Mayange De Te Mbananjighjigh a We Imôngo Kera Ga

ANMGBIAN ugen u i yer un ér Jarosław vea kwase na Beata yô kaa ér: “Akaa a kpenga u tar ka u va or a mi la yange dan se asema anyom pue je, shi se lu a inyaregh ngôgh. Shin er i yese se ken mimi nahan kpa, se tsume se yem ica gande, nahan se kera lu a tahav mbu hiden ga.” *

Anmgbian ugen di mba yer un ér Marek, a kaa ér: “Mbamgem mba sha kwagh u patii man kwagh u taregh ken tar u Poland yange na yô, i dem tom. M kera fa kwagh u me er ga. Yange m lu cian u hiin kômpeni wam sha ci u m lu a mfe sha kwagh u kpenga ga. Ken masejime yô, kendem ken ishima u hiin kpenga wam, m lu henen mer kwagh ne una wasem u kuren mbamgbe mba tsombor wam, shi akaa a ken jijingi kpa me eren her vough vough. Shighe kar yô, m mase kaven er mhen wam ne lu u shami ga yô.”

Ken tar u uma a lu taver seer a seer shi ingyegh ki ior mba lun a tom ga kpa i lu seer a seer ne, ishima ka i nyian mbagenev kpishi, nahan ve er akaa sha kwaghfan ga. Anmgbianev mbagenev seer shighe ve u eren tom la shin ve ker tom ugen ve seer sha tom u ve vande lun a mi la, gayô ve hii kpenga ve, shin er ve lu a mfe sha kwagh u kpenga la ga nahan kpaa. Ka ve tôô ér aluer ve seer zuan a inyaregh yô, a wase tsombor ve, shi ikyar i ve ye a Yehova la kpa ia lu her dông. Nahan kpa, aikyôr man mlu u inyar u a gem hanma shighe la, una fatyô u vihin mbaawashima mba dedoo mba or nan lu a mi la je kpaa. Kwagh ne na yô,  mbagenev gba ken hua u eren shi ve tume ityough u keren akaa a yolough, nahan kwagh la bende a mcivir ve.—Orpa. 9:11, 12.

Anmgbianev mbagenev tume ityough zendan akaa a taregh, nahan kera mba a shighe u henen kwagh sha tseeneke ve shin zan mbamkombo shin duen kwaghpasen kpaa ga. Ikyav tese wang ér imba ikyo i ve we ga ne ka i vihi ikyaryan ve vea Yehova. Shi alaghga ikyar i ve ye a mbagenev la kpa vea ta i kera, ka mlu ve u kôôsôô vea “mbananjighjigh” je la. (Gal. 6:10) Ieren ne ka i za a mbagenev tegh tegh maa ve va hingir u undun mzough u anmgbianev mba ken Kristu la. Time ase sha kwagh ne zulee.

Kwagh u I Gbe u Se Er sha ci u Mbananjighjigh a Vese Imôngo Yô

Er se lu anmgbianev mba nomso man mba kasev yô, se mba a aan kpishi a tesen ayol a ase dooshima. (Rom. 13:8) A shi nan kpa, u nenge a ‘atsanaior’ ken tiônnongo wou ‘a a vaan ér i̱ wase a yô.’ (Yobu 29:12) Alaghga mbagenev vea ban a akaa a hange hange a kwagh a gbe ve sha mi la. Apostoli Yohane umbur se er se lu a ian i wasen ve yô. A kaa ér: “Or u nan lu a akaa a taregh man nan gem nan nenge anmgbian u nan ken ibanave man nan zungu nan mhôônom ga yô, dooshima u Aôndo ngu lun ken a nan nana?”—1 Yoh. 3:17.

