Ityesen I Aiegh Va A Atesen A Aiegh Agen

APOSTOLI Paulu yange nger Mbakristu mba ken derianyom u hiihii la washika, ken inyom i 60 la, kaa a ve ér, “ver nen ishima.” Lu nyi Paulu ta ve icin sha mi? “Or nana̱ de ker ne yemen a ven sha kwaghfan shin sha atseregh a gbilinigh ga. Akaa ne ka sha inja i ukaaer mba ior la.”—Mbakolose 2:8.

Er Paulu ta Mbakristu icin nahan je kpa, ken atô u derianyom u sha uhar la, Mbakristu mbagenev hii u lumun a mbamhen mba mbafankwagh tsura mba ngise ngise mbara, ve lu pasen ior jighjigh ve u nan a mbamhen mban. Ve er nahan sha ci u nyi? Yange ve soo ér mbafantakerada mba ken Tartor u Roma ve lumun ve, nahan vea gema ior kpishi vea hingir Mbakristu.

Orkristu ugen u zan gwa ken Mbakristu mban, u i yilan un ér Justin Martyr la na jighjigh ér Orshua u Aôndo yange pase iyol na hen mbafankwagh tsura mba ken Grika ica i gba cii ve Yesu mase van ye. Justin man mbatesen mbagenev er un nahan, kaa ér kwaghfan u taregh man ukaaer mba iorov na yô, kwaghaôndo u Mbakristu hingir kwaghaôndo u lun ior cii a inja kpishi.

Gbenda u eren kwaghaôndo u Mbakristu, u Justin Martyr due a mi ne wase u geman ior kpishi hingir Mbakristu. Nahan kpa, ityesen i aiegh i Mbakristu lumun a mi la va a atesen a aiegh agen, man ka atesen ne cica cii a kohol hegen a hingir atesen a Mbakristu ye. Nenge ase kwagh u ityakerada igen i ôr sha kwagh u atesen ne, man kwagh u Bibilo i tese jim jim yô, ka nahan man u fa aluer atesen ne ka a mimi shin ka a mimi ga ye.

[Ape i zough a ufoto mban yô u sha peeji 9 la]

Devil: Barrators—Giampolo/The Doré Illustrations For Dante’s Divine Comedy/Dover Publications Inc.; angels: Art Resource, NY; trinity relief: Museo Bardini, Florence