Uumace vea yem hemen hemen a mfe ve u sainsi la je ka u henen a hen ga. Kpa ve tseegh vea na ior i tar ne ia hingir u wan mbagenev ikyo sha mimii? Ei. Nyian ne, ka hua kua ieren i or wan iyol i nan ikyo tseegh la i hemen tar ne ye. Nahan kpa, Aôndo wa ishima u eren kwagh u injaa sha ci u uumace cii.—Ôr 2 Peteru 3:13.

Mkaanem ma Aôndo ôr kwagh u tar u ken hemen, u ior mba vea lu ker cii vea doo ayol a ve sha mimi yô. Ior vea tema ker bem bem, shi ma or u eren ve kwaghbo kpa nana lu ga.—Ôr Mika 4:3, 4.

Aôndo yange gba or ér nana lu a ieren i wan iyol i nan ikyo tseegh la cuku tsô kpaa ga. Kpa er orumace u Aôndo hii gban la va hemba un ato yô, or shon kera lu vough ga. Ka ken or la se uumace cii se dugh a ieren i wan iyol yase ikyo tseegh la ye. Nahan cii kpa, Aôndo una va gema uumace cii vea hide a lu vough, sha ikyev i Yesu.—Ôr Mbaromanu 7:21, 24, 25.

U kuren awashima u Aôndo ne yô, Yesu na nagh sha uma na, nagh kura maa koo kwaghbo u ihyembeato i orumace u hiihii la i ve a mi la. (Mbaromanu 5:19) Sha nahan yô, kwagh u Yesu er ne na ka u mlu u uumace una va doo ken hemen tsung. Shighe la ior vea kera lu a ieren i wan ayol a ve ikyo tseegh, i ka i na ve er kwaghbo la ga.—Ôr Pasalmi 37:9-11.