1, 2. Ехованың гуллукчылары нәмә гарашярдылар?

ЕХОВАНЫҢ гуллукчылары пыгамберликлериң ерине етмегине хемише гарашярдылар. Меселем, Ермея пыгамбер Яхуда юрдуның харабачылыга өврүлҗекдиги барада велилик этди. Хакыкатдан-да, шәхер б. э. өң 607-нҗи йылда бабыллылар тарапындан вейран эдилди (Ер. 25:8—11). Ишая пыгамбер болса шәхериң дикелдилҗекдиги барада ынам билен шейле дийди: «Оңа (Худая) интизарлар нәхили багтлы!» (Иш. 30:18). Худайың гадымы халкы барада пыгамберлик эден Мика болса: «Мен гөзлерими Реббе дикерин» дийди (Мика 7:7). Шейле-де Худайың гадымы гуллукчылары Месих хакындакы пыгамберликлериң ерине етмегине асырлар бойы гарашыпдылар (Лука 3:15; 1 Пет. 1:10—12) *.

² Шу гүнлерем Ехованың Шаятлары Месих барадакы пыгамберликлериң ерине етмегине сабырсызлык билен гарашярлар. Тизден Ехова Месихи Патышалык аркалы эрбетлиги ве залымлыгы ёк эдип, хорлукларың соңуна чыкар. Худайың халкы Шейтаның гол астындакы ыраң атып дуран залым дүнйәден азат боларлар (1 Яхя 5:19). Гелиң,  бу дүнйәниң соңуның голайдыгына шүбхеленмән оя болалың!

3. Дүнйәниң соңуна гарашян адамларда нәхили сораг дөрейәр?

³ Ехованың гуллукчылары хөкмүнде биз хем онуң ислегиниң «гөкде болшы ялы, ерде-де» амала ашмагына сабырсызлык билен гарашярыс (Мат. 6:10). Эмма кәбир адамлара бу дүнйәниң соңуны узага чекйән ялы болуп гөрнүп: «Бизде гарашмага дегерли себәп бармы нәме?» дийип биынҗалыкланярлар. Гелиң, бу сорагың җогабыны билелиң.

4. Оя болмак нәме үчин ваҗып?

⁴ Мукаддес Язгылар бу дүнйәниң соңуның гелмегине гарашян адамлара нәме этмелидигини маслахат берйәр. Иса Месих шәгиртлерине «хабардар» ве «оя болмагы» дуйдурды (Мат. 24:42; Лука 21:34—36). Шол себәпли бизем дүнйәниң соңуна гарашмалы. Оя болмак бабатда Худай бизе гурамасы аркалы гөркезме берйәр. Шейле-де эдебиятларымыз бизе «Худайың гүнүниң гелмегине гарашып, оны чалтландырмага» ве бар үнсүмизи Худайың вада берен тәзе дүнйәсине гөнүкдирмәге ярдам эдйәр (2 Петрус 3:11—13-нҗи аятлары окаң).

5. Биз соңкы гүнлерде нәме үчин оя болмалы?

⁵ Эгер I асырда яшан месихчилер дүнйәниң соңуна гарашан болса, онда бу бизиң үчин хас ваҗыпдыр. Нәме үчин? Себәби Месихиң гелмеги барадакы пыгамберликлер амала ашяр. Онуң аламатлары 1914-нҗи йылдан бәри ерине етип гелйәр. Дурмушың гүн-гүнден кынлашмагы ве Патышалык барадакы хош хабарың бүтин дүнйәде вагыз эдилмеги бизиң соңкы гүнлерде яшаяндыгымызы гөркезйәр (Мат. 24:3, 7—14). Иса соңкы гүнлериң нәче вагт довам этҗекдигини айтмады. Шол себәпли биз хемише оя ве хабардар болмалы.

6. Биз дүнйәниң ягдайының эрбетлешҗекдигини ниреден билйәрис?

⁶ Кәбир адамларың: «Белки-де, „ахырзамана“ хәзир дәл-де, хас кын дөвүрде гелер» диймеклери мүмкин. Мукаддес Язгыларда «соңкы гүнлерде» эрбетлигиң илерлеҗекдиги айдыляр (2 Тим. 3:1, 13; Мат. 24:21; Ылх. 12:12). Шол себәпли биз дүнйәниң хәзирки ягдайының хас-да песе дүшҗекдигини билйәрис.

7. Матта 24:37—39-нҗы аятларда соңкы гүнлер барада нәме айдыляр?

⁷ Адамлар «ахырзамана» хас кын дөвүрде гелер диймек билен нәмәни гөз өңүне тутярлар? (Ылх. 7:14). Белки-де, олар «агыр мушакгатдан» өң хер бир юртда уршуң, хер бир машгала оҗагында ачлыгың ве кеселчилигиң болмагына гарашяндырлар? Эгер шейле ягдай йүзе чыкса, онда танкытчылар хем Мукаддес Язгылардакы пыгамберликлериң ерине етйәндигини боюн алмалы боларлар. Эмма Иса көп адамларың өз ишлери билен башагай болуп, соңкы гүнлериң аламатларына үнс бермеҗекдиклерини айтды (Матта 24:37—39-нҗы аятлары окаң). Гөршүмиз ялы, Мукаддес Язгылар чекип-чыдардан хас кын дөврүң гелмегине гарашян адамларың нәдогры пикир эдйәндигини аян эдйәр (Лука 17:20; 2 Пет. 3:3, 4).

