SHA ashie a i ngeren Bibilo la, orkuranya nan nengen sha ya man ior man ikyav mbi orvesen u nan. Ashie agen yange i er tom a ishember i ken zwa Heberu man zwa Grika i i gem ér “orkuran” la shie u i lu ôron kwagh u or u a nengen sha ya yô.

Shie u Yosev wan u Yakob lu kpan ken Igipiti la, yange hingir orkuran u nengen sha ya u orvesen na. Jim je yô, orvesen na u lu Origipiti la gema ‘akaa a a lu a mi cii a wa Yosev sha ikyev.’ (Gen. 39:2-6) Shie va karen yô, Yosev iyol na kpa hingir orhemen u lun a tahav ken Igipiti, nahan a ver wanakiriki shin orkuranya u nengen un sha ya.—Gen. 44:4.

Shie u Yesu lu shin tar la, mba lun a ishule ve lu ken gar, ishule ve di i gema i lu ken ikyôngo. Nahan mba lun a ishule mban yange ve ver mbakuran ér ve nengen sha hanma kwagh u mbatomov ve lu eren ken ityev cii.

Nahan ka an yange nan kuma u a ver nan ér nana lu orkurana? Orroma ugen u ngeren akaa u sha ayange a mbaapostoli la, mba yer iti na ér Columella. Yange wa kwagh nahan ér, “doo u wanakiriki nana lu or u nan [vande] fan kwagh u tom tsembelee yô.” Gba u a lu or u nan lu a “aeren a nana fatyô u nengen sha mbatomov sha gbenda u vea er tom kpoghuloo, kpa a gema a lu sha tswam ga yô.” Or ne shi kaa ér: “Kwagh u hemban cii yô, yange i gba u a lu or u nengen ér nan fa nan bee ga, shi a lu or u ka nan kegh iyol u henen kwagh u he yô.”

Mkaanem ma Aôndo er tom a ikyav i orkuranya kua tom u yange nan eren la sha u ôron kwagh u ityom igen i i eren ken tiônnongo u Kristu yô. Ikyav i tesen yô, apostoli Peteru yange taver Mbakristu ishima ér ve eren tom a uiyua shin mfe u Aôndo a ne ve la. A kaa ér ve ‘eren tom u wasen hanma ve a iyua i i ne ve la, sha ci u mba mba̱ nengen sha ya mba̱ fan kwagh. Gadia i tese ve erdoo u sha mhôôn u Aôndo.’—1 Pet. 4:10.

Yesu iyolna kpa yange er tom a ikyav i orkuranya la, zum u lu ôron injakwagh i ken Luka 16:1-8 la. Heela tseegh ga, Yesu yange ngur ôron kwaghôron u profeti u ikyav i m-ande na, zum a ver un tor la yô, a kaa a mbadondon un ér una tsua “wanakiriki u jighjigh man u fan kwagh,” shin “or u nengen sha ya, u jighjigh.” Tom u or u nengen sha ya la jighilii yô, a lu u nan mbadondon Kristu kwaghyan u ken jijingi u kwagh a gbe ve a mi la sha shie u mkur. (Mat. 24:45-47; Luka 12:42) Doo se kpishi er se lu ken atô u ior mba ve lu zuan a ityakerada i orkuranya u jighjigh a gberen shi a samber a mi tar sha won cii la yô.