Kporom hen Aôndo

Kanyi Yehova a Keren hen a Vese?

Duteronomi 10:12, 13

ASHIGHE kpishi ka i lu zange u tsuan wer u ungwa imo i or shin u venda i ga. Aluer orvesen nan vihi tu, orgen eren kwagh ka kom nan shawon ga yô, alaghga mba ve lu sha ikyev i nan la vea ungwan imo i nan ér hemba ve a hemba. Kpa mbacivir Yehova Aôndo yô, mba ongo imo na a ishima ve i môm. Sha ci u nyi? U se na mlumun sha mpin ne yô, doo u se time sha mkaanem ma Mose ma i nger ken Duteronomi 10:12, 13 la. *

Shighe u Mose lu ôron tamenkwagh u a lu ken atindi a Aôndo la, a pine mpin u doon tsung ne, ér: “Ka nyi TER, Aôndo wou, A keren her a we?” (Ivur 12) Yehova ngu a ian i kaan a vese ér se er nyityôkwagh i un soo ér se er cii. Bee kera yô, ka un a lu Tor u Hembancii kua Imbor i uma man Orkuran uma wase kpaa ye. (Pasalmi 36:9; Yesaia 33:22) Yehova hemba ngun a ian i kaan a vese ér se er ishima na. Nahan kpa, kighir se ér se er ishima na ga. Kanyi a keren hen a vese? Keren ér se hingir ‘mbaungwan kwagh sha asema’ a ase.—Mbaromanu 6:17.

Kanyi ia mgbegha se u ungwan imo i Aôndo a mkighir shio? Mose ter kwagh môm u i doo u se er yô. A kaa ér: “Cian TER, Aôndo wou.” * (Ivur 12) Mciem man ka ma ka se cian gighir gighir shighe u se hen ér kwaghbo una er se la ga, kpa ka mciem ma ka ma mgbegha se u nan Aôndo icivir shi wan ikyo sha igbenda na la. Mcie u cian Aôndo la ka una iv ken a vese yô, se palegh u eren kwagh u una vihi un ishima ker yô.

Nahan kpa, doo u se ungwan imo i Aôndo sha ci u nyi jimi? Mose kaa ér: “[Yehova] A̱ doo u ishima, man . .  . eren TER, Aôndo wou, tom a ishima you cii, man a uma wou cii.” (Ivur 12) U soon Aôndo hemba di u gban henen kwagh na ken ishima tsô la. Takerada ugen kaa ér: “Ashighe agen asemberatii a tesen ieren, a ken zwa Heberu, a a er kwagh u henen kwagh u or ken shima la, nga a ôr kwagh u or er kpôô kpôô sha u a tesen ér nan ngu henen kwagh u orgen ken ishima la kpaa.” Takerada ne shi kaa ér u soon Aôndo la ka u “eren kwagh” a na “sha dooshima.” A fatyô u kaan sha gbenda ugen ér, aluer Aôndo doo se ishima sha mimi yô, se eren akaa a se fe ser aa doo un la.—Anzaakaa 27:11.

Doo u se ungwa imo i Aôndo se kighir nena? Mose kaa ér: “Zenden sha igbenda Na [i Aôndo] cii.” (Ivur 12) Yehova soo ér se er hanma kwagh u un kaa a vese ér se er cii. U ungwan imo i Aôndo sha hanma gbenda cii la una va se a va a ican i yanaa? Mayange kwagh una er nahan ga.

U ungwan imo Aôndo a ishima yase i môm la una va se a va a averen. Mose nger ér: “Waan atindi a . . . m we u nyian ne [ikyo], sha er á kpe u iyol yô.” (Ivur 13) Sha mimi yô, hanma tindi u Yehova a we se shin hanma kwagh ua kaa a vese ér se er cii ka sha ci u mkpeyol wase. Kwagh u geman sha kwagh ne ngu ga. Bibilo kaa ér: “Aôndo ka dooshima” (1 Yohane 4:8) Sha nahan yô, atindi aa a we se cii, a wa a sha ci u mkpeyol wase u tsôron tseegh. (Yesaia 48:17) Aluer se mba eren akaa a Yehova a kaa ér se er la cica cii yô, kwagh ne una kura se sha mbamzeyol hegen shi se va zua a averen kpishi ken hemen sha ikyev i hemen u Tartor na. *

Zum u i lu Yehova a kaa a vese ér se er ma kwagh yô, se mba henen a hen ér se ungwa imo na shin ungwa ga ze. Ka se fa je ser, kwagh u se tsua ve a lu sha gbir yô, ngu môm tseegh tsô. U ungwan imo na a ishima yase cii la, ka kwagh u doon hanma shighe cii. Imba ieren i mimi ne ka i na se hemba kporom ikyua a Yehova, un u a lu Aôndo u dooshima, u hanma shighe cii a keren mkpeyol wase la.

[Ngeren mba shin kpe]