Alaghga u vande eren kwagh sha u kuren mbamgbe mbara, shi u na mbagenev iwasen mgbeghaa kpaa. Nahan kpa, gba u kwagh u anmgbianev asev mba se lu ken mzough a ve la una gba se ishima sha u nan ve iwasen i sha iyol tseegh ga. Alaghga mbagenev vea soo ér i wase ve sha ci u mtswenem kôr ve shin ishima yina ve. Alaghga a lu ve er ve kera kuma u civir Yehova ga nahan, shin vea lu yan ican a angev mbu vesen shin ma or u doon ve ishima nan kpe. Gbenda môm u se taver ve ishima yô, ka u keghen ato a ve shi lamen a ve, nahan tesen ser se kav akaa a a lu zan ve iyol ken ishima la, shi wasen ve u yan ikyar a Yehova dông kpaa. (1 Tes. 5:14) Ashighe kpishi kwagh ne ka a na ikyar i se ye vea anmgbianev asev kôôsôô la i hemba taver cii.

Alaghga mbatamen mba ken tiônnongo vea hemba lun sha ian i keghen ato a anmgbianev sha mhôôn shi eren kwagh a ve kundu kundu shi wan ve kwagh ken Ruamabera sha dooshima. (Aer. 20:28) Mbakuran vea er nahan yô, vea lu kaven apostoli Paulu, u kwagh u anmgbianev nav mba nomso man mba kasev mba ken jijingi yange ‘sar un yum’ la.—1 Tes. 2:7, 8.

Nahan kpa, aluer Orkristu tsume undu ikyumuile yô, shi nana fatyô u kuren tom u nan lu a mi u eren sha ci u mbananjighjigh a nan imôngo la je he? Mbakuran je kpa, ve gande u gban ken imeen i zendan uyôughyôughmbaakaav la ga. Kpa aluer Orkristu gba ken imeen la di ye?

Ishimanyian ia Na Se Vôr ken Jijingi

Er se vande teren nahan, ka sea uve ityough u nôngon ser se kure mbamgbe mba tsombor wase mba hange hange mbara yô, ashighe kpishi kwagh ne a na se ishimanyian, nahan akaa a ken jijingi a kera gba se kwagh yum ga. (Mat. 13:22)  Marek u se vande ôron kwagh na la pase wener: “Yange kpenga wam ngu gbe yô, m za ker tom u van mo a inyaregh kpishi ken tar u ken won. M yem m za tsa iwer itiar, shi m tsa iwer itiar igen, nahan zan zan, m vaan ken ya ashighe kpuaa tseegh, shi mea va kpa m tsa ga tsô shi m hide m yem. Kwase wam u lu Orshiada ga la lu yan ican ken ishima sha ci u kwagh ne.”

Lu uma u hen tsombor tseegh lu a zayol ga. Marek shi kaa ér: “Dugh tom u eren shighe gôgônan ken oo u tan gyaang la kera yô, yange m luun vea ior mba lamen dang, mba ve keren u yan mtsera sha mbagenev yô. Ve eren kwagh er ka mbatswamev mba eren afer nahan. Yange m ure shi lum er mba nzughul mo nahan. Er m kera lu a shighe u nengen sha iyol yam tsô kpaa ga yô, m gba nengen mer m kera kuma u eren tom sha ci u mbagenev ga.”

Doo u kwagh u vihin u yange due ken kwagh u Marek tsua u eren la una mgbegha se u hiden henen a ishima. Aluer ka inja er u̱ yemen ken tar u ken won la una wase se u sôron uzayol mba sha kwagh u inyar je kpa, kwagh la una gema a va a uzayol mbagenev ga he? U tesen ikyav yô, er se kera lu her ga yô shi se fatyô nengen sha akaa a zan tsombor wase iyol ken ishima la kpa, man ikyaryan ve vea Yehova yô ia lu nena? Aluer se yem nahan, kwagh la una na se undu tiônnongo? Una na se kera lu a ian i civirigh i eren tom sha ci u mbananjighjigh a vese imôngo la gaa?—1 Tim. 3:2-5.

