va bee a ican i uumace gbindigh gbindigh yô. (Gen. 3:15) Anderia nenge a Mesiya, Oryiman ne iyolna! Peteru kpa kar a kar za kohol Yesu.

8. Inja i iti i Peteru la ér nyi, man mbagenev nenge ér iti la kuma sha a na ga sha ci u nyi?

⁸ Cii man iyange ne yô, i yilan Peteru ér Shimon shin Shimion. Kpa Yesu kenger un yô, a kaa ér: “We u ngu Shimon, wan u Yona, á masen yilan we er Kefa (inja na yô ér Peteru).” (Yoh. 1:42) Inja i iti i “Kefa” la yô ér, “iwen” shin “vande.” Ikyav tese ér, mkaanem ma Yesu  man lu kwaghôron u profeti. Yange tsenga nengen ér Peteru una va hingir er vande nahan, inja na yô, una va lu môm ken mbahenen nav mba tilen dông, tenger ga, shi lun a jighjigh iyol. Peteru yange nenge iyol na nahan kpa? Taver u kaan tsô. Ior mbagenev mba ve ôron ityakerada i ivangeli sha ayange a ase ne je kpa nenge ér Peteru lu er vande nahan ga. Ior mbagenev kaa ér akaa a Bibilo i er sha kwagh u Peteru la tese ér yange lu pe pe pe, kôrough inja ga shi pendan ishima sha kwagh ga.

9. Ka nyi nahan kwagh a gbe Yehova man Wan na u nengen a mi ken a vese, man u nenge wer doo u se na jighjigh ser gbenda u ve nengen se la ka u vough sha ci u nyi?

⁹ Peteru lu a mbamshi nav. Yesu kpa lan ve ga. Kpa hanma or yô, lu inja i nan i dedoo la kwagh gba Yesu sha mi ye, er Ter na Yehova kpa a eren nahan. Yesu nenge Peteru a aeren a dedoo kpishi, nahan soo ér Peteru a hen u eren kwagh sha gbenda u u hembe doon cii yô. Nyian kpa, ka aeren a ase a dedoo la kwagh a gbe Yehova man Wan na sha mi ye. Alaghga a taver se u nan jighjigh ser vea fatyô u nengen a aeren a dedoo kpishi ken a vese. Nahan kpa, doo u se na jighjigh ser gbenda u ve nengen se la ka u vough shi se de ser, ve tsaase se shi ve maa se, er Peteru kpa er nahan.—Ôr 1 Yohane 3:19, 20.

10. Lu nyi nahan alaghga Peteru nenge sha ashe na, nahan cii kpa hide yem u za eren nyi?

¹⁰ A̱ shi nan kpa, Peteru zende vea Yesu kpuaa shighe u Yesu hii tom na u zenden pasen kwaghaôndo la. Nahan alaghga yange nenge er Yesu er ivande na i hiihii, i gema mngerem hingir wain hen iniongo i ivesegh i ken Kana la yô. U hemban cii yô, yange ungwa loho u dedoo u nan ior ishimaverenkeghen, u Yesu lu pasen sha kwagh u Tartor u Aôndo la. Shin er ungwa akaa a doon un shi nenge akaa a kpilighyol nahan kpa, a undu Yesu a hide a yem u za eren kpenga na u kôron ishu la. Kpa iwer ngi kar yô, Peteru shi zua a Yesu, maa Yesu kaa a na kwa ne ér a̱ kohol un vea gema eren tom u pasen kwagh la sha hanma shighe cii.

11, 12. (a) Ka tom u nyi Peteru yange tsa eren tugh kakaa? (b) Shighe u Peteru lu ungwan kwaghôron u Yesu la, alaghga lu pinen ken ishima na ér nyi?

