SHA iyange i Agusutu 28, inyom i 1963 la, orhemen u ior mba keren ér i na ve ian i eren akaa sha ishima ve ugen ken tar u Amerika, u i yilan un ér Martin Luther King, Jr. la, ôr ishember igen ken kwaghôron na u a ze gwa yum la, ér “M ngu a ishimaverenkeghen.” King yange ôr mkaanem man kuma anyom akunduahargber hegen. A pase ishimaveren na ér, shighe ngu van u ior cii vea lu ken mzough, a kera nyaghen mbagenev ga yô. Er yange lam a ior mba ken tar u Amerika nahan kpa, ior mba ken ityar igen kpishi kpa lumun a ishimaverenkeghen na la.

King yange ôr kwagh la iwer ngi kar itiar yô, sha iyange i Novemba 20, 1963 la, ityar i hemban 100 i ken Mzough u Ityar Cii er iceghzwa ér ia kar a hanma ieren i nyaghen akuraior agen la cii kera. Er anyom lu karen yô, ityar kposo kposo sha tar cii lu eren uiceghzwa mbagenev kpaa sha u yangen ieren i nyaghen mbagenev la. Akaa a dedoo a ityar kposo kposo lu eren sha u been a mzeyol ne wase kpa?

Sha iyange i Maaci 21, 2012 la, Akawe u Tamen u Mzough u Ityar Cii, Ban Ki-moon kaa ér: “Ityar kposo kposo zua zwa shi ker igbenda i dedoo kpishi i been a kwagh u mbavia a mbavia man ieren i nyaghen akuraior agen man mcie u cian ior mba ken ityar igen kua ambaakaa la nahan. Nahan cii kpa, kwagh u mbavia a mbavia ngu zan hemen her, nahan ior umiliôn umiliôn mba yan ican sha tar wuee.”

Ken ityar i í nôngo u been a kwagh u mbavia a mbavia kua ieren i nyaghen mbagenev la yô, ior dugh aeren a a ye tor ken asema a ve ne kera vindi vindii, shin ve kighir a kighir sha u i de fe ve a mi ga di tsôô? Mbagenev na jighjigh ér iniôngon ne ka i wase u yangen msange u sha dooshima tsô, kpa ia fatyô u karen a ieren i nyaghen mbagenev la kera ga. Sha ci u nyi? Sha ci u msange u sha dooshima ka ieren i í nengen a mi yô, shi ka kwaghbo u i tsahan ior sha mi yô. Kpa ieren i nyaghen mbagenev la yô, ka kwagh u ken atô ishima, nahan a fatyô u yangen i ga.

Sha nahan yô, aluer gba u a bee a ieren i nyaghen mbagenev la yô, a gba u a gema gbenda u ior ve nengen mbagenev la, a lu di ieren i sangen mbagenev sha dooshima la tsô ga. Kpa a fatyô u geman gbenda u ior ve nengen mbagenev la jee? A er kwagh ne nena? De se time sha kwagh u ior mbagenev kpuaa, nahan se nenge er or a fatyô u den ieren ne yô, man kwagh u una wase nan u den i la kpaa.

Linda: I marem shin tar u South Africa. Yange m nengen ior mba shin South Africa mba ve lu abuter ga cii mer ve gba kwagh ga shi ve fa takerada ga shi or a fatyô u nan ve jighjigh ga, shi mba ikpan i abuter tseegh tsô. Ieren i nyaghen mbagenev la yange i ya tor ken a mo, man m fa ivulugh ga cii. Kpa m hiin u henen Bibilo yô, m hii u geman mnenge la. M hen ken Bibilo mer “Aôndo ka u sangen a sange ior ga” shi ishima yase hemba gban un kwagh a mlu u iyol yase shin zwa u se lamen la. (Aerenakaa 10:34, 35; Anzaakaa 17:3) Takerada u Mbafilipi 2:3 wasem u fan mer, aluer m ngu nengen hanma or mer nan hembam yô, me dugh ieren i nyaghen mbagenev la ken a mo kera. Er m lu dondon akaawan a Bibilo ne nahan yô, kwagh u mbagenev gbam ishima tsung, ior-il man abuter cii. Hegen m nenge mer i saghem ken ikyangenev mbi ieren i nyaghen mbagenev la i tuhwa.

 Michael: M vese ken tar u Australia, hen ijiir i abuter a ken tar u la a hembe ngeen yô, nahan m hingir u lun a ieren i nyaghen ior mba ken Ashia, hemban je yô ior i tar u China. Yange mea nahan mato man mea za nenge a or u nan bee or u ken Ashia yô, m bugh ijingi i mato m gba tuhwan nan kaan mer, “Yem tar wou, we or u ken Ashia ne!” M va hiin Bibilo i henen ken masejime yô, m mase kaven gbenda u Aôndo a nengen ior la. Ka vea due han han shin mlu u ishigh vev ka una lu nan nan je kpaa, ve doo un ishima. Dooshima u Aôndo ne kôrom ken ishima, nahan m gema ihyom yam la hingir dooshima. Mgem wam ne kpilighyol kpishi. Hegen ka i doom kpishi u lun imôngo vea ior mba mbamlu vev ve kaha a u wam shi ve dugh ken ityar igen la. Kwagh ne wasem u lun a mnenge u vough shi a nam iember kpishi.

