HASRAT ÇEKÝÄNLERE GÖWÜNLIK

Hasrat çekýänler üçin kömek

IŞLET

SOŇKY DÖWÜRLERDE HASRAT ÇEKÝÄNLERIŇ DERDINE MELHEM TAPMAK ÜÇIN KÖP BARLAGLAR GEÇIRILDI. Geçen makalalardan bilşimiz ýaly, iň ökde psihologlaryň berýän maslahatlary Mukaddes Kitapdaky maslahatlara gabat gelýär. Mukaddes Kitap gadymy kitap bolsa-da, onuň maslahatlary şu günler hem peýdaly. Dogrudanam, Hudaýyň Sözi akyldarlygyň çeşmesi. Ondaky maslahatlar ajy aýralykdan hasrat çekýän adamlaryň derdine derman bolýar.

Ölen dogan-garyndaşlarymyz ejir çekmeýär

Mukaddes Kitapda aýdylmagyna görä, «ölüler... hiç zat bilmeýär» we «oý-pikirleri... puç bolýar» (Nesihat 9:5; Zebur 146:4). Şeýle-de Mukaddes Kitapda ölüm «uky» bilen deňeşdirilýär (Ýahýa 11:11).
Söýgüden doly Allatagala iman etmek göwünlik berýär

Mukaddes Kitapda: «Ýehowa a dogruçyllara nazar salýar, olaryň perýadyny eşidýär» diýilýär (Zebur 34:15). Allatagala doga etmek diňe bir derdiňi aýdyp göwünlik tapmagy ýa-da pikiriňi durlamagy aňlatmaýar. Oňa doga-dileg edenimizde, älem-jahany Ýaradan bilen dostlaşýarys. Diňe ol ýürek ýaralary bitirýän Beýik Lukmandyr.
Bize ajaýyp gelejek garaşýar

Göz öňüne getiriň, gara topraga siňen merhumlaryň hemmesi ýer ýüzünde direler. Mukaddes Kitapda direliş hakda ençeme sapar aýdylýar. Tizden «Hudaý (biziň) gözlerimizden ýaşlarymyzy süpürer. Indi ne ölüm, ne hasrat, ne agy, ne-de agyry bolar» (Ylham 21:3, 4).

Ýehowa iman edýän adamlaryň köpüsine direlişe bolan umyt ajy hasrata döz gelmäge kömek edýär. Ýanýoldaşy aradan çykan Eni (durmuş guranyna 65 ýyl bolupdy) şeýle gürrüň berýär: «Mukaddes Kitapda ölen adamlaryň ejir çekmeýändigi we Allatagalanyň olary direltjekdigi hakda ýazylan. Şu pikirler maňa ajy aýralyga döz gelmäge kömek edýär».

Ajy hasraty başdan geçiren Tina şeýle gürrüň berýär: «Tomuň aradan çykan gününden bäri men Hudaýyň goldawyny duýýaryn. Ol her bir ýagdaýda maňa kömek edýärdi, göwünlik berýärdi. Mukaddes Kitapdaky direliş baradaky wadalara men ýürekden iman edýärin. Şol wadalar maňa Tomy görjek günüme sabyrsyzlyk bilen garaşmaga kömek edýär».

Eni bilen Tina ýaly millionlarça akýürekli adamlar Mukaddes Kitabyň wadalaryna ynanýarlar. Eger siz Hudaýyň beren wadalaryny ýöne bir arzuw-hyýal hasaplaýan bolsaňyz ýa-da maslahatlaryna şübhelenýän bolsaňyz, onda gözleg-barlag geçiriň. Şonda Mukaddes Kitabyň hasrat çekýänlere göwünlik berýändigine göz ýetirersiňiz.