Ve Lumun U Za Pasen Kwagh​—Ken Tar u Brazil

Anmgbian u kwase ugen ngu anyom 30, mba yer iti na ér Rúbia (1). Yange za hen anmgbian u kwase ugen, u i yer un ér Sandra (2), u lu eren tom pania ken tar u Brazil yô. Shighe u Rúbia za vannya la, kwagh ugen er, u yange doo un kpishi shi gema uma na kpaa yô. Ka nyi yange i eree? Ôr ase kwagh u Rúbia iyol na a kaa ne.

“KWAGH U M UNGWA LA KPILIGH MO IYOL”

Rúbia kaa ér: “Yange m za vea Sandra hen kwase ugen u Sandra henen Bibilo a na yô. Er se lu henen kwagh a kwase ne la, a va kende beelee a kaa ér, ‘Sandra, mbayev kasev mbagenev utar mba se eren tom ijiir i môm yô, soo u henen Bibilo, kpa m kaa a ve mer ve tamber, a va gba sha a ve tsô, ve kpa vea hen. M fa, inyom ne yô, u lu a ian ga.’  Kwagh u m ungwa la kpiligh mo iyol. M pine iyol yam mer, inja na yô, ior soo u fan Yehova, kpa or u tesen ve nan ngu ga, gba u vea kegh a keghe? Hen tiônnongo wam, ka i lu ican u zuan a or môm tseegh, u me hen Bibilo a nan yô. Er m lu hen ya u kwase ne la je, maa sarem u wasen ior mba hen geri la u fan Yehova. Ica kera gba ga je maa, m mough hen gar u m lu her la, m yem hen geri u Sandra lu eren pania her la.”

Lu nyi i due ken kwagh u Rúbia er nee? A kaa ér: “Iwer ihiar ngi karen yô, m lu henen Bibilo a iorov 15, shi ica i gbe ga yô, mo kpa ior ngeem u henen Bibilo a ve je, mbagenev lu keghen a kegh, er Sandra nahan.”

A HIDE A HEN SHA KWAGH U TOM NA U PASEN KWAGH LA

Anmgbian ugen u a hembe anyom 20 kpuaa yô, yange za upania mbagenev inya hen geri u Prudentópolis, ken tar u Brazil. Mba yer anmgbian ne ér Diego (3). Zende la yange u na yô, a hide a hen sha kwagh u tom na u pasen kwagh la. A kaa ér: “Yange kwaghpasen maan mo iyol ken tiônnongo wam ga, nahan m pasen kwagh ahwa kpuaa tseegh ken uwer. Kpa m ze upania mbara inya, shi m ongo akaa a ve ôrom la yô, m tôô mlu ve u saan saan la m kar sha u wam, nahan m nenge mer m ngu veren ishima sha tom u pasen kwagh la ga. M nengen er i saan ve iyol shi kwaghpasen ka a maa ve iyol yô, m tôm mer mo kpa ma m lu er ve nahan.” Diego hir zende la yô, a hii u eren tom pania.

We kpa u ngu gumor er Diego nahanaa? U dugh kwaghpasen shi u ze mbamkombo mba tiônnongo, kpa kwaghpasen kera maan we iyol gaa? Aluer kwagh ngu nahan yô, u fatyô u den wer akaa agen a kar u, sha er u za pase kwagh hen ape kwagh a hembe gban sha mbapasenkwagh la, nahan u zua a iember er mbagenev nahan kpa? Se lan er or ka nana tema a kpe nan iyol ve i lu nan ican u den imba uma la yô. Kpa umbur wer, agumaior kpishi er nahan. Ve de akaa agen a yange ve wa ishima u eren la kar ve, sha er vea hemba eren Yehova tom yô. De se nenge ikyav igen kpaa.

UNA LU ORPASENKWAGH SHIN UNA LU OR U HEMEN MBAKUHWANTYOGHOLOVO?