8. Исаның «оя болуң» диен табшырыгына гулак асян адамлар нәмә гөз етирйәрлер?

⁸ Исаның «оя болуң» диен табшырыгына гулак асян адамлар ахырзаманың аламатларының амала ашяндыгына долы гөз етирйәрлер (Мат. 24:27, 42). 1914-нҗи йылдан бәри соңкы гүнлериң аламатларының ерине етйәндиги месе-мәлим гөрүнйәр. Хава,  биз хәзир соңкы гүнлерде яшаярыс. Олар белли бир дөвүр довам эдип, бу залым дүнйәниң ёк эдилмеги билен тамамланар.

9. Биз дүнйәниң соңуна нәме үчин гарашярыс?

⁹ Шу гүнлер месихчилер дүнйәниң соңуның гелмегине нәме үчин гарашярлар? Себәби олар Иса Месихиң дуйдурышына гулак асярлар ве онуң гелмегиниң аламатына гөз етирйәрлер. Бизиң иманымыз бош затлара дәл-де, Мукаддес Язгылардакы велиликлере эсасланяр. Шол себәпли биз оя болуп, залым дүнйәниң соңуның гелмегине сабырсызлык билен гарашярыс.

10, 11. а) Иса өзүниң гелмеги барада нәме дийди? б) Ахырзамана энтек гелмез дийип пикир эдйән месихчилере Иса нәме дийди? (Макаланың башындакы сурата середиң).

¹⁰ Бизиң көпүмиз энчеме йылдан бәри рухы тайдан оя болмага җан эдйәрис. Эмма биз дүнйәниң соңы узага чекйән ялы болуп гөрнүнсе-де, оңа сабырлы гарашярыс. Биз Худайың чыкаран хөкүмини ерине етирҗек Исаның гелмегине тайяр болмалы. Иса шәгиртлерине шейле дийди: «Әгә, оя болуң, дога эдиң! Чүнки сиз ол вагтың хачандыгыны билмейәрсиңиз. Бу узак ёла чыкан адам киминдир. Ол өйүнден айрылып барярка, хызматкәрлерине ыгтыяр, хер хайсына-да өз ишини берип, гапының гаравулына-да оя болмагы табшыряндыр. Шейлеликде, оя болуң; чүнки сиз өй эесиниң агшаммы, яры гиҗеми, хораз гыгырандамы, эртир ирденми, хачан гелҗегини билмейәрсиңиз. Ол бирден гелип-де, укуда үстүңизи басаймасын. Сизе айдянларымы хеммелере айдярын: оя болуң!» (Мар. 13:33—37).

¹¹ Месихчилер Исаның 1914-нҗи йылда хөкүм сүрүп башландыгыны билйәрлер ве дүнйәниң соңуның тиз гелҗекдигине дүшүнип, тайярлык гөрйәрлер. Шол себәпли олар Патышалык барада ыхласлы вагыз эдйәрлер. Белки-де, Иса «хораз гыгыранда» я-да «эртир ирден» диймек билен, өзүниң бираз эгленҗекдигини айдандыр. Онда месихчилер нәме этмели? Иса: «Оя болуң» дийди. Диймек, узак вагтлап гарашяндыгың себәпли, месихчилер ахырзамана энтек гелмез я-да оңа гарашмак герек дәл дийип пикир этселер нәдогры боларды.

12. Хабакук нәме сорады ве Ехова оңа нәме айтды?

¹² Хабакук пыгамбер Иерусалимиң вейран эдилҗекдиги барада велилик этди. Шәхериң харабачылыга өврүлҗекдиги барада энчеме йылдан бәри пыгамберлик эдилйәрди. Шол гүнлер шәхерде «эрбетлер догручыллардан үстүн чыкярды, шейдибем, хакыкат ёюлярды». Шонуң үчин Хабакук пыгамбериң: «Я Реб, хачана ченли медет диләп перят эдейин?» диймеги гең галдырмаяр. Ехова пыгамбере ол гүнүң хачан гелҗекдигини анык айтмаса-да, шәхериң «эгленмән» вейран эдилҗекдигини ве оңа «гарашмалыдыгыны» айтды (Хабакук 1:1—4; 2:3-нҗи аятлары окаң) *.

13. Хабакук нәхили нәдогры пикирлере ёл берип билерди ве онуң нетиҗеси нәхили боларды?

