Inyaregh Ki Aôndo a Ne La

ALUER u ngu civir Aôndo sha jighjigh yô, una na u iveren sha inyaraa? Adooga una na u, kpa alaghga a lu inyaregh ki ú ver ishima a mi la ga. Nenge ase ikyav i Maria, ngô u Yesu la. Ortyom Gaberiel yange va nyôr her a na, kaa a na ér Aôndo “lumun [un] sha mhôôn tsung,” shi una mar wan u Aôndo kpaa. (Luka 1:​28, 30-32) Nahan kpa, Maria lu kwase-nyar ga. Zum u Maria na nagh shighe u mar Yesu kera la, yange na “mbaatii uhar, shin utulembamkunguv uhar,” er atsanaior naan Yehova nagh la.​—⁠Luka 2:24; Levitiku 12:⁠8.

Er Maria lu icankwase yô, kwagh ne tese ér lu a iveren i Aôndo gaa? U ma lu nahan la yô, zum u a za Elisabetu, anngô na inya la, “Elisabetu iv a Icighan Jijingi, a genger imo taver taver ér: ‘i wuese we ken ukase cii, Wan u ú va mar Un la kpaa i̱ wuese Un’ ” (Luka 1:​41, 42) Maria lu a ian i icivirigh i hingir ngô u wan u Aôndo u ishima ishima.

Yesu iyolna kpa lu ornyar ga. Yange i mar un hen ijiir i gban ijime, mbamaren nav kpa lu sha kwarkyaa ga, shi lu icanor sha ayange a uma na shin tar ne cii. Sha shighe ugen la, Yesu kaa a orgen u soo u hingir orhenen na ér: “Atsôngo nga a ijô, inyon i sha kpaa ngi a aya; kpa Wan u or yô, ngu [ape] suur ityough ga.” (Luka 9:​57, 58) Nahan kpa, kwagh u Yesu Kristu er sha u van shin tar ne la na yô, lu u mbahenen nav vea hingir mbanyarev. Apostoli Paulu nger ér: “A gema A hingir Or u ibanave sha ci wen, sha u ne ne̱ gema ne̱ hingir mbanyarev sha ibanave Na la.” (2 Mbakorinte 8:⁠9) Lu nyi inyar Yesu na mbahenen nava? Man ka nyi inyar se lu a mi nyiana?

Kanyi Inyar?

Ashighe kpishi mngee u inyar ka a yange or u lun a jighjigh u nan, sha ci u alaghga ornyar nana suur sha inyaregh ki nan a u ma nan suur sha Aôndo la. Yesu kaa er: “Ka ican tsô, u mba ve lu a inyaregh kpishi vea nyôr sha tartor u Aôndo.” (Marku 10:23) Nahan kwagh ne tese wang ér inyaregh ki Yesu na mbadondon un la lu inyaregh ki kpôô kpôô ga.

Sha kpôô yô, Mbakristu kpishi sha derianyom u hiihii la lu mbaatsanev. Shighe u orgen u i mar un a iwan sôn Peteru man Yohane inyaregh yô, Peteru kaa ér: “Azurfa man zenaria yô, m ngu a mi ga, kpa kwagh u m lu a mi yô, ka un me na u ye; zende ken iti i Yesu Kristu Ornasareti.”​—⁠Aerenakaa 3:⁠6.

Mkaanem ma apostoli Yakobu kpa tese ér mbaatsanev yange ve hemba iyenge ken nongo u Kristu u sha derianyom u hiihii la. A nger ér: “Ver nen ato, anmgbianev av mba doon mo ishima, Aôndo kera tsuwa mbaatsanev mba ken tar ne sha u ve̱ lu mbanyarev ken jighjigh u nan man shi mbayandyako u tartor u A tende zwa a mba Un doo ve ishima la gaa?” (Yakobu 2:⁠5) Heela tseegh ga, apostoli Paulu kpa yange kaa ér “mbafankwagh sha inja i iyolough” shin  “mbaageev” shin “mbaiciviriv” kpaa ngee ken nongo u Kristu ga.​—⁠1 Mbakorinte 1:⁠26.

