ЕХОВАНЫҢ ШАЯТЛАРЫНЫҢ Ёлбашчылык маслахатының агзасы Гай Холлис Пирс 2014-нҗи йылың март айының 18-ине сишенбе гүни 79 яшында ердәки яшайшыны тамамлады. Ол Исаның доганларының бири боланы үчин дирелип, гөкдәки сылагыны алды (Евр. 2:10—12; 1 Пет. 3:18).

Гай Пирс 1934-нҗи йылың ноябрь айының 6-сына АБШ-ның Калифорния штатының Оберн шәхеринде дүнйә инди ве 1955-нҗи йылда сувда чокундырылды. 1977-нҗи йылда болса, ол Пенни уя өйленип, чагаларыны улалдып етишдирди. Гай Пирс говы машгалабашы боландыгы себәпли, башгалар үчин хем ата ялыды. 1982-нҗи йылда ол аялы билен пионер гуллугына башлаяр. 1986-нҗы йылдан болса, АБШ-да 11 йыл айланян гөзегчи болуп гуллук эдйәр.

1997-нҗи йылда Гай ве Пенни Пирси АБШ-ның Бейтелине гуллук этмәге чагырдылар. Пирс доган Гуллук бөлүминде ишледи. 1998-нҗи йылда болса, оны Ёлбашчылык маслахатының кадрлар комитетиниң көмекчиси эдип белледилер. 1999-нҗы йылың октябрь айының 2-сине гечирилен Гаравул диңи ве китапчалар җемгыетиниң (Пенсилвания) йыллык душушыгында Пирс доганың Ёлбашчылык маслахатының агзасы эдип белленендиги барада билдириш эдилди. Ол соңкы йылларда кадрлар, языҗылар, неширят ве координаторлар комитетлеринде гуллук этди.

Пирс доганың мәхирли йылгырышы ве ерликли дегишмелери дүрли миллетдәки ве медениетдәки адамлары өзүне чекйәрди. Доган-уялар, эсасанам, онуң сөйгүси, кичигөвүнлилиги, Худайың догры када-канунларына хормат гойяндыгы ве Ехова болан берк иманы үчин говы гөрйәрдилер. Гай Пирс гүн яшмаса-да, Ехованың вадаларының хөкман ерине етҗекдигини айдярды ве муны адамларың билмегини ислейәрди.

Пирс доган көпленч ир эртирден гич агшама ченли ишләп, Ехова эрҗеллик билен гуллук эдйәрди. Ол бүтин дүнйә айланып, доган-уялары рухландырярды. Пирс доган ишлидигине гарамаздан, бейтелчилере-де, бейлеки доган-уялара-да маслахат бермек ве көмек этмек үчин вагт тапярды. Доган-уялар онуң мыхмансөерлигини, достлуклы гатнашыгыны ве Мукаддес Язгыларың эсасында рухландырандыгыны хәли-шинди ятлаярлар.

Мәхрибан достумыз Пирс доганың ызында аялы, 6 чагасы, агтыклары, човлуклары ве рухы чагалары галды. 2014-нҗи йылың март айының 22-сине шенбе гүни Ёлбашчылык маслахатының агзасы Марк Сандерсон Бруклиндәки Бейтелде Пирс доганы ятлап, нутук билен чыкыш этди. Ол нутугында Пирс доганың гөкдәки умыды барада айдып, Исаның шу сөзлерини окады: «Атамың өйүнде месгенлер көпдүр... Гидип ер тайярланымдан соң, сизиң хем Өз янымда болмагыңыз үчин ене гелип, сизи Өзүм билен алып гидерин. Сиз Мениң нирә барянымы, ёлы билйәнсиңиз» (Яхя 14:2—4).

Пирс доган, элмыдама, бизиң ядымызда болар. Биз онуң барҗак «ёлуны билендигине» бегенйәрис.