Nahan kpa, er alaghga u fa nahan, saa or a undu tar u nan, nana za eren tom ken tar u ken won keng ve nana uve ityough ken tom u nan ga. Time ase sha kwagh u Jarosław vea Beata la. Jarosław kaa ér: “Yange hii di bee be bee nahan. Er se sember eren ivese yô, se bugh anijiir u teen bredi u lun a inyam ker hen ijiir i dedoo. Er se lu zuan a liba kpishi yô, se gbanger a kpenga wase ne. Kpa, se lu a shighe cuku tseegh, nahan se bunden mbamkombo. Ica gba ga tsô, maa m de u eren tom pania kua tom u diakon. Er girim se iyol sha ci u mtsera u se lu zuan a mi la yô, se bugh zege shôôpu shi se kohol or u nan jighjigh ga ugen, se lu eren kpenga imôngo. Ica gba ga je, maa m gema yemen ken won za eren kpenga u kuman inyaregh udola umiliôn imôngo. M faan lun hen ya ga, nahan ikyaryan yam a kwase wam man wan wam u kwase lu vihin seer a seer. Ken masejime yô, kpenga wase u ú lu yeghen a yegh ne na se gba mnyam ken jijingi. Er se undu tiônnongo yô, se kera henen kwagh u anmgbianev mba kasev man mba nomso cuku kpaa ga.”

Kwagh ne tese se nyi? Isharen i nôngon ser se tema i kpe se iyol la ia hingir kwaghhônon hen Orkristu, nahan nana haa iyol inya, je yô, nana kera kura “riga u nan,” u a lu ikyav i tesen ér nan ngu Orkristu la ga. (Mpa. 16:15) Kwagh la una pav se a anmgbianev mba ngise se lu sha ian i wasen ve la.

Time sha Mlu Wou sha Mimi

Alaghga se lu henen ser, ‘Imba kwagh la nahan ia erem ga.’ Nahan kpa, doo u se cii se time vighe vighe se fa kwagh u kwagh a gbe se a mi ken uma jim jim la. Apostoli Paulu yange nger ér: “Se nyôr ken tar ne a ma kwagh môm ga, u duen yemen a kwagh kpaa se fatyô ga. Kpa aluer sea lu a kwaghyan man akondo yô, i̱ kuma se.” (1 Tim. 6:7, 8) Ka mimi, hanma tar yô, mlu u uma u ker la kaha a u ken tar ugen. Alaghga kwagh u or a lu a mi ken ityar i í lu a inyaregh ve nana kaa ér nan ngu nôngon a nôngo a uma la, ken ityar igen kpishi, a nenge nan ér nan ngu yan tar.

Aluer uma ngu hen ape se lu la nan nan kpa, doo u se hen sha mkaanem ma Paulu man, ma kaa ér: “Mba i sar ve pe lun mbanyarev yô, ka ve gba ken imeen man ken to u hônon man ken asaren kposo kposo a gbilinigh man a vihin. Ka a mire a ior ken mtim man ken msaaishe.” (1 Tim. 6:9) Ka i yer hôn sha er inyam i i hen i la ia nenge a mi ga yô. Ka i er un sha er una kôr inyam gaegh yô. Se er nan ve se palegh u gban ken ‘asaren a gbilinigh’?

Aluer kwagh gba se sha akaa a a hembe lun hange hange la yô, kwagh la una mgbegha se u seer keren shighe sha ci u akaa a Tartor, kua kwaghhenen u sha tseeneke wase la. U eren msen henen kwagh nahan ne una wase Orkristu ‘nana kuma nana lu a agoyol’ u wasen mbagenev.—2 Tim. 2:15; 3:17.

Yange mbatamen mba lun a dooshima er tom  sha u taver Jarosław ishima shi maan un ken jijingi ken atô u anyom kpuaa. Kwagh la mgbegha un u geman uma na sha gbenda u vesen kpishi. A kaa ér: “Sha shighe ugen la, mbatamen wam kwagh kpoghuloo, ve ôrom kwagh u wanyekwaor u lu ornyar, u Ruamabera a er kwagh na, u soo u zuan a uma u tsôron, kpa gema kegh iyol u undun akaa na ga la. Maa ve goom a kwaghôron la sha kwaghfan sha u mo m nenge aluer kwagh la zua sha uma wam yô. Kwagh la wasem u fan kwagh u gba u me sôr ken uma wam jim jim la!”—Anz. 11:28; Mar. 10:17-22.

