Bibilo Gem ior

KANYI yange i wase kwase ugen ken tar u Russia u lu yesen ônov nav un tswen yô, de u man mcimbim ma bom shi hide doo a ônov nava? Orgen ken gar u Kyoto ken tar u Japan, u kera lu a ya u tsan ga yô, yange er nan ve zua a agee man ishimataver i den telegh mbu mbu gbihi un ken ibanave laa? Kanyi yange i wase orkuran ibua ugen ken tar u Australia ve de u man msôrom kpishi? Ungwa ase kwagh u iorov mba utar mban ve er shin heen ne.

“M hen ken Bibilo mer gba u me nengen sha iyol yam.”—NELLY BAYMATOVA

ANYOM: 45

TAR NA: RUSSIA

INJA KWASE I YANGE LU YÔ: YANGE MAAN MCIMBIM MA BOM

YIASE YAM: M vese ken gar u Vladikavkaz, gartamen u kpentar u North Ossetia (mba yer ijiir ne hegen ér Alania). Tsombor wam yange u wa lun a inyaregh. Er se hemba lun a inyaregh a ior mbagenev nahan je kpa, saan mo iyol ga cii. Shighe u m kuma anyom 34 la nahan, m pav ivaa kuma kwa har. Yange m ma mcimbim ma bom zan zan kuma anyom pue. I za a mo iyouci kuma kwa har sha ci u ieren yam ne. M lu a ônov uhar, kpa hen shighe la ve doom ishima ga; shi azende a am man tsombor wam kpa m eren kwagh a ve ken bem ga.

Hen shighe la ngôm hingir Orshiada u Yehova. Ashighe kpishi m ungwa ngôm a vaan a eren msen hen Yehova ér a̱ wasem. Una vaan nahan, m ôr ken ishima mer: ‘Ngôm ne lan di kwagh tsôô! Yehova una wasem nena?’ Yange m nôngo mer me de u man mcimbim ma bom. Kpa m lu a ishimataver i me de ieren ne sha iniôngon yam tseegh ga. Sha shighe ugen la m ma mcimbim man ga kuma ayange ahar. Tsô m due ken ruumyou u m lu ker la m tsuwe sha windou m va gba shin inya. Kpa kwagh ka a er yô, ape m tsuwe la lu sha kpoyou u sha uhar la. Nahan m va gba m sombo ave man angahar shi m vihi iyol ken ijime. I kôrom gambe hemba uwer jimin.

Shighe u m lu ken iyouci la cii, ngôm lu nengen sha a mo, shi mayange je zôhô a mo ga. Yange fa er ishima lu zan mo iyol sha akaa kpishi shi m lu sha mar wam ga yô. Nahan kpa, gema ver ukôpi mba magazin u i yer ér Awake! * la ikyua a gambe wam. Nahan m hii u ôron ve môm môm; ve ôr akaa a doon mo kpishi man a lun mo a iwasen kpaa. Tsô m nenge mer doo u me hen Bibilo a Mbashiada.

GBENDA U BIBILO GEMA UMA WAM LA: Kwagh môm u Bibilo tesem yô, lu u eren kwagh iyol wam. M hen ken Bibilo mer gba u me nengen sha iyol yam shi me nengen sha ônov av kpaa, nahan kera lu u me veren ashe a ngôm mer a naan mo inyaregh ga. Er shighe u m lu man mcimbim ma bom la cii m lu eren kwagh  sha ishima yam tseegh yô, u hiin tom u eren hanma shighe la lum kwagh u ican kpen kpen.

Shi kwaghwan u a lu ken Duteronomi 6:5-7, u i kaa a mbamaren ér ve tesen ônov vev kwagh u Aôndo la kpa wasem kpishi. Yange m kav er i lu u Aôndo una pinem kwagh u gbenda u m yese ônov av mba uhar mbara yô. Kwagh la na yô, m gema lun vea ônov av shi m hen u tesen ve dooshima sha mimi.

Yange m wuese Yehova kpishi er a nem ian i henen mimi sha kwagh na nahan. Nahan m hingir u tseghan iyol yam sha u me er un tom yô, shi m er batisema, m hingir Kwaseshiada u Yehova.

IWASEN I M ZOUGH A MI LA: Er m hen u kighir ishimanyoon i m nyoon dang dang la yô, m hide m lu vea ngôm doo doo. Shi m hide m doo vea ônov av kpaa.

Er m ker akaa a vihin Aôndo ishima la ihyom hegen yô, mbamzeyol kpishi mba m lu a mi sha ci u uma u m lu eren la bee kera. Hegen ne, saan mo iyol kpishi gadia m ngu wasen ior u henen mimi sha kwagh u Yehova, Aôndo wase u dooshima la.

