Hudaý bizi erkin edip ýaratdy. Şol sebäpli biziň özümiz karara gelip bilýäris. Ol ykbalymyzy öňünden kesgitlemeýär. Geliň, bu babatda Mukaddes Kitabyň näme öwredýändigine seredeliň.

•   Hudaý adamlary öz keşbinde ýaratdy (1 Musa 1:26). Instinkt boýunça hereket edýän haýwanlardan tapawutlylykda, biz söýgi we adalatlylyk ýaly häsiýetleri görkezýän Ýaradyjymyza meňzeýäris. Edil Ýaradyjymyz ýaly, bizde-de erkinlik bar.

•   Gelejegimiziň nähili boljakdygy biziň özümize bagly. Mukaddes Kitap bizi «ýaşaýşy saýlap,.. Oňa (Hudaýa) gulak asmaga» höweslendirýär (5 Musa 30:19, 20). Erkinligimiz bolmadyk bolsa, bu tabşyrygyň berilmegi peýdasyz, hatda zalymlyk bolardy. Hudaý bizi özüne gulak asmaga mejbur etmeýär, gaýtam, mähir bilen: «Tabşyryklaryma gulak asan bolsadyňyz, şonda abadanlygyňyz derýa deý,.. bolardy» diýýär (Işaýa 48:18).

•   Üstünlik gazanjagymyz ýa-da şowsuzlyga uçrajagymyz ykbala bagly däl. Edýän tagallalarymyzyň ýerine düşmegini islesek, janaýaman zähmet çekmeli. Mukaddes Kitapda: «Eliň etmäge näme tapsa, ony bar güýjüň bilen et» diýilýär (Nesihat 9:10). Şeýle-de onda «işeňňir adamyň pikirleriniň diňe bolçulyga getirýändigi» aýdylýar (Nakyllar 21:5).

 Erkinlik Hudaýyň gymmatly sowgady, onuň kömegi bilen biz Hudaýy «bütin ýüregimiz» bilen söýüp bilýäris. Sebäbi biz muny ýürekden isleýäris (Matta 22:37).

 Mukaddes Kitap Hudaýyň ähli zada güýjüniň ýetýändigini öwredýär. Onuň güýjüni özünden başga hiç kim çäklendirip bilmeýär (Eýýup 37:23; Işaýa 40:26). Ýöne Hudaý güýjüni ähli zada gözegçilik etmek üçin ulanmaýar. Meselem, Mukaddes Kitapda öz halkynyň duşmany bolan gadymy Wawilon şäheri babatda Hudaýyň «Özüni saklandygy» aýdylýar (Işaýa 42:14). Şonuň ýaly, Ol häzirem erkinligini başgalara zyýan ýetirmek üçin ulanýan adamlara sabyr edýär. Emma Onuň sabyr käsesi dolar (Zebur 37:10, 11).