Көп адамлар рухы гөркезме ве теселли тапмаяндыклары үчин метҗитлере, бутханалара бармакларыны бес эдйәрлер. Онда Ехованың Шаятларының йыгнак душушыкларына бармагың нәме пейдасы бар?

Мәхирли ве ягшы адамлар билен гүррүңдеш боларсыңыз. I асырда яшан месихчилер хем Худая сежде этмек, Мукаддес Язгылары өвренмек ве бирек-биреги рухландырмак үчин йыгнанышярдылар (Еврейлер 10:24, 25). Олар бу душушыкларда бири-бири билен мәхирли гүррүңдеш болярдылар ве хакыкы достлары тапярдылар (2 Селаниклилер 1:3; 3 Яхя 14). Биз хем оларың гөрелдесине эерип, шейле шатлыгы дуюп билерис.

Мукаддес Язгыларың када-канунларыны уланмагы өвренерсиңиз. Гечмишде яшан эркекдир аяллар ве чагалар Худайың када-канунларыны өвренмек үчин йыгнанышярдылар. Биз хем оларың гөрелдесине эерйәрис. Теҗрибели мугаллымлар йыгнак душушыкларында Мукаддес Язгыларың када-канунларына дүшүнмәге ве олара гөрә яшамага көмек эдйәрлер (Канун таглыматы 31:12; Нехемя 8:8). Биз йыгнак душушыкларында Мукаддес Язгыларың эсасында пикир алышярыс ве Худая өвгүли айдымлары айдярыс. Йыгнага гелен ислендик адам муңа гатнашып билйәр. Бу бизе Худайың берйән вадаларына ынаняндыгымызы гөркезмәге мүмкинчилик берйәр (Еврейлер 10:23).

Худая болан иманыңызы беркидерсиңиз. Павлус ресул имандашларына шейле язды: «Сизи гөрмеги гаты күйсейәрин... Ислегим... бири-биримизде болан иман аркалы билеликде теселли тапмагымыздыр» (Римлилер 1:11, 12). Биз хем йыгнак душушыкларында доган-уялар билен гүррүңдеш болуп, иманымызы беркидйәрис ве Худая ярамлы яшамак ислейәндигимизи гөркезйәрис.

Биз сизи индики йыгнак душушыгына йүрекден чагырярыс. Шонда сиз ёкарда агзалан затларың әхлисини гөзүңиз билен гөрерсиңиз. Ол ерде сизи мәхирли гаршыларлар. Йыгнак душушыклары мугтуна гечирилйәр; хич кимден пул алынмаяр.

• Йыгнак душушыклары кимлериң гөрелдесине эерилип гечирилйәр?

• Йыгнак душушыклары бизе нәхили пейда гетирйәр?