Kwagh môm u una wase se kpishi yô, ka msurshima u ka se zua a mi hen tsombor wase shin azende ase gayô mbacivir Yehova a vese imôngo la.

Huror ka nana lam a vese doo doo nahan, mkaanem ma nan mara ma na i kundu se iyol shi i pever se iyol kpaa. (Anz. 16:24; 18:24; 25:11) Kpa Mbakristu mba mimi mba keren msurshima ve tseegh ga. Ka ve ker u “surun mba ve lu ken hanma ican la ishima sha ishimasurun i [ve ayol a ve] kpaa Aôndo A sur [ve] asema a mi la.” (2 Kor. 1:4; Luka 6:31) Ortamen u sôron atôônanongo ugen ken tar u Mexico yange nenge a mimi u kwagh ne. Mba yer iti na ér Antonio.

Zum u i zua un a ikyansa i sha awambe yô, a zungwe kpishi. Nahan kpa, a nôngo ér una bee a ijungwen la ken ishima na sha. A er kwagh ne nena? Yange nôngo kôr atsam ase ken ityou, nahan á waan a sha er una ungwan asember la shi una gbidyen kwar sha mi yô. Kwagh ugen u sur un ishima kpishi yô, lu msen u eren duen sha kua Bibilo i ôron.

Ortamen u sôron atôônanongo ne kav hegen nahan ér, mba yange ve hemba wasen un cii yô, ka mbacivir Yehova a na imôngo mbara. A kaa ér: “Yange ishima ia nyian mo vea kwase kpishi yô, se kaa a anngôm ugen u a lu ortamen ken tiônnongo yô, ser a va er msen vea vese. Kwagh ne yange a sur se ishima shi a na se m-mem kpaa.” A mase kaan ér: “Er tsombor wase sue se dông, shi anmgbianev asev mba ken jijingi kpa lu a vese mangeraa yô, ica gba ga je maa, ishima de u yinan se.” Doo un kpishi, er a lu a azende a dedoo, a a soo un sha mimi shi kwagh na a gbe a ishima yô!

Iwasen igen i se fatyô u zuan a mi sha shighe u ican yô, ka icighan jijingi u Aôndo a tende zwa u nan se la. Apostoli Peteru yange kaa ér icighan jijingi u Aôndo ka “iyua.” (Aer. 2:38) Mimi u kwagh ne yange due ken igbar zum u i tsegha ior kpishi sha icighan jijingi, sha iyange i Pentekosti u inyom i 33 la. Er Peteru lu ôron kwagh u icighan jijingi sha ci u mba i shigh ve mkurem la nahan kpa, icighan jijingi ngu sha ci wase cii. Icighan jijingi u Aôndo yen shighe môm kpaa ga. Nahan er nan u sen un wer a na u ichighan jijingi na mgbeghaa ga?—Yes. 40:28-31.

Apostoli Paulu yange wa ishima a mbamtaver kpishi, ashighe agen je yô, á kar a ku kôôsôô. (2 Kor. 1:8-10) Kpa Paulu hingir u ican ku gbir gbir ga. Yange fa ér Aôndo ta ikyaa a na, nahan kwagh ne sur un ishima. A nger ér: “I̱ wuese Aôndo Ter u Ter wase Yesu Kristu, ka Ter u A lu a mhôônom ma zungwen man ka Aôndo u A lu a ishimasurun cii. Un u A surun se asema sha atsan a ase cii” la. (2 Kor. 1:3, 4) Paulu de ér mbazeyol nav ve hemba un ga. Kpa atsan a a tagher a mi la, wase un u kaven er ka i lu mba ve lu yan ican la ken ishima yô, nahan a hemba fan u surun mbagenev ishima zum u ve nyer ken ican yô.

Angev mbu Antonio mbu been yô, a hide a za hemen a tom u sôron atôônanongo u yange lu eren la. Yange vanden zungwen a mbananjighjigh, kpa hegen un vea kwase na, ka ve ker hanma gbenda cii sha er vea za sôr mbauangev shi vea taver ve ishima yô. U tesen ikyav yô, yange ve za anmgbian ugen u gba zege uange yô inya, nahan ortamen u sôron atôônanongo ne kav er anmgbian ne soo u zan mbamkombo ga yô. Ortamen ne kaa ér: “U ngu wer anmgbian ne yange kera soo Yehova shin mbacivir Yehova a na imôngo ga ze, kpa angev mbura nyôr un iyol kpishi, nahan a tôô wener un kera gba kwagh ga.”

Kwagh môm u Antonio er sha u taver anmgbian ne ishima yô, a yila un ér a er msen hen mtem ugen, u i sember eren yô. Shin er anmgbian ne nenge wener un yina u eren msen hen mtem ne nahan kpa, a gba lumun tsô. Antonio kaa ér: “Yange er msen doo je gande. Been yô, kera lu er vande lun la nahan ga. A shi a nenge ér un kpa un gba kwagh.”

Sha kpôô yô, se cii se mba we ishima a atsan, a vesen shin a kiriki. Kpa er Paulu yange kaa nahan, atsan ne aa fatyô u wasen se u surun mbagenev ishima shighe u ve lu ken ican yô. Yô, se lu nen er Yehova Aôndo wase nahan, se surun nen mbagenev asema ken atsan a ve.