¹¹ Peteru yange yar ishu kôron tugh kpa ikyôr doo tugh mbura ga. Mbakôronishu mban tsa haan ukper vev tugh kaka, kpa ve kôr kwagh ga. Adooga, Peteru yange kar ayom na cica cii, lu haan kper sha ajiir a nenge ér ishu ia lu kpishi yô, kpa kwagh lu ga. Sha mimi yô, er mbakôronishu mbagenev kpa tômon nahan, alaghga ashighe agen Peteru yange a tôm ér una fetyô yô, ma un kenger shin mngerem ma lun ijumbu ijumbu mara ma i ker shin inya, sha er una fa ajiir a ishu i kohol la, una haa kper, shin una kumba i una haa ken ukper nav yô. Alaghga yange iyol ia kpe Peteru kpishi, sha ci u nenge ér kwagh ngu u una  er ve ishu a kar a iv un ken ukper ga. Tom u kôron ishu ne lu Peteru kwagh u iniumbe ga, gadia lu u una kôr ishu keng ve una nenge sha ior nav ye. Ken masejime yô, a due sha tar aveve. Shi gba u una nzua ukper mbara. Ngur nzuan ukper yô, Yesu maa va dugh her.

¹² Ikpelaior kase Yesu ningir tser, kwaghôron na doo ve u ungwan je zua ga. Er ikpelaior imbishi Yesu yum yô, a nyôr shin tso u Peteru, a kaa a na ér a kpela tso la a yem ken mnger daalaa. Yesu tema shin tso ken mnger, lu tesen ikpelaior i i lu sha kpetar la, ikyenge na lu duen tseer tseer. Peteru kpe iyol ungwa hanma kwagh er mbagenev mba ve lu sha kpetar la nahan. Mayange due un ishima u ungwan kwagh u Tartor u Aôndo, u ú lu itinekwagh i ityesen i Yesu la ga. Ian i Peteru lu a mi i wasen Kristu u samber a loho u ishimaverenkeghen sha tar cii la, lu ian i civirigh kpen kpen! Kpa, una fatyô u eren tom la je he? Peteru una er nena ve una koso tsombor na? Adooga tsô Peteru hide umbur tugh mbu yange tsa keren ishu kaka kpa kôr kwagh ga la.—Luka 5:1-3.

13, 14. Ka ivande i nyi Yesu yange er sha ci u Peteru, man Peteru er nena?

¹³ Yesu kur kwaghôron na yô, a kaa a Peteru ér: “Kporom hen ijiir i i ze yô, za kende ukper enev sha u kôron ishu.” Peteru ta akperan sha kwagh ne kpishi. A kaa ér: “Tere, se tsa keren kaka sha ican, kpa se zua a ma kwagh ga; kpa sha imo You yô, me haa ukper.” Hen shighe ne, Peteru sember nzuan ukper. Mkaanem nam tese ér yange kera soo u hiden haan ukper mbara shin mnger ga, hemban je yô, hen shighe u ishu kpa ia lu yan kwagh ga la! Nahan cii kpa, Peteru er kwagh u Yesu kaa ér a er la. Alaghga tsô yange yila akar a na, a yange lu shin tso ugen la ér a̱ dondo ve vea za haa ukper.—Luka 5:4, 5.

¹⁴ Peteru ngur urugh ukper mbara duen a mi shin mnger yô, ve yuhwa gande un. Bee un er ka mnyamciem nahan, kpa a urugh ve sha agee, ica i gbe ga yô, a nenge ikpelashu lu nôngon ken ukper mbara! Maa gba felegh nomsombaiorov mba ve lu shin tso ugen la fele fele ér ve va wase un. Mba va ngur wasen un yô, fese je ve kav er ishu la gande tso môm tseegh yô. Ve iv ishu shin utso mba uhar mbara poo, kpa ishu la ngee gande, tsô utso mbara gba nôngon u urun. Kwagh ne kpiligh Peteru iyol je gande u ôron. Yange vande nengen a tahav mbu Kristu, kpa kwa ne Kristu er tahav mbu wasen un kua tsombor na jighilii! Peteru lu a tahav mbu una er ishu ia nyôr ken ukper ga, kpa Yesu er ishu iv ken ukper poo! Mciem gba Peteru iyol. A sen a gure inya a kaa ér: “Due hen mo kera, Tere, gadia mo m ngu or u isholibo je.” Ka nyi una er ve a tese ér un kuma u yan ijende a Or u a lu a ian i eren akaa sha tahav mbu Aôndo imba ne nahana?—Ôr Luka 5:6-9.

