Bibilo ôr akaa kpishi a yange er nomso man kasev mba ishima za ve iyol sha akaa kposo kposo yô. Aluer se mba ôron kwagh ve ken Bibilo yô, se fatyô u zuan a or ken a ve u yange lu nan ken ishima er se nahan yô.

Se cii ka se soo ser mbagenev ve kav er i lu se ken ishima la, hemban je yô shighe u se lu nôngon a mbamzeyol mba ken ishima yô. Aluer se mba ôron akaa a yange er ior mba i nger kwagh ve ken Bibilo la yô, se fatyô u zuan a or ken a ve, u mhen shin mnenge u yange nan lu a mi la a zough sha u wase yô. Kwagh ne una wase se u nengen er mbagenev kpa yange ve ya ican er se nahan, shi zum u ishima lu nyian ve kpa ve nenge ér mba tswen ga yô.

• Bibilo ter mkaanem ma ior kpishi ôr shighe u ve nenge ér kwagh hemba ve shi ishima nyian ve kpishi yô. I lu nahan u kaa wer, ‘Guda ma m kpe kera’ vee? Mose yange ôr imbakwagh la, shi Eliya kua Davidi kpa ôr imbakwagh la.—Numeri 11:14; 1 Utor 19:4; Pasalmi 55:4.

• Bibilo ôr se kwagh u kwase ugen, iti na ér Hana. Yange “ishima lu vihin” un kpishi sha ci u mar wan ga, shi wuhe na lu bamen un sha kwagh shon kpoghuloo.—1 Samuel 1:6, 10.

• Bibilo shi ôr se kwagh u orgen kpaa, iti na ér Yobu. Alaghga zayol u Yobu tagher a mi la una zua sha u wase. Shin er Yobu na Yehova Aôndo jighjigh taveraa nahan kpa, yange ya ican ken ishima kpishi, je yô ôr kwagen la ér: “Uma wam ndôhôr mo ishima; kera kam ka lun uma zan zan ga.”—Yobu 7:16.

Aluer se fa er ior mba Bibilo i ôr kwagh ve ne yange ve er ve, ve de u henen kwagh sha gbenda u vough ga la yô, se kpa se fatyô u zuan a agee a nôngon a mbamzeyol asev.