Jaroslaw time sha mlu na sha mimi, nahan tsua ér una kera nyôr iyol ken zege-kpenga ga. Un vea tsombor na ve hide ve ya ikyar a Yehova ken atô u anyom ahar. Hegen ngu ortamen, ngu eren tom sha ci u anmgbianev nav. Jarosław kaa ér: “Anmgbianev ka vea uve ityough ken kpenga je vea kera wa ikyo sha mlu ve u ken jijingi la ga yô, m ôr ve kwagh u uma wam sha u tesen ve er i lu ibumekwagh u se za lun ken mzough u kpeegh sha igbur i môm a mbananjighjigh ga yô. Ka zange u vendan ityom i or a zuan a inyaregh sha mi kpishi la ga, shi ka zange u palegh anyighe ga.”—2 Kor. 6:14.

Marek kpa, yange hen kwagh sha kwagh u vihin u er un yô. Shin er tom u ken tar u ken won, u i kimbin un inyaregh kpishi la wase tsombor na u kuren mbamgbe vev mba sha kwagh u inyar nahan kpa, mlu na vea Yehova man anmgbianev nav kera doo ga. Shighe kar yô, a hide a ver ishima sha akaa a a hembe lun a inja la. A kaa ér: “Ken anyom a a kar ne, kwagh wam lu er kwagh u Baruki u sha ayange a tsuaa, u ‘lu keren akaa a vesen sha ci na’ la nahan. Ken masejime yô, m pase Yehova ishima yam, m ôr un ishimanyian yam, nahan hegen m nenge mer m hide m taver ken jijingi.” (Yer. 45:1-5) Hegen Marek ngu keren “tom u dedoo,” u lun orkuran ken tiônnongo.—1 Tim. 3:1.

Marek wa mba alaghga vea soo u yemen ken tar ugen za keren tom u a hemban kimbin ve inyaregh la kwagh ér: “Shighe u ú lu ken tar ugen la, ka i lu ican ga u gban ken uhôn mba botar ne. U̱ fan zwa u hen ijiir la tsembelee ga la, ka a na i lu ican u lamen a mbagenev. Alaghga u hide hen ya a inyaregh, kpa u tôndo avav a ken jijingi kpa kpishi, aa shighe a kar gôgônan cii ve aa bee yô.”

Aluer se mba eren tom u uke sha gbenda u ua na se kende tom u se lu a mi u eren sha ci u anmgbianev asev la ga yô, a doo Yehova a vese. Shi se fatyô u veren ikyav i dedoo i alaghga ia mgbegha mbagenev u tsuan akaa a ve soo u eren la sha kwaghfan yô. Gba u anmgbianev mba nomso man mba kasev vea ver mba ve ver ken jijingi la ikyav i dedoo shi vea sue ve shi vea eren kwagh a ve sha mhôôn kpaa. Mbatamen mba ken tiônnongo man anmgbianev mba vian ken jijingi mbagenev vea fatyô u wasen mbananjighjigh a ve imôngo, u veren ishima sha mcivir u Yehova, geman palegh u tumen ityough keren akaa a nyian ishima a uma ne la.—Heb. 13:7.

Nahan yô, mayange se kende nen mbananjighjigh a vese imôngo sha u tumen ityough ken tom wase ga. (Fil. 1:10) Kpa se gema se lu nen ‘mbanyarev sha kwagh u Aôndo,’ sha u hemban veren ishima sha mcivir u Yehova ken uuma asev.—Luka 12:21.

[Ngeren u shin kpe]

[Ufoto u sha peeji 21]

Tom u uke u ú eren la ngu yangen we u zan mbamkombo hanma shighee?

[Ufoto u sha peeji 23]

Ian i civirigh i wasen anmgbianev ou mba nomso man mba kasev mba ken jijingi la gba u kwagh kpa?