15. Yesu yange tese Peteru ér ityôkyaa ngi i una ta akperan shin una lu a mciem ga nena?

 ¹⁵ Yesu ôr a na sha imo i kundu kundu ér: “De cie ga, hii nyian je zan zan ken hemen kpaa ú mase kôron ior.” (Luka 5:10, 11) Ityôkyaa i cian shin tan akperan lu ga. Akperan a Peteru lu a mi sha kwagh u ishu-kôron la lu shami ga; ityôkyaa lu i ma lu a mciem sha kwagh u mbamshi nav man mbamyina nav kpaa ga. Yesu lu a zegetom u pasen ior kwagh, man lu tom u ua gema mlu u uumace ken hemen yô. Lu eren Aôndo u “[den] kwaghbo wuee” la tom. (Yes. 55:7) Lu u Yehova una nenge sha ugbayol mba Peteru mba sha iyol man mba ken jijingi cii.—Mat. 6:33.

16. Shighe u Yesu yila Peteru man Yakobu man Yohane ér ve dondo sha a na la, ve er nena, man kwagh u ve er la lu kwagh u hemban doon sha ci u nyi?

¹⁶ Fese je Peteru er kwagh u Yesu kaa un la, er Yakobu man Yohane  nahan. “Mba dugh a utso sha tar yô, ve undu akaa cii, ve dondo sha a Na.” (Luka 5:11) Peteru na Yesu jighjigh, kua Or u tindi Yesu la. Kwagh u Peteru er ne, lu kwagh u hemban doon cii. Nyian kpa, kape Mbakristu mba ve de mciem man akperan a tan ér vea er Aôndo tom la kpa ve lu tesen ér ve mba a jighjigh u nan je la. Aluer se mba suur sha Yehova nahan yô, mayange una va se ahenge ga.—Ps. 22:4, 5.

17. Er Peteru zua a Yesu anyom kar ahar la, alaghga lu henen sha akaa er nyi nahana?

¹⁷ Er se vande teren sha mhii u ityough kin nahan, Peteru yange zua a Yesu anyom nga kar er ahar nahan yô, a naha tso ken Zegemnger u Galilia hen tugh mbu ahumbe a taver lu hiar yô. Se fatyô u fan akaa a yange lu henen sha mi hen shighe la ga. Kpa akaa lu kpishi a alaghga lu henen sha mi yô! Yesu bee ngô na kem angev. A tese ior sha uwo kpaa. Shi a tese kwa kimbir kimbir ken ityesen na man ityom na i ageegh la ér ka wen un lu Mesiya u Yehova a Tsough la ye. Iwer ngi kar yô, Peteru pande de mciem man akperan a tan. Shi Yesu tsua un ér a lu môm ken mbaapostoli mba 12 mbara je kpaa! Kpa Peteru lu a de mciem kua akperan a tan kpum kpum ga. Lu u ica a gba ga tsô una kav er un lu cian kwagh shi tan akperan her yô.

18, 19. (a) Pase kwagh u Peteru nenge a mi shin Zegemnger u Galilia la yô. (b) Yesu yange lumun ér Peteru a er kwagh u soo la nena?

¹⁸ Ka va kom er ahwa atar a sha use nahan yô, Peteru gba den tso u nahan kpoo tsô, hide tema sha. A nenge kwagh lu zenden sha agôndoamnger van! Lu uwer ta ve iwanger kôr sha agôndoamnger lu muenem ye shinii? Ei, kwagh la lu sha nômbôôr di yum, shi lu daase kpaa ga. Lu or! Lu or jim jim, man nan lu zenden sha kwavmnger! Er or la nan lu mgbôghom la, lu inja er nan ngu va karen ikyua a ve nahan. Cier mbahenen iyol, ve lu henen ér ka ormbakuv. Or la maa kende kaa ér: “Taver nen ishima, ka Mo, de kera cie nen ga.” Or la lu Yesu!—Mat. 14:25-28.

