Shighe ugen la, Yesu due ken won u tar u Iserael, za hen tiôntar u Mbaroma u wa ndor a Iserael, u i yilan ér Shiria la, nahan kwase u ken Mbagrika ugen va kohol un ér a wase un. Kpa Yesu ôr un kwagh sha injakwagh. Ken injakwagh shon la, Yesu tôô mba ve lu Mbayuda ga la kar sha “aniwaav.” Tindi u Mose la tese ér iwa kpa ngi ken ishôso shin inyam i i lu wang ga yô. (Levitiku 11:27) Kpa kwagh ne tese ér Yesu lu tuhwan a tuhwa kwase u ken Mbagrika ne kua mbagenev mba ve lu Mbayuda ga yôô?

Mayange ga. Kwagh u Yesu lu ôron jighilii yô ér, lu Mbayuda tseegh gba u una hemba veren ishima u wasen ve hen shighe la ye, vough er vande pasen mbahenen nav nahan. Sha nahan yô, a pase kwase u ken Mbagrika la kwagh ne sha injakwagh, ér: “Doo u tôôn kwaghyan u uôn, kenden aniwaav ga.” (Mateu 15:21-26; Marku 7:26) Iwa yange lu kwagh u doo Mbagrika man Mbaromanu ishima shi ve hemban lun a mi hen ya, shi ônov vev kpa numben a mi yô. Sha nahan yô, ishember i “aniwaav” la yange ia umbur kwase la gbenda u kundu kundu u yange i eren a aniwaav mba ken ya u Mbagrika la. Kwase u ken Mbagrika la yange zua a kwagh u Yesu lu ôron la, nahan gema kaa a na ér: “Een, Tere, aniwaav kpaa mba ye avur a akaayan a sha tebur u uter vev a a hee inya la.” Yesu yange wuese jighjigh u nan u kwase la shi bee wan na u kwase la kpa angev.—Mateu 15:27,28.

Tso u yange tôô Paulu lu yemen a mi ken tar u Italia la yange tagher ishigh a ahumbe a vihin. Nahan shighe u ve za tile hen ijiir igen la, apostoli ne wa mbatsoov kwagh ér ve tamber shighe a kar cii man a mase zan hemen a zende la ye. (Aerenakaa 27:9-12) Kwagh ngu u yange na ve apostoli ne wa ve kwagh nahan yô.

Mbatsoov mba sha ayange a tsuaa la fa dedoo er zende yange u lu ican kpishi shin zegemnger u Mediterenia la sha shighe u wangernyom yô. Hii ken atô u Novemba zan zan va ken atô u Maaci cii yange i nengen ér ka shighe u a doo u zan zende ken mnger ga yô. Kpa zende u Paulu lu ôron ne, lu u ken Setemba shin Oktoba. Orromanu ugen, Vegetius, u lu sha shighe u Yesu kpe anyom kar hemba deri utar la, pase kwagh u zende u shin zegemnger ne, ken takerada na u Epitome of Military Science la ér: “Iwer igen ka i doo zende kpishi, kpa igen ka i lu u a hen a hen, igen di yô, ka i lu kwagh u zan ga.” Vegetius kaa wener hii ken Mei 27 zan zan Setemba 14 cii yange i doo u zan zende shin tso, kpa ashighe ahar agen a yange i lu u a hen a hen, shin a doo u zan ga yô, ka hii Setemba 15 zan zan kighir Novemba 11, kua hii Maaci 11 zan zan kighir Mei 26. Er Paulu lu or u zenden kpishi yô, yange una fa ashighe ne keng je. Shi or u kôôm tso kua or u tsoo la kpa yange vea lan ashighe ne ga, kpa ve wa kwaghwan u Paulu la ikyo ga. Nahan tso za ur a ve ken zende ne.—Aerenakaa 27:13-44.