Kāfai koe e hukehuke te Tuhi Paia ma he Molimau a Ieova, atonu e taumafai koe ke autalu te matakupu kae heki fai nā hukehukega takitahi. Ke maua ni aogā hili, e lelei ke fai vēnā foki ka ko heki fano koe ki he hauniga a te fakapotopotoga. E maua nā ikuga e pito hili mai te kamataga o he fakahologa lelei.

Ke mautinoa ko āfea ma ko fea e fai ai nā hukehukega. He ā he taimi lelei e mafai ke mafaufau mamafa ai koe ki he matakupu? Pe ko te vaveao, ka ko heki kamata  au galuega mo te aho, pe mulimuli ake i te afiafi, pe kāfai kua momoe te fānau? E tuha lava pe hē mafai oi hukehuke koe mo he vaitaimi loa, kae ke filifili e koe he taimi e kē mafai oi fakafano e fai ai ni au hukehukega, ma taumafai ke hēai he mea e fakalavelavea ai. Ke hakili he nofoaga filēmū, ma kave kehe nā mea uma e fakalavelave ki he hukehukega, e vē ko te tape o te lētiō, televihe, pe ko he telefoni fekavefaki. Ko te tatalo ka ko heki kamata hau hukehukega e fehoahoani ke kavekehe ai nā mea e popole ai koe i te aho ma ka mafai oi mafaufau mamafa ki te Kupu a te Atua.​—Filipi 4:6, 7.

Ke fakailoga te matakupu, ma hauni ma fai hau vaega. Taumafai muamua ke maua te ata kātoa ma malamalama ki te matakupu. Ke mafaufau ki te matua o te tala pe ko te matakupu; mafaufau ki te auala e fehokotaki ai nā ulutala takitahi ki te matua, ma iloilo hō he ata ma nā fehili autalu e fakamamafa ai nā manatu tāua. Oi faitau ai nā palakalafa takitahi, ma hakili nā tali mo nā fehili kua lolomi. Ke huke ma faitau nā mau e i ei, ma mafaufau ki te auala e lagolago ai te matakupu. (Galuega 17:11) Kāfai kua iloa e koe te tali o te fehili, ke vahe ki lalo, pe fakaali manino mai ni kupu tāua pe ko ni fakakupuga, i te palakalafa e mafai oi fehoahoani atu ki a te koe ke toe manatua te tali i te taimi o te hauniga. I te hauniga e mafai oi hiki tō lima ma fai he tali pukupuku i au lava kupu.

Mai te hukehuke o nā matakupu kehekehe ka talanoa i nā hauniga i nā vaiaho takitahi, kā fakaopoopo ai ni manatu fou ki tau “fale teukoloa” o te poto mai te Tuhi Paia.​—Mataio 13:​51, 52.

• He ā he fakahologa e mafai oi kamata e koe ke hauniuni ai mo nā hauniga?

• E mafai vēhea e koe oi hauni ke fai he tali i te hauniga?