Anmgbian ugen ngu anyom 28, mba yer un ér Bruno (4). Yange za makeranta u henen ityogholov mbi kuhwan, nahan lu a awashima u va hingir or u hemen  mbakuhwantyogholov. Er a fa kwagh u í tese un la kpishi yô, i yila un acin imôngo a za hemen mbakuhwantyogholov mbagenev. Yange lu sha ian i va hingir ityagheror kpen kpen. Nahan kpa, a kaa ér: “Yange m fa er kwagh u injaa ban ken uma wam yô. Yange m tôndo zwa a Yehova ken msen mer me er ishima na, kpa m lu eren un tom sha afatyô wam cii ga, nahan kwagh ne zam iyol. Tsô m er msen hen Yehova, m pase un er lum ken ishima la, shi m lam a anmgbianev mbagenev ken tiônnongo, mba ve via ken jijingi yô. M henen sha ikyaa ne zulee yô, m tsua mer me hemba veren ishima sha kwaghpasen a ityogholov mbi kuhwan. Nahan m de makeranta u m lu henen la, m yem hen ape kwagh hemba gban sha mbapasenkwagh yô, sha u za pasen kwagh her.” Ka nyi i dugh ken kwagh ne?

Bruno yem hen geri u Guapiara. Geri ne gba ica a gartamen u tar u Brazil kuma ukilomita 260, shi ior mba her nôngo u kuman er 7,000 nahan. Kwagh u Bruno er ne lu kwagh u zange ga. A kaa ér: “Yange m za nyôr anyou u cuku, u lun a firiiji shin televishen shin Intanet shio. Kpa anyou la gema nam akaa agen a m lu a vande zuan a mi ga yô, i̱ lu a sule u ikyon ken akôngo.” Bruno lu hen tiônnongo u kiriki ugen, nahan hanma kasua yô, a tôô kwaghyan man mngerem kua ityakerada sha agugu na, a yem kwaghpasen ken agar. Ior kpishi hen anteregh la lu a̱ ungwa loho u dedoo ne ga. A ôr kwagh u kwaghpasen na ér: “Yange m lu henen Bibilo a iorov 18. Nahan saan mo iyol kpishi er kwagh u m lu tesen ve la lu wasen ve u geman uuma vev yô.” A mase kuren ér: “Hen shighe ne, m kav er m zua a kwagh u injaa u yange ban ken uma wam la yô. Kwagh shon yô lu mkom u or ka nana vande keren tartor u Aôndo ve nan zua a mi la. Yange mea we ityough zendan uyôughyôughmbaakaav yô, mayange ma m zua a mkom ne ga.” Kpa ka nyi tom yange eren ve koson iyol na hen geri nee? A kaa ér yange un tesen ior jita i kuhwan. Nahan se fatyô u kaan ser ityogholov mbi kuhwan kpa yange ta a ta kera ga.

“M KERA FATYÔ U HIDEN GA”

Anmgbian u kwase ugen zulum anyom ikyundugber hegen, mba yer un ér Mariana (5). Un kpa kwagh na nôngo u lun er u Bruno nahan. Er Mariana lu loya shi tom na ne vaan un a inyaregh kpishi nahan kpa, saan un iyol ga. A kaa ér: “Yange lum inja er m ngu ‘zendan di ahumbe ityô tsô’ nahan.” (Orpa. 1:17) Anmgbianev  kpishi taver un ishima ér a er tom pania. Nahan Mariana henen sha kwaghwan ne yô, un vea azende a na Bianca (6), man Caroline (7), man Juliana (8), ve tsua ér vea za na iwasen ken tiônnongo ugen hen geri u Barra do Bugres. Geri ne ngu ikyua a tar u Bolivia, gema gba ica a uya vev kuma ukilomita udubu udubu. Kwagh u ve er ne za nena?

Mariana kaa ér: “Awashima wam lu u za lun her iwer itiar tseegh. Kpa iwer itiar ngi been yô, m lu henen Bibilo a iorov 15, man gba u a wase ve kpee ve vea vese ken mimi ye. Kwagh ne na yô, taver mo u kaan a ve mer m ngu undun ve. Nahan gandem tsô m kera fatyô u hiden ga.” Man lu kwagh u anmgbianev mba kasev mba unyiin mban cii er je ne. Tom u Mariana u he ne hemba nan un msaanyoloo? A kaa ér: “Doom kpishi er Yehova a lu eren tom a mo u geman uuma mba ior mban nahan. Saan mo iyol u nengen er hegen m lu eren kwagh u injaa tsung a agee am man shighe wam nahan.” Caroline pase er ishima i lu un ker la ér: “Ka mea yav hen ikya tugh kpa i saan mo iyol er m er Yehova tom a agee am yô. Uma wam cii har sha u wasen mba m henen Bibilo a ve la. Doom kpishi er ityesen ne i lu wasen ve u geman uuma vev nahan. M nenge a mimi u mkaanem ma ma kaa ér: ‘Bende, nenge nen, [Yehova] ka u doon je’ la.” (Ps. 34:8) Man kape anmgbianev mba kasev mba utar mbagenev mbara kpa ishima i lu ve ker je la.