“M nenge mer . . . i war uma wam ken ku jighilii je.”—MINORU TAKEDA

ANYOM: 54

TAR NA: JAPAN

INJAOR I YANGE LU YÔ: YANGE TSAAN SHA GODOBI

YIASE YAM: Yange m vese ken gar u Yamaguchi vea terem man ngôm u tamen. M fa ngôm jighilii ga. Shighe u m lu anyom 19 la, ngôm u tamen saa ku, nahan m za hemen u lun vea terem. M eren tom u yôron iwer hen ijiirtom igen, terem kpa eren tom hen kômpeni ugen u eren kwaghyan. Er se yaren tom sha ashighe kposo kposo yô, se faan zuan ga. Kure kure tsô, m gema eren tom shighe gôgônan, shi m hii u man msôrom vea azende am.

Shighe kar yô, tom wam la duem ishima. M er ayôôso vea orvesen wam shi m hii u man msôrom kpishi. M va zurum anyom 30 yô, maa m undu ya, m za lu hen gar ugen. Inyaregh ki m lu a mi la ki been yô, m hii u eren tom hen ijiir i haan do. M zua a wankwase ugen hen ijiir ne, maa se vôso ayol a ase. Kpa anyom kar ahar man tiôn nahan tseegh maa se pav ivaa la.

Yange m ure kpishi shi tar duem ishima, nahan m hingir u gban anzô kpishi hen mba nan ior anzô. Ayange nga kar yô, m yevese mbaanzôôv mban, m hide hen ijiir yam, m za lu vea terem anshighe kpuaa, kpa er m tsugh un yô, se hingir u gban iyongo. M tôô un inyaregh m yem kwagh wam, m kera gbidye do ga anyangem wa karen. Tegh tegh tsô, m kungu ican, nahan m gema tsan hen tashan u igirgirdogo; m tsa her ayange kpuaa. M mough heela, m yem ken gar u Hakata, m va mough heela m yem ken gar u Himeji, heela kpa m mough m za lu ken gar u Kyoto. M tsa sha godobi anyom wa karen kpuaa.

GBENDA U BIBILO GEMA UMA WAM LA: Ken inyom i 1999 la, m lu hen garaji u matoo, ikyua a Ifi u Kamogawa ken gar u Kyoto, maa kasev mbagenev uhar va kohol mo her. U môm ken a ve, pinem ér, “U soo u henen Bibiloo?” Nahan m lumun mer, i hen Bibilo a mo. Tsô  Mbakristu mbagenev mba vian ken jijingi, mba ken nongo u Mbashiada mba Yehova mba hen ijiir la gba va henen Bibilo a mo, ve wasem u nengen a mtsera u me zua a mi sha u dondon akaawan a Bibilo yô. Ve kaa a mo ér mo m nôngo m zua a tom kua ijiir i tsan. Er m soo mer i doo ve a mo yô, m ker tom sha ajiir imôngo, kpa sha hiihii la m lu keren u sha gbashima ga. Shighe kar yô, m gba eren msen sônon mer Aôndo a̱ wasem shi m ker tom kpoghuloo, nahan ken masejime yô m zua a tom.

Msen shi yange wasem u hemban mzeyol ugen u taver mo kpishi. Mbaanzôôv mba m yevese ve la, yange ve tôvom ityô gbem ve zua a mo, tsô ve kôrom ér m kimbi ve anzô ve. Ishimanyian mo kpishi. Er m lu ôron Bibilo ayange ayange yô, m ôr mkaanem ma ken Yesaia 41:10 (NW) la. Aôndo tôndo zwa a mbacivir un sha mimi ken ivur la ér: “Me wase ne.” Ityendezwa i Aôndo ne i̱ nam agee shi i̱ taver mo ishima kpaa. Nahan m gba eren tom kpoghuloo zan zan m kar kimbin anzô am cica cii. Ken inyom i 2000 la, m kuma u a erem batisema, tsô i erem batisema m hingir Orshiada u Yehova.

IWASEN I M ZOUGH A MI LA: Kwagh u m hen ken Bibilo la na yô, m hide m za kohol terem m hime iyongo a na, nahan a dem kwaghbo wam. Yange saan un iyol kpishi er m hen u kuran atindi a Bibilo nahan. M nenge mer er m lu dondon akaawan a Bibilo yô, i war uma wam ken ku jighilii je.

Heela tseegh ga, m ngu eren tom koson iyol yam hegen. (Mbaefese 4:28; 2 Mbatesalonika 3:12) Shi m zua a azende a mimi ken nongo u Kristu kpaa. (Marku 10:29, 30) M sugh Yehova a ishima yam cii sha kwagh u a tesem ne.

“Yange taver mo kpishi u geman uma wam.”—DAVID HUDSON

ANYOM: 72

TAR NA: AUSTRALIA

INJAOR I YANGE LU YÔ: LU OR U MAN MSÔROM KPISHI

YIASE YAM: Yange m lu wan u terem, Willie man ngôm Lucy, u sha pue kar môm. Tsombor wam lu hen gar u marnya mba tar u Australia, u í yer ér Aurukun la. Gar ne ngu vegher u ken imbusutarimese ken kpentar u Queensland. I mar gar u Aurukun la hen ijiir i doonashe, hen kpeifi u Archer, ikyua a zegemnger. Mbamaren av tese se ônov vev u eren tato shi yaren suwa sha er se koson ayol a ase yô. Hen shighe la, gomoti wa tindi u yangen se mba se lu marnya u tar u Australia la u kôron inyaregh ave, nahan lu kwagh u se bende inyaregh ave ga, shi i lumun ér se due se zende kera kpaa ga.

