Kporom Hen Aôndo

“Tôô Ase Wan Wou”

2 UTOR 4:8-37

KU U wanye ka môm ken akaa a hemban nyoon ken ishima a a eren uumace yô. Yehova Aôndo ngu a tahav mbu sôron mzeyol ne. Se fa ser kape i lu je la, sha ci u yange na ior kpuaa agee sha ayange a i lu ngeren Bibilo la, nahan ve nder ior shin ku. Môm ken ior mba i nder ve shin ku er i pase ken 2 Utor 4:8-37 nahan yô, lu wannomso ugen u profeti Elisha nder un yô.

Kwagh ne yange er ken gar u Shunem. Ikyômkwase ugen vea nom na yange ve eren erdoo a Elisha, ve naan un kwaghyan man ijiir i tsan hanma shighe. Iyange igen yô, profeti u lu a iwuese kpishi sha erdoo ve ne kaa a kwase ne ér: “Inyom á va hurugh á kuman hen shighe ne yô, ú wa wan ikyum.” Kwase ne hen ér una tsa a mar wan sha won ga, kpa er Elisha ôr a na nahan, á mar wannomso. Kpa kwagh ka er i vihi yô, iember na ne ngôôr ga. Anyom nga kar kpuaa yô, ityough nande wan ne kpoghuloo shighe u ve yar ken ityev yô, nahan i tôô un i hide a na ken ya, a va kpe “sha ikyum” i ngô na. (Ivur 16, 19, 20) Tsô ngô u ure ku u wan na kpishi ne, tôô ikyom i wan na u cuku ne gedee penda sha gambe u profeti ne tsaan sha mi hanma shighe la.

Fese nahan kwase la mough, sôn nom na ian, maa yem zende u kuman er ukilomita 30 nahan, za nenge a Elisha hen Uwo u Karmel. Yange nenge a Elisha je kpa, ngor sha imo i mlia vaa shin er ma kwagh ugen sha u tesen ijungwen na i tsung la ga. Lu sha ci u kwase ne vande ungwan ér Eliya, profeti u Elisha kar tile sha ityough nagh la yange vande nderen wan u kwasecôghol ugen shin ku ve taver ishima vaa ga yee? (1 Utor 17:17-23) Kwase u ken Shunem ne na jighjigh ér Elisha una nder wan na er Eliya kpa yange nder wan u kwasecôghol la shin ku nahanaa? A̱ lu nyi je yange i na ve kwase ne vaa ga kpa, á venda u hiden yemen ken ya na ér saa Elisha a̱ va a na imôngo.

Mba hidi ken Shunem imôngo yô, Elisha nyôr ken kparyou u vanden tsan ker hanma shighe ne, tsô a nenge a ikyom i wanakiriki la “sha gambe.” (Ivur 32) Profeti ne maa hii u eren msen hen Yehova, man alaghga yange er msen ne tsung je. Er Elisha kôr ikyum i wanakiriki ne la, “iyol i wan la gba tseen” kure kure. Tsô ishima i wan ne, i i de u kumen la hide gba kumen her! Elisha maa yila ngô na, ôr un mkaanem ma a̱ shi nan kpa yange ma gema ijungwen na hingir iember i tsung yô. A kaa a na ér: “Tôô ase wan wou.”—Ivur 34, 36.

Ngeren u a er kwagh u mnder u yange i nder wan u kwase Shunem shin ku ne na se ishimaverenkeghen man msurshima kpaa. Yehova kav er ishima ka i lu mbamaren mba wan a saa ve la ker yô. Heela tseegh ga, sar un u va hiden nderen ônov mba ve saa ku la. (Yobu 14:14, 15) Mnder u Elisha man mbagenev sha ayange a i lu ngeren Bibilo la nder ior shin ku la ka ikyav i tesen kwagh u Yehova una er sha gbenda u vesen ken tar na u he u perapera, u ú lu van la yô. *

Ityendezwa i Bibilo i er sha kwagh u mnder u shin ku la i̱ kar a mnyoon u ka se zua a mi zum u or kpe se la kera ga. Orkristu u jighjigh ugen u wan na u môm môm saa ku yô, kaa ér: “Ijungwen yam ia bee kera vindi vindi ga zan zan saa iyange i me shi me kôr wan wam la.” Nenge er u va hide u lu vea ior ou mba ve saa ku la ve a doo u sha wono. Aluer u hen er u va bende ve ave iyol hen shighe la tseegh kpa, ijungwen you la ia pande. U soo u seer henen kwagh u Aôndo u a ne se ishimaverenkeghen i dedoo nee?

[Ngeren u shin kpe]