Siz ýanýoldaşyňyz bilen bile ýaşap başlanyňyzda, pikirleriňiziň, duýgularyňyzyň we garaýşyňyzyň tapawutlanýandygy sebäpli käbir kynçylyklar döräp biler. Şeýle-de garaşylmadyk ýagdaýlar we başga-da zatlar maşgalada kynçylygyň döremegine sebäp bolup biler.

Käbir är-aýallar maşgalasynda kynçylyk dörände, dogan-garyndaşlaryndan maslahat soraýarlar. Elbetde, ýaşuly adamlardan maslahat soramak gowy, ýöne biz Mukaddes Ýazgylaryň maslahatyna eýersek, maşgalamyzy berkideris (Matta 5:23, 24). Eger siz ýanýoldaşyňyz bilen Mukaddes Ýazgylaryň prinsiplerine eýerseňiz, kynçylyklaryňyzy paýhasly çözüp bilersiňiz.

MUKADDES ÝAZGYLARDA NÄME DIÝILÝÄR: «Geplemegiň öz wagty bar» (Wagyz kitaby 3:7). Kynçylygy çözmek üçin wagt tapyň. Ýanýoldaşyňyz bilen haýsydyr bir kynçylyk barada gepleşeniňizde, oňa duýgularyňyzy we pikirleriňizi açyk aýdyň. Biri-biriňize hemişe «hakykaty aýdyň» (Efesliler 4:25). Hatda size duýgularyňyza erk etmek kyn bolsa-da, göreşmegi dowam ediň. Ýakymly sözler edil ýanyp duran ody öçürýän suw ýaly adamyň gaharyny köşeşdirip bilýär (Süleýmanyň tymsallary 15:4; 26:20).

Hatda siz ýanýoldaşyňyzyň aýdýanlary bilen ylalaşmasaňyz-da, mähirli boluň we ony söýýändigiňizi hem-de oňa hormat goýýandygyňyzy görkezmegi unutmaň (Koloseliler 4:6). Kynçylygy tizräk çözmäge çalşyň we pikir alyşmaga wagt tapyň (Efesliler 4:26).

MASLAHAT

• Gürrüňdeşlik üçin amatly wagt tapyň

• Ýanýoldaşyňyzy diňläniňizde, sözüni bölmäň. Ol gürläp bolansoň, gepleseňiz gowy bolar

MUKADDES ÝAZGYLARDA NÄME DIÝILÝÄR: «Biri-biriňizi... ýürekden söýüň, hormatda her kişi beýlekini özünden ýokary saýsyn» (Rimliler 12:10). Biri-biriňizi diňlemek örän wajyp. Ýanýoldaşyňyzyň garaýşyna düşünip biler ýaly, «dertdeş we kiçigöwünli boluň» (1 Petrus 3:8; Ýakup 1:19). Ýanýoldaşyňyzy ýürekden diňläň. Oňa köpräk üns berip, bile wagt geçiriň. Eger siz biraz soňrak gepleşmek isleýän bolsaňyz, ýanýoldaşyňyza aýdyň. Siz ýanýoldaşyňyzy duşmanyňyz däl-de, dostuňyz hasaplasaňyz «tiz gaharlanmarsyňyz» (Wagyz kitaby 7:9).

MASLAHAT

• Ýanýoldaşyňyzyň aýdýan zatlary gaharyňyzy getirse-de, ony ünsli diňlejek boluň

• Ýanýoldaşyňyzyň näme diýmek isleýändigine düşünjek boluň. Onuň ýüz-keşbine, hereketine we äheňine üns beriň

MUKADDES ÝAZGYLARDA NÄME DIÝILÝÄR: «Hemme zähmetde haýyr bardyr; ýöne boş gep diňe garyplyga getirýändir» (Süleýmanyň tymsallary 14:23). Aýdylan zatlar bilen ýöne bir razylaşmak ýeterlik däl. Gelen kararyňyza görä ikiňiz-de hereket etmeli. Başda kyn bolar, belki-de, köp tagalla etmeli bolarsyňyz. Ýöne siz eden tagallaňyza ökünmersiňiz (Süleýmanyň tymsallary 10:4). Eger siz agzybir bolup, bile zähmet çekseňiz, köp bereket alarsyňyz (Wagyz kitaby 4:9).

MASLAHAT

• Kynçylyklaryňyzy çözmek üçin nämeleri edip biljekdigiňizi maslahatlaşyň

• Wagtal-wagtal nähili üstünlikleri edendigiňiz barada oýlanyň