ITINEKWAGH I TAMEN | MBAKPENEV VEA NDER—KWAGH A FATYÔ U EREN NAHANA?
Se Tsa Se Nenge a Ior Asev mba Ve Kpe la Je Kpa?
Vea fatyô u hiden lun umaa?
MLUMUN U BIBILO I NE YÔ: “Shighe ngu van u mba ve lu shin iwar cii vea ungwa imo [i Yesu], vea due kpaa.”—Yohane 5:28, 29.
Yesu yange tsengaôron ér ken hemen, shighe u Tartor na ua lu hemen tar la, mbakpenev cii vea due shin iwar kera. Fernando u se vande ôron kwagh na ken ngeren ugen la kaa ér: “Yange m ôr Yohane 5:28, 29 sha kwa u hiihii yô, kpiligh mo iyol. Kwagh ne yange nam ishimaverenkeghen i mimi, nahan m kera lu a akperan a tan sha kwagh u mlu u ken hemen ga.”
Sha ayange a tsuaa la, orjighjigh Yobu lu veren ishima keghen ér aluer un kpe kpa, Aôndo una va nder un. Yange pine ér: “Aluer or á kpe yô, shi nana lu uma?” Shi hide na mlumun vangertiôr ér: “Sha ayange a mnenge u sha ican yam ne cii me kegh me veren ashe, zan zan mdugh wam una kar kuman. Ú yila, mo me gema me vengese.”—Yobu 14:14, 15.
Mnder u i nder Lasaru shin ku la na se ishimaverenkeghen sha kwagh u mlu u ken hemen
Marta, anmgbian u Lasaru u kwase la yange vande fan er i lu u a va nder ior shin ku yô. Zum u Lasaru kpe kera la, Yesu kaa a na ér: “Anngôu una nder.” Marta gema kaa a na ér: “M fa, una nder sha mnder u sha iyange i masetyô la.” Yesu maa kaa a na ér: “Mo M ngu mnder man uma kpaa; or u nana nam jighjigh yô, shin nana kpe kpaa, nana lu uma.” (Yohane 11:23-25) Maa her je Yesu nder Lasaru! Kwagh u kpilighyol u er ne na yô, se tsenga nengen a akaa a hemban kpilighyol a aa va er ken hemen yô. Hen ase er a lu va nderen ior sha tar wuee ve a lu la!
A nder mbagenev vea yem shaa?
MLUMUN U BIBILO I NE YÔ: Mkaanem ma Aôndo tese ér mnder u shin ku u Yesu la kaha kposo a mnder u iorov anigheni mbagenev mba i er kwagh ve ken Bibilo la. Yange i nder iorov mba anigheni mbara ve hide ve lu uma shin tar ne. Kpa i ôr kwagh u mnder u shin ku u Yesu nahan ér: “Yesu Kristu . . . yem Sha, ngu ken uwegh ku yanegh ku Aôndo.” (1 Peteru 3:21, 22) Kpa kwagh ne saa sha Yesu tseegh, a kera nder orgen nana yem sha gaa? Yesu yange tsengakaan a mbaapostoli nav je ér: “Me yem Me za sôr ne ijiir yô, Me shi Me hide, Me va kua a ven sha er ne kpaa né lu hen ape M lu yô.”—Yohane 14:3.
Kristu yange yem sha za sôr ijiir sha ci u mbahenen nav mbagenev. Iyenge i ior mba a nder ve vea yem sha la cii a lu iorov 144,000. (Mpase 14:1, 3) Ve mba shon mba ve lu dondon Yesu hanma ijiir i a ze cii ne mba yemen sha vea za er nyi?
Ka u vea za er tom u vesen sha! Ruamabera kaa ér: “Or u nan lu a ci sha mnder u hiihii ne yô, saan nan iyol, nan ngu icighanor kpaa. Mban yô, ku u sha uhar la ngu a tahav sha a ve ga, vea gema vea lu upristi mba Aôndo man mba Kristu kpaa, vea tema tor a Na imôngo sha anyom dubu la.” (Mpase 20:6) Mba a nder ve vea yem sha la vea za lu upristi man ator vea Kristu, vea hemen tar a na imôngo.
Ka unô a mase nderen ve?
MLUMUN U BIBILO I NE YÔ: I nger mkaanem ma Aôndo yange mgbegha apostoli Paulu nger man ken Ruamabera, ér: “M ngu a ishimaverenkeghen sha Aôndo, ka kwagh u mban ayol a ve kpaa ve lu keghen je, ka mnder u mbaperapera kua mba ve lu perapera ga vea nder shin ku la.”—Aerenakaa 24:15.
Mkaanem ma Aôndo na se ibumun ér mbakpenev ubiliôn imôngo vea va hide a lu uma
Ka unô ve lu ken nongo u Paulu a yer ér “mbaperapera” laa? Nenge ase ikyav ne. Yange i pase orjighjigh Daniel shighe u zurum u una kpe la ér: “Ú mem, man ú mough ú tile sha kwar wou, sha mkur u ayangegh.” (Daniel 12:13) Ka han a nder Daniel shin ku una luu? “Mbaperapera vea ya dyako u tar, vea lu ken u gbem.” (Pasalmi 37:29) Shi Yesu kpa yange tsengapasen ér: “Saan mba ve lu a ishima i legh legh la iyol, gadia tar ua lu dyako ve je.” (Mateu 5:5) A nder Daniel man nomso man kasev mbajighjigh mbagenev vea hide a lu uma sha tar gbem sha won.
Ka unô ve lu ken nongo u Paulu a yer ér ka “mba ve lu perapera ga” laa? Ka ior ubiliôn imôngo mbagenev mba yange ve lu uma zan zan ve kar kpen, kpa ve zua a ian i kaven mimi u ken Bibilo, shi eren sha mi ga la. Zum u a nder ve kera la, vea kôrcio u fan kwagh u Yehova * man Yesu shi wuese ve kpaa. (Yohane 17:3) Mba ve tsough u civir Aôndo cii vea va lu uma gbem sha won, er Yehova nahan.
Mba ve tsough u civir Aôndo cii vea va lu uma gbem sha won ken mkpeyol man msaanyol u been mayange ga
Uma una lu nena shin tara?
MLUMUN U BIBILO I NE YÔ: Aôndo “Una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga.” (Mpase 21:4) “Vea maa uya man vea tema keregh, vea kaha ishule i ikyon i wain, man vea ya atam a i.”—Yesaia 65:21.
Hen er u lu ken mlu la vea ior ou ve a lu u la! Kpa mpin ugen yô, A er nan ve u fa wer mimi je mba va nderen ior shin kuu?
^ par. 15 Bibilo tese ér Yehova ka iti i Aôndo.