Aluer inyaregh ki Yesu na mbadondon un la lu ki kpôô kpôô ga yô, lu nyi inyar yange na ve? Yesu kaa ken washika u a tindi hen nongo u Kristu u ken Semurna la ér: “M fa ican you i yan man shi ibanave you, nahan kpaa u ngee a akaa; man ityuhwanev mbi ior mba ve yer ayol a ve er Mbayuda kpa i lu nahan ga, i lu shinagoge u Satan la.” (Mpase 2:​8, 9) Shin er Mbakristu mba ken Semurna ve lu ken ibanave nahan kpa, ve lu a inyaregh ki ki hembe azurfa man zenaria yô. Ve lu mbanyarev sha ci u jighjigh ve hen Aôndo man mimi u ve tile sha mi la. Jighjigh u nan ngu a inja tsung sha ci u “ka ior cii ve lu a jighjigh u nan ga.” (2 Mbatesalonika 3:⁠2) Sha ishigh ki Aôndo yô, ka mba ve lu a jighjigh u nan ga la ve lu mbaatsanev ye.​—⁠Mpase 3:​17, 18.

Inyaregh Ki Jighjigh u Nan A Ve a Mi La

Ka sha nyi igbenda nahan jighjigh u nan a lu a inja tsung-nu? Mba ve ne Aôndo jighjigh yô, mba zough a “erdoo Na u ngeen yum la man bem Na man ishimawan Na.” (Mbaromanu 2:⁠4) Shi mba a “mde u gbev [vev] mbu nôngon” sha ci u jighjigh u ve ne nagh ku ipaan ku Yesu na la. (Mbaefese 1:⁠7) Heela tseegh ga, shi mba a imba kwaghfan u “kwaghôron u Kristu” ka a wase mbananjighjigh ve zua a mi la. (Mbakolose 3:16) Er ve eren msen hen Aôndo a jighjigh u nan yô, “bem u Aôndo u a gande hanma mfe wase cii” la kor asema a ve man mbamhen vev, shi  ne ve mkom man iember kpaa.​—⁠Mbafilipi 4:⁠7.

U seer sha averen ne yô, mba ve ne Aôndo jighjigh sha ikyev i wan na Yesu Kristu cii, mba a ian i kpilighyol i va lun uma gbem sha won. Mkaanem ma Yesu, ma ior kpishi ve fe ma la kaa ér: ‘Tar ne doo Aôndo ishima je, nahan a na wan na u môm môm la sha er anti or u nan ne Un jighjigh yô, nana̱ de timin ga kpa nana̱ zua a uma u tsôron.’ (Yohane 3:16) Zum u or ka nana zua a mfe u vough u Ter man u Wan la yô, nan hemba lun a ian i icivirigh i zuan a uma u tsôron cii, sha ci u Yesu kaa ér: “Man uma u tsôron yô, ka u ve̱ fa U, we Aôndo u mimi tswen, man shi Un u U tindi la, ka Yesu Kristu.”​—⁠Yohane 17:⁠3.

Er Aôndo a hembe veren se ken jijingi nahan kpa, veren se sha iyol shi ne se ishima i kundu kundu kpaa. Nenge ase ikyav i orgen ken tar u Brazil, iti na ér Dalídio. Cii ve or ne fa mimi sha kwagh u mbaawashima mba Aôndo yô, yange hunden msôrom kpishi. Kwagh ne bende a tsombor na sha gbenda u vihin kpen kpen. Heela tseegh ga, inyaregh kpa kera faan lun a mi ga. Tsô va hiin u henen Bibilo a Mbashiada Mba Yehova yô, a gema inja je kpilighyol.

Kwagh u Dalídio lu henen ken Bibilo la na yô, a de anza a vihin a yange lu a mi la cii. Yange gema eren kwagh sha mfe u zua a mi la je yô, a kaa ér: “Ngise la m zenden sha ayou-msôr; hegen yô m zenden sha uya uya.” Dalídio hingir or u pasen mkaanem ma Aôndo hanma shighe cii. Er a sôr inja na yô, kwagh la na un hemba lun dedoo shi hemba lun a inyaregh hen shighe la cii. Dalídio kaa ér: “Inyaregh ki yange m vihin sha msôr la hegen m wasen mbagenev a ki shi m yamen akaa a kwagh a gbem a mi yô.” Shi yange zua a akar a injaa kpishi sha u nungwan a ior mba ve lu a mnenge u Aôndo, er un nahan yô. Hegen Dalídio zua a mmemshima kpishi shi a zua a mkom u a gande nyityôkwagh mkom u yange vande lun a mi zum u lu a fa Aôndo ga la.

