Shighe u zurum u Mbaiserael vea nyôr ken Tar u Ityendezwa la, Aôndo tôndo zwa ér una kura ve sha ‘iangev mbi bov’ mbi ior gbaan ken Igipiti la. Kwagh ne kuma er anyom 3,500 nahan ken ijime. (Duteronomi 7:15) Gbenda môm u er kwagh ne yô, lu sha u wan ve kwagh vighe vighe sha gbenda u vea palegh iangev shi vea luun tsembelee yô. Ikyav i tesen yô:

•   Atindi a wa ikyurior ne la kaa ér ve ôôn iyol shi ve kiren akondo.—Levitiku 15:4-27.

•   Sha kwagh u akôngo yô, Aôndo kaa ér: “Ver ijiir ken akôngoafogh i zan her, wa tôgh ken ikyav you, zum u ú za ken akôngo yô, time, gema cir akôngo ou.”—Duteronomi 23:12, 13.

•   Yange a nenge ér or ngu a angev mbu mbua fatyô u tsaren ior mbagen yô, i pav nan i ver kposo a ior mbagen shighe a wa karen. Angev mbura mbua been yô, i gba u nana ôô iyol shi nana kire akondo a nan sha mnger sha er nana lu “wang” yô; yange i gba u nana er nahan cii ve nana hide a va kohol ior ken afo ye.—Levitiku 14:8, 9.

•   Yange or a bende a orkpen yô, i pav nan i ver kposo a ior mbagen.—Levitiku 5:2, 3; Numeri 19:16.

 Atindi a Aôndo wa Mbaiserael la tese akaa a sha kwagh u mlu u wang a mbatwerev kpa va lumun a mi yô; kpa atindi la gema tese kwagh ne ica gba.

 Sha ajiir agen di yô, ior wa ihyôngor ishar de. Ikyav i tesen yô:

•   Yange ior ve za akôngo sha ugodobi. Shi mngerem ma lun côu côu kua kwaghyan u saan ishe man ihyôghonough mbigen kpaa mbi na yô, haregh shon cii a hingir côu côu, nahan ior ve gba iangev kpishi shi anikyundanev kpa ve kpe.

•   Mbatwerev mba sha ayange la fa kwagh môm sha kwagh u mbaanyigôr kua ankaam mba umav mba nan angev mbagen ga. Mbaigipiti yange ve er “icigh” ve wa awambe a avange kua ambi a inyon man ihyev i kpen man mnyandem kua bredi u tan kuruku. Shi yange vea eren twer yô, ve er tom a ambi a ior kua a zendenya keng je.

•   Mngerem ma Ifi u Nil ma lun côu côu kua mbaakpa mba kesen mngerem urun ishule yange ve na Mbaigipiti ve zua a iangev kpishi. Shi anikyundanev mba ken Igipiti yange ve kpe akôngo a haan kua iangev mbigen mbi i tôôn sha kwaghyan u saan ishe yô.

 Kpa Mbaiserael yô, yange ve zua a mtsera sha u dondon Atindi a Aôndo wa ve la, shi ve gbaan iangev dang dang er ior mbagen nahan ga.