 ¹³ Гөз өңүне гетириң, Хабакук рухдан дүшүп, шейле пикир эдйәр: «Иерусалимиң вейран болҗакдыгы бирнәче йылдан бәри җар эдилйәр. Ол гүне кән гарашмалы болса нәме? Шәхериң вейран болҗагы барада вагыз этмек гаты гүлкүнч гөрүнйәр. Ким пыгамберлик этсе-де, мен бир этмәйинле». Эгер-де Хабакук шейле пикирлере ёл берен болса, Ехованың мерхеметинден махрум болуп, Иерусалими басып алан бабыллыларың элинден гачып гутулып билмезди.

14. Биз пыгамберликлериң ерине етҗекдигине нәме үчин ынанярыс?

¹⁴ Биз тәзе дүнйә геченимизде ахырзамана дегишли пыгамберликлериң өз вагтында ерине етендигине айдың дүшүнерис. Бу барада ойлансак, Ехованың вадаларының долы ерине етҗекдигине ынамлы боларыс ве Оңа бил багларыс (Ешува 23:14-и окаң) *. «Вагт я мөвсүмлерини» «өз ыгтыярына табын эден» Аллатагала бизе «бүтин затларың соңуның якынлашандыгыны» дуйдуряр. Биз мунуң үчин Ехова миннетдар болуп, берйән гөркезмесине эермели (Рес. иш. 1:7; 1 Пет. 4:7).

15, 16. Биз нәме үчин ыхласлы вагыз этмели?

¹⁵ Ехова гурамасы аркалы бизе ыхласлы вагыз этмеги хәли-шинди ятладып дуряр. Шейле ятлатмалар бизе Худая гуллук этмек билен чәкленмән, эйсем, Месихиң гелмегиниң аламатларының ерине етишини гөрмәге көмек эдйәр. Биз бу ятлатмалара нәхили гарамалы? Биз хош хабары ыхласлы вагыз эдип, Худайың Патышалыгыны биринҗи орунда гоюп, Онуң догрулыгыны агтармалы (Мат. 6:33; Мар. 13:10).

¹⁶ Бир уя: «Биз Худайың Патышалык барадакы хош хабарыны вагыз этмек билен... адамлара халас болмага көмек эдйәрис» диййәр. Ол халас этмегиң ваҗыпдыгына дүшүнйәрди. Себәби 1945-нҗи йылда ол «Вильгельм Густоф» атлы әгирт улы гәмиде барярка хеләкчилиге учраяр. Бу хеләкчиликден уя билен янёлдашы ве бирнәче адамлар халас болярлар. Кәбир адамлар паҗыгалы ягдайда нәмәниң ваҗыпдыгына дүшүнмейәрлер. Уя бир аялың: «Вай, сумкаларым, сумкаларым! Мениң алтынларым! Әхли алтынларым ашакда, гәмиде галды-ла! Мен хич затсыз галдым!» дийип,  мөңңүрип аглайшыны ятлаяр. Йөне бейлеки адамлар җаныны ховп астына салып, буз ялы сувда гарк болуп барянлары халас эдйәрдилер. Бизем җанымызы аяман адамлара көмек этмек үчин элимизде барыны этсек, адамлара етип гелйән хеләкчиликден халас болмага ярдам эдерис.

17. Ахырзаманың дуйдансыз гелҗекдигини нәме субут эдйәр?

¹⁷ Дүнйәде болян вакалар Мукаддес Язгылардакы пыгамберликлериң ерине етйәндигини ве ахырзаманың өрән голайдыгыны субут эдйәр. Ылхам 17:16-да «җанаварың ве он шахың» Бейик Бабылың — ялан диниң дүнйә империясының үстүне топулҗакдыгы айдыляр. Биз бу пыгамберлик энтек ерине етмез дийип пикир этсек ялңышарыс. Себәби Худай муны этмеги «оларың йүрегине гуяр» ве ол гүн дуйдансыз, өрән тиз гелер (Ылх. 17:17). Бу дүнйәниң соңы голайлап гелйәр! Иса: «Хабардар болуң! Хоранлык, серхошлук, яшайшың гайгылары йүрегиңизе йүк болуп, ол гүн дуйдансызлыкда үстүңизе абанаймасын. Чүнки ол гүн бүтин ер йүзүнде яшаянларың әхлисиниң үстүне дузак кимин гелер» дийип дуйдурды. Биз муңа бипарх гарамалы дәл (Лука 21:34, 35; Ылх. 16:15). Гелиң, «умыт баглаянлар үчин шейле ишлери эден Худая» ыхласлы гуллук эделиң (Иш. 64:4).

18. Биз индики макалада нәме барада гүррүң эдерис?

¹⁸ Гелиң, бу залым дүнйәниң соңуна гарашып, Яхуданың шу сөзлерине эерелиң: «Эй сөйгүли доганлар, сиз өзүңизи иң мукаддес иманыңызың үстүнде гуруп, Мукаддес Рухда дога эдип, эбеди яшайыш үчин Реббимиз Иса Месихиң рехимине гарашың, өзүңизи Худайың сөйгүсинде саклаң» (Яхуда 20, 21). Биз Худайың вада берен тәзе дүнйәсине сабырсызлык билен гарашяндыгымызы нәдип гөркезип билерис? Бу барада индики макалада гүррүң эдерис.