UNENGE wer u ngu Orkristu? Wea nenge nahan yô, u ngu môm ken iorov mba hemban biliôn uhar sha tar mba ve kaan ér ve mba mbadondon Kristu yô. Ingyegh kin tese ér hanma ijiir i iorov 3 ve lu cii, u môm ker ka i nôngo u lun or u nan senge ér nan ngu ordondon Kristu yô. Nyian ne, iniongo i kwaghaôndo i i yer ér Mbakristu la ngi udubu imôngo, nahan kpa ve pav ker sha ci u atesen a ve kua mbamnenge vev zua ga. Nahan alaghga we kpa akaa a u ne jighjigh a mi la aa kaha kposo a ior mbagenev mba ve kpa ve kaan ér ve mba Mbakristu la. Mimi je, kwagh gba sha kwagh u u ne jighjigh a mi laa? Een, kwagh gba sha mi, aluer u soo u dondon ityesen i kwaghaôndo u Mbakristu, i Bibilo i tese jim jim la yô.

Lu mbadondon Yesu Kristu mba sha ayange a mbaapostoli la yange i va hingir u yilan ve ér “Mbakristu” ye. (Aerenakaa 11:26) Yange ityôkyaa lu i yilan ve sha ati agen ga, sha ci u kwaghaôndo u Mbakristu lu môm tseegh. Mbakristu lu dondon atesen man akaawan a Yesu Kristu, u yange hii kwaghaôndo u Mbakristu la. Côôci you la di ye? U na jighjigh wer ngi tesen akaa a Kristu yange tese kua akaa a mbadondon Kristu mba sha ayange a mbaapostoli mbara na jighjigh a mi  laa? U er nan ve u fa wer mimi je ka nahana? Gbenda ngu môm tseegh. Ka u tôôn akaa a côôci you i tesen la karen sha kwagh u Bibilo i tese yô.

Hen sha kwagh ne: Yesu yange naan Ruamabera icivir ér ka Mkaanem ma Aôndo. Yange lumun a ior mba ve undu ityesen i Bibilo, ve hemba veren ishima u tesen aeren a ior la ga. (Marku 7:9-13) Sha nahan yô, se fatyô u kaan wang nahan ser mbadondon Yesu mba mimi mbara yange ve na jighjigh a akaa a Bibilo i tese la tseegh. Nahan yô, hanma Orkristu nana pine iyol i nan ér, ‘Ityesen i côôci yam zua sha i Bibilo kpa?’ Cii man u na mlumun sha mpin la yô, er nan u tee ityesen i côôci you la u kar sha kwagh u Bibilo i tese jim jim la ga?

Yesu yange kaa ér gba u se civir Aôndo sha mimi, ka mimi u Bibilo je la. (Yohane 4:24; 17:17) Shi apostoli Paulu kaa ér saa se zua a ‘mfe u mimi la’ ve se war ye. (1 Timoteu 2:4) Sha nahan yô, gba hange hange u akaa a se ne jighjigh a mi la cii, a lu akaa a mimi a a dugh ken Bibilo jighilii yô. Gadia nenge, se er beer myom una kar se!

Se mba taver we ishima ser ôr mbampin ataratar mba ve dondo shin heen ne, nahan nenge mbamlumun mba Bibilo i ne la. Bugh avur a Bibilo a i tese la ôr, shi gbidye kwar sha mbamlumun mbara. Maa pine iyol you wer, ‘Atesen a côôci yam zua sha kwagh u Bibilo i kaa ne kpa?’

An-ikyaren u tiônôô ne una wase u u karen atesen a côôci you sha Bibilo. Dugh mbampin mban sha yô, u soo u karen atesen a côôci you agen kpaa sha kwagh u Bibilo i kaa yôô? A doo Mbashiada mba Yehova u wasen we u tôvon sha akaa a mimi a Bibilo i tese wang la yô. Er nan u lam a Orshiada u Yehova wer nan hen Bibilo a we gbilin ga? Gayô, za sha Intanet hen ijiir yase i jw.org/tiv la.