Inyaregh Ki Ne Msaanyol u Mimii?

YANGE i mar Sonia ken tar u Ishpania. Zum u lu wanye la, zaan mbamkombo mba Mbashiada mba Yehova vea ngô na. Kpa va ganden yô, a mough a yem ken gar u London, ken tar u Ingila, a za hii tom hen ijiir igen i koson inyaregh.

Tom u Sonia ne doo un ishima i môm. Lu zuan a inyaregh ngôgh, shi lu nengen sha kpila inyar i ior koson yô. Kpe un iyol shi fa tom na ne kpaa. Sonia eren tom ahwa 18 hanma sev, man tugh mbu genegh je yô, a yav ahwa ahar shin atar nahan tseegh. Uma na jimin cii har sha tom na ne. Nahan kpa, kwagh va kôr gema icin i môm. Sonia gba angev mbu kpen alegh, man alaghga lu sha ci u tom na u ú naan un mmem ga la. Hen shighe la lu anyom 30 tseegh.

Sonia kpe vegher môm, man mbatwerev nav kpa lu henen a hen ér shin shi una fatyô u lamen je-o? Ngô na maa mough fese yem tar u Ingila sha u za nengen sha a na. Sonia va hiin u zenden yô, ngô na kaa a na ér, “M ngu zan mkombo u tiônnongo u Kristu, nahan we kpa u dondom sha ci u me fatyô u undun we mer lu tswen ga.” Sonia lumun u zan vea ngô na. Tsô nyi i eree?

Sonia kaa ér, “Hanma kwagh u yange m ungwa cii lum mimi. Doom je kondo. Yange m lumun saan saan mer orgen ken ikpelaior i i va sughum kwa u hiihii u m za ken Iyou i Tartor la a hen Bibilo a mo. Mba se vanden lun imôngo mbara cii de u van pe m lu yô, kpa ahuraior am a he ne soom shi ve wam ikyo kpaa.”

Ayange nga kar yô, Sonia hide hii u lamen kure kure, shi a seer fan Bibilo i lu henen la kpaa. Nahan nyôr inyom ga cii tsô i er un batisema. Azende a na kpishi lu eren tom u pasen kwagh hanma shighe la, man a nenge er saan ve iyol yô. Tsô Sonia kaa wener, ‘Mo kpa m soo u lun er ve nahan. M soo u eren Yehova tom sha afatyô wam cii!’ Hegen ne Sonia ngu eren tom u pasen kwaghaôndo hanma shighe cii la.

Kwagh u yange er Sonia ne tese un nyi? A kaa wener, “shin er yange m lu zuan a inyaregh kpishi nahan kpa, mtumeyol man ishimanyian i alaghga a va dem tom la na yô, saan mo iyol ga cii. M va mase kaven mer kwagh u vesen ken uma yô, ka u yan ikyar a Yehova, Terem u sha la kôôsôô. Hegen yô, saan mo iyol sha mimi.”

Apostoli Paulu yange nger ér: “Mishe u hanma inja i kwaghbo cii yô, ka inyaregh ki saren. Mbagenev yô, ki hange ve nahan ve tsume ve undu jighjigh u nan, ve kuma ayol a ve sha atsan atô kposo kposo.” (1 Timoteu 6:10) Sonia lumun a mkaanem man tôô ave sha, sha ci u kwagh u yange er un la.