Hen Kwagh Ken Mkaanem Ma Aôndo

Ka An Nan Lu Aôndo?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Ka An Nan Lu Aôndo?

Ka Aôndo u mimi la a gbe akaa cii ye. Bibilo i yila un ér “Tor u tsôron,” inja na yô ngu a mhii ga shi mayange una lu a mkur kpaa ga. (1 Timoteu 1:17) Er Aôndo a lu Imbor i uma yô, ka un tseegh a kom u se civir un ye.—Ôr Mpase 4:11.

2. Aôndo yô, Ngu Nena?

Or môm ngu a nenge a Aôndo ga sha ci un ngu a iyol i ken Jijingi, inja na yô mlu u uma na hemba u akaauma a iyolough aa a lu shin tar ne la. (Yohane 1:18; 4:24) Akaa a Aôndo a gbe la wase se u fan aeren a na. U tesen ikyav yô, ka sea hen sha kwagh u atam a ikyon kposo kposo kua uimondon mba ve lu kposo kposo la yô, se mase nengen a dooshima u Aôndo kua kwaghfan na la. Er sha man tar ve kehe kpishi yô kwagh ne tese se er Aôndo a lu a tahav kpishi yô.—Ôr Mbaromanu 1:20.

Se fatyô u seer henen kwagh u aeren a Aôndo ken Bibilo. U tesen ikyav yô, Bibilo pase se akaa a Aôndo a soo la man aa a soo ga la, man er a eren kwagh a ior yô, kua gbenda u kwagh ka una er ve a nenge sha mi la.—Ôr Pasalmi 103:7-10.

3. Aôndo Ngu a Iti Jee?

Yesu yange kaa ér: “Ter wase u Sha, i̱ tsegha iti You.” (Mateu 6:9) Aôndo ngu a atiatom kpishi, kpa gema ngu a iti i môm tseegh. Hanma zwa yô, mba yer iti ne ker kposo. Mba yer iti ne ken zwa Tiv ér “Yehova.”—Ôr Ekesodu 6:3.

I dugh iti i Aôndo ken Ubibilo kpishi kera, i gema i nger ititom i Ter shin Aôndo la sha ityough ki iti la. Kpa shighe u yange i nger Bibilo la, iti i Yehova due ker kuma er ajiir 7,000 nahan. Yesu yange una pasen ior Mkaanem ma Aôndo yô, a ôr ve kwagh u iti i Aôndo la. Yange wase ior ve hingir u fan Aôndo.—Ôr Yohane 17:26.

 4. Yehova We Se Ikyo Je Kpa?

Yehova ongo mbamsen asev iyol na, nahan a tese ér kwagh wase gba un ishima. (Pasalmi 65:2) Ican i ior kpishi ve lu yan nyian ne tese ér Aôndo wa se ikyo ga shinii? Ior mbagenev mba kaan ér Aôndo de ér se ya ican sha u una kar se, kpa kwagh ngu nahan ga. Bibilo kaa ér: “Aôndo Una er iferkwagh mayange ga.”—Yobu 34:10; ôr Yakobu 1:13.

Aôndo na se ian i tsuan kwagh u se soo la, sha nahan yô a na se icivir sha ieren na ne. Doo se kpishi er se lu a ian i tsuan u civir Aôndo nahan ga he? (Yosua 24:15) Ican i yan dumbur sha ci u ior kpishi tsua u eren mbagenev aferakaa. Yehova ka una nenge ior a eren aferakaa angan nahan i vihi un kpishi.—Ôr Genese 6:5, 6.

Ica ia gba ga tsô, Yehova una tindi Yesu sha u a̱ va bee a ican i yan shi a̱ tim mba ve ne mbagenev atsan la kpaa. Kpa Yehova gema ngu a ityôkyaa i dedoo i i ne ve a de ér ican i yan i hila za hemen sha anshighe kpuaa yô. Kwaghngeren ugen u sha itinekwagh ne una pase ken hemen er i hii ve Aôndo a de ér uumace ve ya ican yô.—Ôr Yesaia 11:4.

5. Aôndo soo ér se̱ er nyi?

Yehova gba se na se tahav mbu fan un shi soon kwagh na kpaa. A soo ér se hen mimi sha kwagh na. (1 Timoteu 2:4) Aluer se hen Bibilo yô, se hingir u fan Aôndo, una lu Ijende yase.—Ôr Anzaakaa 2:4, 5.

Er Yehova a ne se uma yô, gba u una hemba doon se ishima a hemba hanma orgen cii. Se fatyô u tesen Aôndo ser a doo se ishima sha u lamen a na ken msen shi eren akaa a a kaa ér se̱ eren la kpaa. (Anzaakaa 15:8) Yehova kaa ér se̱ eren kwagh a mbagenev sha dooshima.—Ôr Marku 12:29, 30; 1 Yohane 5:3.

Wea soo u seer zuan a iwanger yô, ôr ityough 1 ki takerada u Bibilo Tese Ér Nyi Jimi? ka Mbashiada mba Yehova ve gber u ye.

[Foto u sha peeji 17]

Ma ityôkyaa i dedoo ngi, i í ne ve Aôndo a de ér ican i er ior sha anshighe kpuaa je he?