Sandra: Yange i mar ngôm hen geri u Umunede, shin kpentar u Delta, ken Najeria. Terem di due shin kpentar u Edo; lamen zwa u Esan. Er ngôm man terem due ijiir i môm ga yô, tsombor u terem soo ngôm ga zan zan kar kpen. Kwagh ne na yô, m bum mer mayange kwagh a zuam a or u nan lu mar u Esan ga, shi or môm u shin kpentar u Edo kpa me vôso ga. Kpa m va hiin u henen Bibilo yô, m hii u geman mnenge wam ne. Er Bibilo i kaa ér Aôndo sangen a sange ior ga, shi lumun hanma or u nan cie un yô, a er nan ve mo me nyaghen ior sha ci u zwa ve shin ikyur i ve dugh ker laa? Yange m gema mhen wam shi m hime iyongo a tsombor u terem. Er m lu dondon akaawan a Bibilo yô, saan mo iyol shi m zua a bemshima kpaa. Kwagh ne shi wasem u lun ken bem vea ior mba lamen ijô igen, shin ior mba ken ityar igen, shin ior mba mbamlu vev ve kaha a u wam yô. Man or u m vese la di ka unô? Ka or u shin kpentar u Edo, man ka or u Esan!

Bibilo wase ior mban kua mbagenev kpishi u hemban ieren i nyaghen mbagenev i yange ve lu a mi taveraa la sha ci u nyi? Ka sha ci u Bibilo ka Mkaanem ma Aôndo. Ngi a tahav mbu geman gbenda u  or henen kwagh u mbagenev shin gbenda u nan nengen ve la. Heela tseegh ga, Bibilo tese kwagh u a er ve a kar a hanma ieren i nyaghen mbagenev la cii kera yô.

Shin er mfe u Bibilo una fatyô u wasen or u den ieren i nyaghen mbagenev la nahan kpa, gba kpee u a vande karen a akaa agen ahar kera ve ieren i nyaghen mbagenev la kpa ia bee ye. Hiihii yô, se mba mbaasorabo shi se yina. Bibilo ôr wang ér: “Or u den eren isholibo nan ngu ga.” (1 Utor 8:46) Sha nahan yô, ka sea nôngo nan nan kpa se tagher a kwagh u yangen se u eren kwagh u vough, u apostoli Paulu kpa tagher a mi la. A nger ér: “Ka a saren mo u eren kwagh u dedoo yô, kwaghbo kpaa a lu a mo her.” (Mbaromanu 7:21) Nahan yô, ashighe agen ishima yase i i̱ lu vough ga ne, ka i hen “akaabo” a nga a na se hingir u nyaghen mbagenev yô.—Marku 7:21.

Kwagh u sha uhar yô, Satan Diabolo ngu tsughun ior. Bibilo kaa ér ngu “orwuanor” shi ngu “tsughun tar cii” kpaa. (Yohane 8:44; Mpase 12:9) Kwagh ne pase er i hii ve ieren i nyaghen mbagenev la i dumbur yô, kua ityôkyaa i i ne ve i lu kwagh u uumace vea fatyô u been a ieren i nyaghen mbagenev man msange u sha dooshima man atemtyo kua kwagh u mbavia a mbavia man ayôôso a kwaghaôndo man ihyom i kôron ga yô.

Nahan yô, saa a kar a isholibo man myen u uumace kua Satan Diabolo kera keng ve, ieren i nyaghen mbagenev la kpa ia bee ye. Bibilo kaa ér Tartor u Aôndo ua er kwagh ne.

Yesu Kristu yange tese mbadondon un ér ve sôn Aôndo, ve kaa ér: “Tartor Wou u̱ va, i̱ er ishima You shin tar kpaa vough er i eren i Sha nahan.” (Mateu 6:10) Ka Tartor u Aôndo ua bee a iferkwagh man ihyom i kôron kua hanma ieren i nyaghen mbagenev la cii ye.

Shighe u Tartor u Aôndo ua va hii u hemen tar ne jimin cii la, a “kange” Satan, shin a yange un, una “kera tsughun akuraior ga.” (Mpase 20:2, 3) Maa a gema tar ua hingir “tar u he u perapera una tema ker yô,” ka mlu u uumace u he je la. *—2 Peteru 3:13.

Mbaperapera mba vea lu uma ken tar u he la cii vea hingir vough, a isholibo shio. (Mbaromanu 8:21) Er Tartor u Aôndo ua lu hemen ve yô, “vea vihi kwagh ga, vea tim kwagh” kpaa ga. Sha ci u nyi? “Gadia tar ua mgbough a mfe u TER.” (Yesaia 11:9) Hen shighe la, uumace cii vea hen kwagh u Yehova Aôndo shi vea dondo aeren a na a doon tsung la kpaa. Kape a va bee a hanma ieren i nyaghen mbagenev la kera je ne, “gadia hen Aôndo yô, msange u sha dooshima ngu je ga.”—Mbaromanu 2:11.