Orgen u yange nan zua a mkom ken uma zum u nan na Yehova jighjigh yô, lu Renato. Aluer u nenge a na nyian yô, saan un iyol kpen kpen. A taver we u lumun wer un nahan yange tar nzughul a na. Zum u lu anikyundan u forototo la, ngô na undu un yem kwagh na. Yange wa un ken ikpa igen za gbihi mape shin ityô benci, pohor iyol côu côu, man lu a gba tor tsô kpaa ga. Kasev uhar mba ve lu karen kwagh ve yô, nenge kwagh lu mughur ken ikpa i shin ityô benci la. Hiihii la ve hen ér ka ankpatema or nan undu her ye. Mba fe ér ka anikyundan yô, ve tôô un fese ve yem a na sha iyouci i i lu ikyua la sha er a nenge sha a na yô.

Kwase u môm la lu Kwaseshiada, nahan a ôr Kwaseshiada ugen u i yilan un ér Rita yô kwagh u wanikyundan la. Rita vande maren ônov mba duen kpenegh acin imôngo, nahan lu a wan môm tseegh. Er sar un kpishi u zuan a wan yô, maa a tôô Renato hingir wan na.

Shighe u Renato lu yev la je tsô, Rita ôr un er un lu ngô na kpôô kpôô ga yô. Nahan kpa a nenge sha a na dedoo sha dooshima shi a tese un akaawan a Bibilo kpaa. Ngur vesen yô, Bibilo hii u doo un kpishi. Shi iwuese i lu a mi sha gbenda u kpilighyol  u i war un la kpa lu seer a seer. Hanma shighe u ka una ôr mkaanem ma orpasalmi Davidi nger ér: “Gadia terem man ngôm undum, kpa TER Una tôôm” la yô, mliam ma iv un ken ashe poo.​—⁠Pasalmi 27:⁠10.

I er Renato batisema ken inyom i 2002, mba ker ken inyom igen yô, Renato hingir or u pasen mkaanem ma Aôndo hanma shighe sha u tesen iwuese na sha akaa a Yehova a er a na la cii. Zan zan nyian kpa, ngu a fa mbamaren nav kpôô kpôô ga, man alaghga una tsa a fa ve kpaa ga. Nahan kpa, Renato nenge wener u fan Yehova, Ter u lun a ikyo i wan, shi na Un jighjigh la ka môm ken uiyua mba hemban cii mba un zough a mi yô.

Alaghga a sar u u̱ yan ikyar vea Aôndo kôôsôô, man ikyaryan ne ia na u mkpeyol u mimi. Ian i yan ikyar vea Aôndo man wan na Yesu Kristu nahan ne ngi sha ci u hanma or cii, nana lu ornyar shin icanor kpaa. Alaghga ikyaryan ne ia na or nana hingir ornyar ga, kpa ia va nan a bem man mkom u inyaregh ki shin tar ne cii kia fatyô u yamen ga yô. Sha kpôô yô, mkaanem ma ken Anzaakaa 10:22 mara ka ma mimi, ma kaa ér: “Iveren i TER ngi ve a inyaregh, tom u nyoonyol seer ma kwagh sha i ga.”

Kwagh u ior mba ve ve hen Yehova la gba un ishima. A kaa a ve ér: “Ma u ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan.” (Yesaia 48:18) Shi a tôndo zwa ér una na mba ve ve hen a na sha mimi la, injar wuee. A kaa ér: “Injar i mhir u iyol ijime, cian TER yô, ka inyaregh man icivir kua uma je.”​—⁠Anzaakaa 22:⁠4.

[Foto u sha peeji 5]

Shin er tsombor u Yesu gba ican nahan kpa, Aôndo na u iveren mgbeghaa

[Mkaanem ma sha peeji 6]

Jighjigh u nan hen Aôndo ve a bem man mkom man msaanyol