Iyenge i anmgbianev mba nomso man mba kasev mba ve lu agumaior, shi ve tsough u za pasen loho u dedoo u tartor sha ajiir a icaa la ngi seer a seer. Agumaior ne “na nagh sha ayol a ve sha asema a dedoo.” Nahan nenge er a saan Yehova iyol a ve la sha wono! (Ps. 110:3; Anz. 27:11) Shi Yehova una ver amba ne doo doo kpaa.—Anz. 10:22.

[Ngeren u kiriki/​Foto u sha peeji 5]

“Kwagh Môm Ban Se Ga”

Zum u anmgbian ugen vea kwase na soo u za pasen kwagh hen haregh u kwagh hemba gban sha mbapasenkwagh yô, asande a ior agen ken tiônnongo ôr akaa a nan ve iyolkpen. Mba yer anmgbian ne ér João Paulo, iti i kwase na ér Noemi. Mbagenev ken tiônnongo kaa a ve ér: “Aluer ne mough ne yem hen angeri u cuku yô, ne mba keren ner inyaregh ki za bee ne.” Mbagenev di kaa ér: “Ne mba yemen ner nyi? Tiônnongo wase kpa kwagh gba sha mbapasenkwagh her kpishi je.” Anmgbian ne kaa ér, shin er anmgbianev mban lu ôron akaa ne, henen ér mba wasen se nahan kpa, kwagh ne gema na se iyolkpen. Nahan kpa, anmgbian ne vea kwase na ve pase kwagh hen haregh u kwagh a hembe gban sha mbapasenkwagh la anyom ngee hegen. Saan ve iyol kpishi er yange i ôr akaa a kpen ve iyol, kpa ve yina ishima ga nahan. Anmgbian ne kaa ér: “Er mo vea kwase wam se lu heen je, kwagh môm ban se ga. Shi se zua a averen je hemba er yange se hen la.” Kwase na mase kuren ér: “Tom wase saa se ishe ga.”

Uma taver ken geri kpen kpen. Nahan ka i er nan ve mba ve ze u pasen kwagh her la ve zua a kwagh u nengen sha ayol a ve? Ka ve ker igbenda i eren tom a mfe ve. Mbagenev ka ve tese ior zwa Buter shin ma zwa ugen, gayô ve tesen mbayev mba iorov shin ve koron ikyekye shin ve taan ior penta sha ayou, gayô ve ker nyityô tom i vea eren sha ashighe ashighe cii. Shi mba ve za pase kwagh hen haregh u kwagh a hembe gban sha mbapasenkwagh cii, gba zwa môm ér, averen a ve zough a mi la hemba mbamtaver mba ve tagher a mi la ica je!

[Ngeren u kiriki/​Foto u sha peeji 6]

Ashighe Agen Ya Ka A Sar

Anmgbian ugen u i yer un ér Tiago yô, kaa ér: “Yange m va nyôr hen tiônnongo wam u he ne, ica i gbe ga yô, kera saan mo iyol ga. Mbapasenkwagh lu hen geri ne kpuaa tseegh, shi iemberyolough kpa ban. Nahan ya gba saren mo. Yange m fa je mer, a gba u me ker gbenda sha er a saan mo iyol yô. Nahan m gba nôngon mer me hoghor iyol a anmgbianev mba nomso man mba kasev mba ken tiônnongo wam la, man kwagh ne wasem kpishi. Yange m kôr azende a he, maa ica i gbe ga yô, hii u saan mo iyol shi ishima hemba teman mo shimi kpaa.”

[Foto u sha peeji 3 la]

Noemi man João Paulo, hen geri u Ascurra, Santa Catarina