Yange i marem hen geri u Tiranë, gartamen u tar u Albania. Mbamaren av lu a kwagh ga. Terem lu or u eren kwagh sha mimi, shi yange a er tom ahwa imôngo sha er una zua a inyaregh ki nengen sha a vese yô. Kpa inyaregh ki yange a zua a mi la ki kuma u koson se ga. Shighe u m lu gumor la, yange mea nenge er se kungu ican nahan, vanger a varem ker kpen kpen. Shighe u m lu iyev la, yange m hemban zenden angahar gbilin, sha ci u m lu a akôv a wan ga, shi m zuan a kwaghyan ga.

 Yange m hii u iin shighe u m lu yev la je. M tôô mer m ngu wasen u keren kwaghyan sha ci u tsombor wam di tsô. Ken masejime yô, dasenda va kôrom. Nahan, ken inyom i 1988, shighe u m lu anyom 14 la, terem tôôm za wa sha makeranta u kôôm mbayevnomso mba eren afer. M tsa ken makeranta la anyom ahar, shi m hen tom u welda. M been makeranta la yô, m soo mer me keren inyaregh sha mimi. Nahan kpa, m fatyô u zuan a tom ga. Ior kpishi ken tar u Albania lu zuan a tom ga, sha ci u mbapatii lu eren ayôôso ken tar la kpoghuloo. M kera fe kwagh u me er ga yô, m hide m za kohol azende a am a tse, maa shi m hide m gba iin. Ken masejime yô, i va kôrom kua a azende a am la, i za wuhe se ken purusu anyom atar.

 Yange mba dughun mo ken purusu kera yô, shi m za hemen a afer a am a eren. Shighe la, inyaregh ki tar u Albania kera gba kwagh ga, nahan akaa kera lu zan hemen ken tar la sha inja ga. Hen shighe u akaa hingir nzughul nzughul ne, m lu eren aferakaa zuan a inyaregh kpishi. Kwagen la se za ii, maa i kôr agumaior agen ahar ken se mba se za iv mbu shon la. Nahan maa m yevese m due ken tar u Albania kera, sha ci u lu u a kôrom yô, a wuhem me tsa ken purusu gbem. Hen shighe ne, m vôso kwase wam Julinda, shi se lu a wan u nomso sha ave.

 Yange se yem ken tar u Ingila. M lu a awashima u hiin uma u he vea kwase wam kua wan wase la. Kpa ifer ya tor ken a mo, nahan taver mo u den uma wam u tse la kpishi. Nahan ica gba ga tsô maa shi m gba eren afer. Kwa ne yô, m lu teen mcimbim ma bom, nahan m lu a inyaregh kpishi.

 Julinda yange nenge kpenga wam u teen mcimbim ma bom la nena? A kaa sha zwa na ér: “Shighe u m lu vesen ken tar u Albania la, yange i sarem kpishi u duen ken ican kera. Nahan m soo mer me kar u eren hanma kwagh cii, sha er me va lu ken mkpeyol yô. M lu henen mer aluer se mba a inyaregh yô, se lu ken mkpeyol. Nahan m lu wasen Artan kpoghuloo, se lu eren aie shi iin shi teen mcimbim ma bom shi eren hanma inja kwagh cii imôngo, sha er se zua a inyaregh kpishi yô.”

 Ken inyom i 2002 la, kwagh va gema ken uma wase. Igbenda yase i zuan a inyaregh la cii kpum; kera lu u se fatyô u zuan a akaa a yange sar se la ga. Sha ci u i va kôrom a mcimbim ma bom yoholoo, maa shi i wuhem ken purusu.