¹⁹ Peteru gema kaa a Yesu ér: “Tere, a lu We yô, kaam, m va her a We sha kwavmnger.” Yange ôr Kwagh ne sha ishimataver. Er ivande i kpilighyol ne na ishima hingir Peteru lenge lenge yô, a soo u eren kwagh u una seer taver jighjigh na u nan yô. A soo ér una zende sha kwavmnger er Yesu nahan. Yesu kaa a Peteru ér a zende a va. Peteru unde sha kur tsoo maa hungwa shin zegemnger u lu kpianger la. Hen er yange a lu Peteru ken ishima shighe u haa angahar sha kwavmnger ve mire ga la yô. Er lu zenden zan hen ape Yesu lu la, yange a kpiligh un iyol kpishi. Nahan kpa, ica gba ga tsô kwagh ugen shi er un.—Ôr Mateu 14:29.

20. (a) Lu nyi i na ve Peteru kera kenger sha Yesu jighilii ga? (b) Lu nyi Yesu ôr a Peteru sha u a hen kwagha?

²⁰ Yange gba u Peteru una kenger sha Yesu jighilii. Lu sha tahav mbu  Yehova Yesu er ivande ve Peteru fatyô u tilen sha kwavmnger ye. Yesu kpa er kwagh ne sha ci u jighjigh u Peteru na un la. Kpa kwagh ugen va dan Peteru. I kaa a vese ér: “Kpa nengen ahumbe nga taver yô, a cia.” Peteru nengen er agôndoamnger lu kpianger tan sha tso sha agee shi tsendan taveraa yô, cier un iyol. Alaghga tsô yange hen ér una mire shin zegemnger la, una saa. Er mciem gba un iyol yô, jighjigh na u nan gba panden. Or u ngise i na un iti ér Vande sha ci u i nenge ér una va lu or u tenger ga la, hii u miren er iwen nahan sha ci u jighjigh na u nan kera taver ga. Peteru fa u ôôn uwe tsembelee, kpa kera har sha mfe na la hen shighe ne ga. Tsô a genger imo a kaa ér: “Tere, yimam!” Yesu maa naregh uwegh kôr un, due a na sha. Nahan er ve lu sha kwavmnger her la je, Yesu ôr Peteru kwagh u vesen, sha u a hen kwagh yô, ér: “We u u lu a anjighjigh u nan kpeghee ne, ka nyi u te akperana?”—Mat. 14:30, 31.

21. Akperan a tan ka kwaghbo sha ci u nyi, man se er nan ve se bee a a ken a vese kera?

²¹ Mpin u Yesu pine ér ka nyi u “te akperana?” la ka u sha inja vough. Akperan a tan ka kwaghbo u kiriki ga. Aluer se mba tan akperan yô, aa vihi jighjigh wase shi aa na se hii u miren ken jijingi tegh tegh. Gba u se nôngo kwagh kpoghuloo ve se ta akperan ga ye! Se nôngo nena? Se er kwagh ne sha u veren ishima sha kwagh u a lu u vough yô. Aluer se mba henen sha akaa a tan se mciem iyol man a nan se iyolkpen man a danen se ishima sha kwagh u Yehova man Wan na yô, se lu tan akperan seer a seer. Aluer se ver ishima sha Yehova man Wan na kua sha kwagh u ve vande eren, man u ve lu eren hegen man u vea va er sha ci u mba ve soo kwagh ve la yô, se fatyô u been a akperan a tan, a aa fatyô u vihin jighjigh u nan wase la.

22. Doo u se lu a jighjigh u nan er Peteru nahan sha ci u nyi?

²² Yesu kar vea Peteru mba za nyer shin tso yô, ijeverahumbe maa mem. Zegemnger u Galilia cii huan. Tsô Peteru man mbahenen mbagenev gba kaan ér: “Mimi je U ngu Wan u Aôndo.” (Mat. 14:33) Peteru yange una wuese kwagh la je ka u henen a hen ga. Yange fa er una kera de ér mciem ma na una hingir u tan akperan sha kwagh u Yehova man Yesu ga yô. Sha mimi yô, yange gba u una nôngo kwagh kpoghuloo cii ve una mase hingir Orkristu u lun er vande nahan, u Yesu tsenga fan ér una va lu la ye. Kpa kange ishima ér una za hemen u nôngon kwagh shi seer taver jighjigh na u nan. U kange ishima er un nahan kpa? U er nahan yô, u kav er i doo u se lu a jighjigh u nan er Peteru nahan yô.