Mpin U Mbaôron Takerada Ne . . .

Mbashiada mba Yehova mba a kasev ken a ve mba ve lu mbatesen yôô?

▪ Een, Mbashiada mba Yehova mba a kasev umiliôn imôngo sha tar jimin cii, mba ve lu mbatesen yô. Kasev mba ve pasen loho u dedoo u Tartor u Aôndo ne mba ikyum i vesen. I ôr kwaghôron u profeti sha kwagh ve ken Pasalmi 68:11 ér: “Ka Ter man A kaa imo Na ye; kasev mba ve yôôn loho u dedoo ka ikyum i vesen.”

Nahan kpa, tom u tesen ior, u kasev mba ve lu Mbashiada mba Yehova ve eren ne, kaha kposo a tom u pasen adua, u kasev mba ve hemen ken ukwaghaôndo mbagenev ve eren la. U kaha sha igbenda i nyi?

Kasev mba ve hemen ken ukwaghaôndo mbagenev, hemban je yô mba ve hemen ken mbaadua la, mba pasen adua ken ucôôci vev. Kpa kasev mba ve lu Mbashiada mba Yehova yô, ka ior mba ken nongo u Kristu ve la, ve pase ve adua ga, kpa ka ve due ve za pase ior kwaghaôndo sha uya uya kua sha ajiir agen kpaa.

Shi tom u kasev mba ve lu Mbashiada mba Yehova, ve eren la kaha kposo a tom u kasev mba ken ukwaghaôndo mbagenev ve eren la. Kasev mba pasen adua mba ken ukwaghaôndo mbagenev man ucôôci mbagenev ka ve hemen ior vev shi ve tesen ve aeren a kwaghaôndo ve. Nahan kpa, kasev mba ve lu Mbashiada mba Yehova yô, mba tesen ken nongo u Kristu, shighe u nomso mba ve er batisema ve lu her la ga. Ka nomso mba i tsough ve ve lu mbatesen la tseegh ve tesen ken nongo u Kristu ye.—1 Timoteu 3:2; Yakobu 3:1.

Bibilo tese ér ka nomso tseegh i ne ve tom u hemen ken nongo u Kristu ye. Nenge ase kwagh u apostoli Paulu yange nger hen Titu, u un kpa lu orkuran er Paulu nahan la. Paulu kaa ér “Kwagh u m undu u ken Krete yô, ka sha u . . . ver mbatamen sha agar agar.” Paulu shi kaa ér nomso mba i tsough ve cii yô, ve lu “ior mba ve lu a acôghor iyol ga man ior mba ve lu a kwase môm” tseegh yô. (Titu 1:5, 6) Timoteu kpa Paulu yange wa un imba kwagh ne. A kaa ér: “Aluer or ngu keren u lun orkuran yô, ka tom u dedoo u sar nan ye. Orkuran yô, ka u nana̱ lu a acôghol a wan iyol ga keng je, nana̱ lu or u kwase môm, . . . man or u fan ityesen kpaa.”—1 Timoteu 3:1, 2.

Er nan ve i lu nomso tseegh i ne ve tom u nengen sha nongo u Kristuu? Paulu kaa ér: “Kpa u tesen yô, m lumun mer, kwase nana̱ tese ga, shin u eren tahav sha nom u nan kpaa ga, kpa nana̱ lu ving. Gadia ka Adam i vande gban un man i mase Ifa ye.” (1 Timoteu 2:12, 13) Sha nahan yô, er Aôndo vande gban Adam a Ifa yô, tese ér a soo ér i lu nomso ve tesen ken nongo u Kristu shi ve nengen sha u kpaa ye.

Ior mba Yehova cii mba dondon ikyav i Yesu Kristu, u a hemen ve la, sha u tesen mbagenev. Orhenen Luka yange ôr kwagh u tom u Yesu ér: “A gba zenden nyôron ken agar a tamen man angarev mba kiriki, lu ôron kwaghaôndo, pasen Loho u Dedoo u tartor u Aôndo.” Shighe kar yô, Yesu tindi mbadondon un ér ve kpa ve za er tom shon. Bibilo kaa ér: “Ve gba zenden nyôron angarev mba kiriki, ve lu ôron ior Loho u Dedoo.”—Luka 8:1; 9:2-6.

Nyian kpa, nomso man kasev mba ve lu Mbashiada mba Yehova cii, mba tesen mbagenev sha gbashima, er Yesu tsengaôron nahan, ér: “Loho u Dedoo u tartor ne yô, á ôr u á tser tar, sha u u̱ lu mpase hen akuraior cii; ka zum la man mkur una kuma ye.”—Mateu 24:14.