MUSANYŇ KANUNYNA görä, ysraýyllar Ýehowa guşlardan gurbanlyk berjek bolsa gumry bolsun, kepderi bolsun berip bilýärdiler. Kanunda guşlaryň ikisi hem agzalýardy we ysraýyllar olaryň islendigini gurbanlyk berip bilýärdi (3 Mus. 1:14; 12:8; 14:30). Ysraýyllar Ýehowa Hudaýa şeýle kanun berendigi üçin örän minnetdar bolandyrlar. Näme üçin? Sebäbi Ysraýyl ýurdunda gumrular hemişe tapdyrmaýardy.

Gumrular göçüp-gonup ýaşaýan guşlar. Olar Ysraýylda ýaz aýlarynda bolup, oktýabr aýynda ýyly ýurtlara göçüp gidýärler (Aýd. 2:11, 12; Ýer. 8:7). Howa maýlanda bolsa yzyna dolanyp gelýärler. Şol sebäpli ysraýyllar gyş paslynda gurbanlyk bermek üçin gumry tapyp bilmeýärdiler.

Kepderiler bolsa göçüp-gonup ýaşamaýarlar. Şonuň üçin ysraýyllar olary ýylyň islendik aýy tapyp bilýärdiler. Hatda öýünde-de saklaýardylar (Ýahýa 2:14, 16-njy aýatlary deňeşdiriň). «Mukaddes Kitapda agzalýan ösümlikler we haýwanlar» atly kitapda aýdylmagyna görä, «Palestinanyň obalarynda, şäherlerinde eldekileşdirilen kepderiler bardy. Her öýde diýen ýaly kepderileriň ketegi ýa höwürtgesi bolýardy» (Işaýa 60:8-i deňeşdiriň).

Guşlary gurbanlyk bermek baradaky kanun Ýehowanyň söýgüsini we akyldarlygyny görkezýärdi. Sebäbi Ysraýyl halky ýylyň dowamynda islendik wagt gumry ýa-da kepderi gurbanlyk berip bilýärdi.