ДОКУЗ яшым доланда мениң боюм өсмән башлады. Биз Кот-д’Ивуареде яшаярдык. Ондан бәри 34 йыл гечсе-де, шу вагтам мениң боюм бары-ёгы бир метр. Вагтың гечмеги билен, боюмың өсмейәндиги месе-мәлим болды. Ата-энем бу бабатда ченденаша алада этмезлигим үчин бир ише гүмра болмагы маслахат берди. Шол себәпли мен өйүмизиң өңүнде ир-иймиш сатып башладым. Мен ол ери хемише арасса сакламага чалышярдым. Шонуң үчин көп алыҗылар гелйәрди.

Эмма иш хич бир зады өзгертмеди. Мениң боюм гысга болансоң, хатда ир-иймишли текҗелерем менден узынды. Әхли затлар менден ики эссе узын адамлар үчин ясаланды. Шол себәпли йөнекей затларам маңа кынчылык дөредйәрди. Мен лапыкеч болярдым, эмма 14 яшымда гарайшымы үйтгетдим.

Бир гүни ики саны аял ир-иймиш сатын алмага гелди. Олар Ехованың Шаятлары экени ве мениң билен Мукаддес Язгылар окувыны гечип башладылар. Мен өзүм хакда алада этмегиң дәл-де, Ехова ве онуң ниетлери барада билим алмагың ваҗыпдыгына гөз етирдим. Бу маңа гаты улы көмек этди. Зебур 73:28-нҗи аят мениң иң говы гөрйән аядым болды. Аядың биринҗи бөлегинде: «Маңа болса Худая якынлашмак говудыр» дийилйәр.

Биз гарашылмадык ягдайда Буркина-Фасо диен ере гөчмели болдук. Бу мениң дурмушымы дүйпгөтер үйтгетди. Себәби Кот-д’Ивуареде ир-иймиш сатаным үчин мени хеммелер танаярды, бу ерде болса хич ким тананок. Хатда адамлар мени гөренлеринде гең галып середйәрдилер, шонуң үчин мен бирнәче хепделәп өйден чыкман отурдым. Шонда мениң Ехова билен достлашан говы гүнлерим ядыма дүшди. Мен Ехованың Шаятларының филиалына хат яздым ве өе Нэни атлы миссионер уя гелди. Онуң кичиҗик моторам барды. Нэни маңа түйс герекли уяды.

Эмма ёллар чәгели болансоң тыпанчакды, ягыш яганда болса батгалык болярды. Нэни бизе гелмек үчин мотордан энчеме сапар йыкылса-да, Мукаддес Язгылар окувыны ыхласлы гечирйәрди. Бир гүни ол мени йыгнак душушыгына чагырды. Шонда адамларың маңа гең галып середишлери гөз өңүме гелди. Шейле-де кичиҗик мотора ики адам мүнсе, оны сүрмек хас-да кын болҗакды. Муңа гарамаздан, мен йыгнак душушыгына гитмеги йүрегиме дүвдүм. Себәби халаян аядымың икинҗи бөлегинде: «Реб Худайы өзүме пена эдиндим» дийилйәр.

 Мен Нэни билен йыгнак душушыкларына бармак үчин батгалык ёллардан йөрәнимизде, кәте йыкылярдык. Йөне мен йыгнага бармак үчин батга батаныма гынанмаярдым. Себәби доган-уяларың мәхирли йылгырышының бейлеки адамларың менден гөзүни айырман середишинден тапавутланяндыгыны гөрүп бегенйәрдим. Мен докуз айдан соңра сувда чокундырылдым!

Мениң халаян аядымда: «Сениң әхли ишлериңи ыглан эдерин» дийилйәр. Йөне мен вагыз этмегиң кын болҗакдыгына дүшүнйәрдим. Мениң илкинҗи гезек өйден-өе вагыз эдишим хич ядымдан чыканок. Себәби яшларам, гаррыларам маңа гең галып середйәрди ве маңа өйкүнип йөрейәрдилер. Бу маңа гаты агыр дегйәрди. Эмма мен олара-да Җеннетиң герекдигини өз-өзүме ятладып дурярдым. Бу маңа гүйч-кувват берйәрди.

Көп затлары этмек аңсат болар ялы, мен эл билен бат берилйән үч тигирли велосипед алдым. Мениң билен вагза чыкян доган-уялар бейиклиге галанымызда велосипеди итеклемели болярдылар; ашак сүрмели боланда велосипеде ылгап мүнйәрдилер. Илки-илкилер маңа вагыз этмеклик кын болды, йөне соңра гуллук этмекден шатлык тапдым. Шол себәпли 1998-нҗи йылда пионер гуллугына башладым.

Мен көп адамлара Мукаддес Язгылар окувыны гечдим. Оларың дөрдүси сувда чокундырылды. Сүйтдеш гыз җигимиң хакыкаты кабул этмеги мени хас-да бегендирди. Гызыкланян адамларың рухы тайдан өсүшини эшитмек мени кын гүнлеримде хас-да рухландырярды. Бир гүни мен гыззырма билен кеселләп ятыркам, Кот-д’Ивуареден хат гелди. Онда Буркина-Фасодакы университетде окан талыбың вагызчы боландыгы язылыпды. Мен онуң билен гапының агзында Мукаддес Язгылар окувыны гечирипдим. Соңра мен оны бир догана табшырыпдым. Бираз вагтдан ол Кот-д’Ивуаре гөчүп гидипди. Мен бу хабары эшидип өрән бегендим!

Мен нәдип экленйәрин? Майып адамлара көмек эдйән гурама маңа тикинчи болмагы теклип этди. Эмма бир мугаллым муны оңармаяндыгымы гөрүп: «Биз саңа сабын ясамагы өвретмели» дийди. Шейдип, мен сабын ясамагы өврендим. Инди өйүмде кир ве эл ювулян сабынлары ясаярын. Адамлар сабынлары говы гөрүп, башгалара-да оны алмагы теклип эдйәрлер. Мен үч тигирли моторым билен сабынлары адамлара пайлаярын.

Гынансак-да, 2004-нҗи йылда пионер гуллугымы гоймалы болдум. Себәби мениң оңурга сүңкүмиң гышарандыгы себәпли эндам-җаным агырярды. Эгер гүйчли агыры болмадык болса, гуллугымы довам эдердим. Эмма мен шонда-да ыхласлы вагыз этмәге җан эдйәрин.

Көп адамлар мениң мәхирли йылгыршымы халаярлар. Мен, догрудан-да, өзүми багтлы дуйярын, себәби Худая якынлашмагың говудыгыны билйәрин. (Сара Майга гүррүң берди).