 Yange Bibilo hii u geman mo kpa m fa ga. Ken inyom i 2000 la je, Julinda zua a orgen vea kwase na, ve lu Mbashiada mba Yehova, maa ve hii u henen Bibilo a na. Yange i maam iyol u lamen sha akaa a ken Bibilo ga, sha ci u i lum er iliam la ia ngôôr duen mo shima ga nahan. Kpa Julinda yô gema soo kwagh la dedoo. A kaa ér: “Tsombor wam ka ior mba civir Aôndo. Nahan m soo Bibilo shi m ne i icivir. Hanma shighe yange i doom u henen kwagh u Bibilo i tese yô, shi i saan mo iyol kpishi u henen Bibilo vea Mbashiada mba Yehova. Akaa a Bibilo i tese la kpishi yange m nenge yô, lu mimi. Kwagh u yange m hen la wasem u den akaa agen ken uma wam. Nahan kpa, m lu henen her di tsô mer ka inyaregh se lu a mi ve se tema ken mkpeyol ye, zan zan i va kôr Artan. Yange mba kôron Artan yô, mnenge wam sha kwagh u inyar maa gema. Ica i gbe ga yô, m mase kaven er kwagh u Bibilo i ôr sha kwagh u inyar la i lu mimi yô. Yange se er hanma kwagh u se fatyô cii ser se lu a inyaregh kpishi. Kpa kwagh ne va se a mkpeyol u se lu keren la ga. M mase nengen er i gbe u me eren hanma kwagh ken uma wam er atindi a Aôndo a tese la vough yô.”

 Ken inyom i 2004 la, i dughum ken purusu kera, kpa ica i gba ga tsô maa shi m soo u hiden hiin kpenga wam u teen mcimbim ma bom la. Nahan kpa mhen u Julinda gema sha kwagh u kpenga la. Yange ôr kwagh ugen a mo je m hen kwagh! A kaa a mo ér: “M kera soo inyaregh you ga. M soo mer nomom a hide hen ya, shi m soo mer a hide a va kohol ônov nav.” Lu kwagh u m hen mer una ôr ga yô, kpa kwagh u ôr ne lu shami. Sha ci u yange m kera lu vea tsombor wam hen ya ga je kuma anyom imôngo. Shi m hen sha atsan kpishi a yange m ya sha u keren inyaregh sha gbenda u mimi ga la kpaa. Maa m kaa mer me de igbenda inyar yam la, shi me due gbenda u azende a am la kpaa.

 Kwagh u yange na ve kera lu u me hide ijime ga jim jim yô, ka mkohol u Mbashiada mba Yehova u yange m za vea kwase wam kua ônov asev mba uhar la. Ior mba yange m zua a ve hen mkombo la, nomso man kasev cii, lu a mo sar sar, man lu sha mimi. Kwagh ne yange kpiligh mo iyol saa her. Ayange nga karen yô, mo kpa m hii u henen Bibilo.

 Yange m hen kwagh u Bibilo i kaa ne, ér “ieren i soon inyaregh la ka mise u hanma kwagh u vihin cii, nahan er i hange mbagenev tsung u zuan a ki yô, . . . ve hingir u nyôron ken atsan kpishi.” (1 Timoteu 6:​9, 10) M mase nengen a mimi u kwagh u Bibilo i ôr ne wang sha ci u ican i yange m ya la! Nahan m vaa afanyô kpishi sha kwagh u uma u yange m eren la, sha ci u kwagh la yange na yô, mo kua tsombor wam cii se ya ican je gande. (Mbagalatia 6:⁠7) Yange m fe mer se doo Yehova man Wan na Yesu Kristu ishima kpishi yô, m hii u geman uma wam. Kwagh kera gbam sha akaa a am kpishi ga, m hemba veren ishima sha akaa a mbagenev, shi m gema lun vea tsombor wam hanma shighe.

 Bibilo kaa ér: “De lu nen ior mba soon inyaregh ga, akaa a ne lu a mi la a̱ kuma ne.” (Mbaheberu 13:⁠5) M dondo kwaghwan u Bibilo ne nahan wasem kpishi. Hegen ishima yam mem shi m ngu a imoshima i wang. Kwagh ne na yô, hemba saan mo iyol hegen cii. Shi ivese yam vea kwase wam hemba doon, shi tsombor wam seer kporom ikyua a Yehova.

 Yange m henen mer aluer se mba a inyaregh kpishi yô, a saan se iyol. Kpa hegen m nenge wang er ifer man ieren i soon inyaregh la yange na m ya ican kpishi yô. Se mba a inyaregh kpishi ga, kpa m nenge mer se zua a kwagh u a hemba lun a inja ken uma wase yô, ka ijende i se ye vea Yehova Aôndo la. Er se hen tsombor wase cii se lu civir un yô, saan se iyol sha mimi.