Bibilo Ka I Tese Se Kwagh u Una Wase Se Yô
Aluer se mba eren kwagh er se nenge i doo se la shin se mba eren kwagh sha mbamhen mba iorov tseegh yô, ashighe agen kwagh shon una kure a doo ga. Bibilo ôr se ityôkyaa i i ne ve kwagh a lu nahan yô, shi i seer tan se iwanger sha kwagh ne kpaa. I̱ wase se u fan kwagh u a lu u shami man u a lu u shami ga la, man ka sea fa akaa ne nahan yô, i saan se iyol.
GBA U AÔNDO UNA HEMEN SE
Yehova a Aôndo pase se ken Mkaanem nam er i gbe u uumace vea dondon hemen na, a lu mbamnenge vev ga yô. (Yeremia 10:23) Ka nahan ve a ne i nger akaa a aa fatyô u wasen se u fan kwagh u a lu u shami man u shami ga la ken Mkaanem nam ye. Uumace doo un ishima nahan a soo ér se tsua kwagh u una va se a zayol shin una na uma a taver se ga yô. (Duteronomi 5:29; 1 Yohane 4:8) Heela tseegh ga, er i lu un a gbe se yô, ngu a kwaghfan man mfe u tesen se kwagh u a hembe doon yô. (Pasalmi 100:3; 104:24) Nahan kpa, Aôndo kighir ior ér ve dondo igbenda na ga.
Yehova yange na Adam vea Ifa, uumace mba hiihii mbara, hanma kwagh u gba u vea lu a mi ve, a saan ve iyol la cii. (Genese 1:28, 29; 2:8, 15) Shi yange wa ve atindi a taver ga, a yange ver ishima ér ve dondo yô. Nahan kpa, yange na ve ian i dondon atindi la shin dondon a ga. (Genese 2:9, 16, 17) Kpa kwagh er vihi yô, Adam vea Ifa tsua u eren ishima ve kera lu u dondon atindi a Yehova ga. (Genese 3:6) Ka nyi i due ken ieren ve nee? Ior ka vea eren kwagh er ve nenge i doo ve la nahan ka saan ve iyol je kpa? Mayange ga cii. Akaa a a ndera eren ior hii sha ayange a ngise zan zan nyian la tese ér, ior ka vea venda atindi a Aôndo yô ve kanshio u zuan a bem man msaanyol u mimi la.—Orpasenkwagh 8:9.
Hanma tar u se lu cii kpa, Bibilo ngi a akaawan a aa wase se u tsuan akaa sha inja yô. (2 Timoteu 3:16, 17; nenge ngeren u kiriki u a lu itinekwagh ér, “ Takeda u Ior Cii” la.) Nenge ase gbenda u Bibilo ka i er kwagh ne yô.
Seer fan ityôkyaa i i ne ve a fatyô u kaan ér Bibilo “ka mkaanem ma Aôndo” yô.—1 Mbatesalonika 2:13. Za sha jw.org/tiv za nenge vidio i i lu a itinekwagh ér, Ka An Nan lu Orngeren Bibilo? la.
BIBILO ÔR SE KWAGH U AÔNDO A SOO ÉR SE ER YÔ
Sha hiihii la je, Bibilo ôr se gbenda u Aôndo yange eren kwagh a uumace yô. Akaa a i nger ken Bibilo la wase se u fan akaa a Aôndo a nenge ér ka a shami man a shami ga la, man akaa a wasen se kua akaa a aa fatyô u bulan se la kpaa. (Pasalmi 19:7, 11) Akaa a se henen ken Bibilo la, nga wasen se u eren kwagh u vough ken uma wase ayange ayange.
Ikyav i tesen yô, nenge ase kwaghwan u a lu ken Anzaakaa 13:20 ne, a kaa ér: “Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.” Nyian kpa, kwaghwan la ngu a inja di vough er sha ayange a tsuaa la kpa lu nahan. Bibilo ngi a akaawan a injaa kpishi a wasen se.—Nenge ngeren u kiriki u a lu a itinekwagh ér “ Kwaghfan u Bibilo u a Lu a Inja Hanma Shighe La.”
Kpa alaghga u pine wer, ‘A er nan ve me fa mer akaawan a Bibilo la nga a inja nyiana?’ Ngeren u a dondo ne una time sha akaa a a er kpôô kpôô yô.
a Yehova ka iti i Aôndo kpôô kpôô.—Ekesodu 6:3.