Mbamaren av tesem aeren a dedoo sha afatyô ve cii, shi ve tese se ônov vev cica cii, u civir mbaganden mba hen ityô yase man u yan kwagh nan anmgbian. Sha nahan yô, se nengen mbaganden mba hen ijiir yase cii ser mba ungôôv asev man uter asev kua anmgbianev mba mbamaren asev kpaa.

 Terem yange sar ku, m lu anyom ataankarahar hen shighe la, tsô se mough se yem hen ijiir i mbamishen, i ior mba ve lu marnya u tar u Australia ken gar u Mapoon; gar ne ngu vegher u ken imbusutarimese i gar u Aurukun er ukilomita 150 nahan. Zum u m lu anyom 12 la, m hii u henen tom u kuran anyinya man ibua; m kura ibua sha ajiir kposo kposo zan zan m zurum anyom 50. Uma wam u orkuran ibua la taver kpen kpen. M maan msôrom kpishi hanma shighe. Uma wam ne vam a mbamzeyol kpishi man mbamtaver atô kposo kposo kpaa.

Iyange igen la, m ma ikyôhô kpishi, maa m mough m due ken hôtel la ze ze ze, m gba peren gbenda sha ihyongo i mato lu van ayem vough. Yange m tsa ken iyouci i zoron akuhe man i̱ wasen ior u den ikyôhô i man anyom ahar, nahan m hingir u den tom wam u kuran ibua la.

GBENDA U BIBILO GEMA UMA WAM LA: Shighe u m lu ken iyouci la, kwase ugen u lu boki wam yô, va nam ukôpi mba magazin u Iyoukura man Awake! ér m ôr. Nahan kpa, er m hen makeranta kpishi ga yô, m fa u ôron takerada tsembelee ga. Iyange igen yô, orbeenyol ugen u kuman anyom 83 vam inya sha iyange i oo ta kpishi yô. M lôhô un mer a̱ nyôr ker a̱ va ma mngerem ma ndôhôr. Tsô a nam ityakerada i pasen Bibilo igen, shi a tôndo zwa ér una hide a va pasem akaa a ityakerada ne i er yô. Shighe kar yô, se hii u henen Bibilo nduuluu. Tsô m hii u nengen mer gba u me gema uma wam sha er me er ishima i Aôndo yô.

Yange taver mo kpishi u geman uma wam. Nahan kpa, gbenda u ngôm yesem la na yô, m na orbeenyol u lu henen Bibilo a mo ne icivir kpen kpen, shi m tese icivir sha akaa a ken Bibilo a a lu tan mo iwanger sha mi la kpaa. Nahan je kpa, lu taver mo u tseghan iyol yam sha er me er Aôndo tom yô. Yange m nenge mer, gba u me fa hanma kwagh u i nger ken Bibilo cii.

Kpa kwagh ka a er yô, orgen u se eren tom imôngo yô wasem u geman mnenge wam ne. Or ne lu Orshiada u Yehova; yange tesem kwagh u i nger ken Mbakolose 1:9, 10 la. Ijiir la kaa ér gba u se̱ ‘vesen ken kwaghfan u Aôndo’ kpaa. Or u se eren tom ijiir i môm ne wasem u fan mer me za hemen u henen akaa a he, nahan ityôkyaa lu i me cia u civir Aôndo sha ci u mfe wam vese ga yum ga.

Er m hii u kumban vea Mbashiada mba Yehova yô, m nenge a akaa a doon mo kpishi ken a ve. M nenge a ior mba sha ajiir kposo kposo lu civir Aôndo imôngo ken mzough. Mzough ve ne wasem u nan jighjigh a akperan shio mer m zua a kwaghaôndo u mimi, nahan m er batisema m hingir Orshiada u Yehova ken inyom i 1985 la.

IWASEN I M ZOUGH A MI YÔ: M seer fan takerada u ôron, nahan hegen ne hanma kasua yô ka m vihi shighe kpishi sha u tesen mbagenev takerada u ôron shi henen Bibilo a ve kpaa. Kwagh ugen yô, kwase u lu boki wam, u yange nam magazin u Iyoukura man Awake! la kpa, yange hen Bibilo vea Mbashiada, nahan i er un batisema, hegen ne ngu kwase wam u doon mo ishima. Saan se iyol kpishi u wasen ior mba ve lu marnya u tar u Australia la u henen kwagh u Yehova Aôndo.

[Ngeren u shin kpe]

[Mkaanem ma sha peeji 21]

Saan mo vea kwase wam iyol kpishi u wasen ior mba ve lu marnya u tar u Australia la u henen kwagh u Aôndo