Tom wase u se eren sha tar jimin cii la ngu zan hemen sha ci u iyua i Mbashiada mba Yehova ve eren a mkighir shio la. a Ka i ver mbaakwati mba eren iyua hen ajiir a se eren mkombo her la, shi i̱ tese se igbenda igen i eren iyua sha ijiir yase i sha Intanet, ape i nger ér Donations la. Nahan or a fatyô u eren iyua hen ijiir ne sha ci u tom u se eren sha tar jimin cii la shin sha u kuren ma mgbe u se lu a mi hen ma haregh yô, gayô sha ci u atôakaa a ahar ne.

 I ver ishima ér Mbashiada mba Yehova ve naan môm-ken-upue ga, shi mba we ior iyua ga. (2 Mbakorinte 9:7) Se mba ningir a ikyagh ki eren iyua shimi ken mbamkombo asev ga shi se mba ngohol ior inyaregh ki nyôron adua kpaa ga. Heela tseegh ga, se mba a mbahemenev mba i kimbin ve inyaregh ki eren batisema shin ki iin ku man avese a zuan shin ambaakaa la nahan ga. Shi se mba eren akaa er bazaa shin u wan ior iwasen shin u eren iyua i sunda gayô iyua i iyiav mbi hev man iyua i ishughun nahan ga. Se mba sôron kaade shin se mba teen ityakeda man akaa a tseghan kpaa ga. Ior ka vea er iyua kpaa, mba pasen ati ve shin mba yôôn iyua i ve er la ga. (Mateu 6:2-4) Se mba yôôn kasua sha ijiir yase i sha Intanet shin ken ityakeda yase ga.

 Hanma uwer yô, hanma tiônnongo u Mbashiada mba Yehova ka a ôr inyaregh ki i zough a mi man ki i vihi la cii ken mbamkombo asev mba ior mbagenev kpa ve nyôron a vese imôngo la. Shi hanma shighe yô, ka i nengen kwagh u a lu ken ikpa-nyar i hanma tiônnongo la, sha er or a ya inyaregh ki i er iyua a mi la ga yô.—2 Mbakorinte 8:20, 21

•   Mbaakwati mba eren iyua shimi: U fatyô u kenden inyaregh gayô ceeke shin akwati u eren iyua u ka i ver ken Ayou a Tartor shin Ayou a Mkohol gayô sha ajiir agen a se nyôron mbamkombo la.

•   Iyua i eren sha intanet: Ken ityar igen yô, or a fatyô u eren iyua hen ijiir yase i sha Intanet ape i nger ér “Donate to Jehovah’s Witnessess” la. Ka i er iyua hen ijiir ne sha kaade u i yer ér credit card kua debit card la, shi or a fatyô u tindin a inyaregh hen ijiir ne sha igbenda igen kpaa. b Mbashiada mbagenev yô, ka ve “ver kwagh” hanma uwer, u vea eren iyua a mi sha ma gbenda u eren iyua ken igbenda i se vande teren la yô.—1 Mbakorinte 16:2.

•   Iyua i ka i gba u or nana vande wan iyol sha mi tsuaa yô: Igbenda i eren iyua igen yô, ka i gba u or nana vande wan iyol sha i tsuaa je, shin nana vande fan kwagh u tindi a pase sha gbenda shon u nan soo u eren iyua la yô. Or ka nana vande wan iyol nahan yô, ashighe agen nan kera vihi inyaregh kpishi sha kpandegh ku tan ga. Ior kpishi mba ve vande wan iyol yô, ka ve hemba fan akaa a vea na er ve lu uma her ne, shin or u nana ya dyako i akaa a ve la. Aluer u soo u eren iyua sha igbenda i í ter shin heen ne yô, vande pinen afishi a branci u Mbashiada mba Yehova aa hen tar wou, i̱ seer tan we iwanger:

  •   inyaregh ki or koso ken banke yô

  •   ishiôlansi man inyaregh ki or koso her sha ci u shighe u nana va de tom la

  •   inya shin ya

  •   shia man mtsera

  •   ngeren u tesen or shin ma nongo u ua ya dyako u or nan kpe yô, kua ngeren u nan orgen shin ma nongo inyaregh gayô akaa ou, wer or shon shin nongo shon u hila eren kwagh a mi

 Wea soo u fan igbenda i eren iyua hen ijiir you yô, za hen ijiir yase i sha Intanet ape i nger ér, “Donate to Jehovah’s Witnesses” la.