Totoo Ba ang Impiyerno? Ano ang Impiyerno Ayon sa Bibliya?

I-PLAY

Ang sagot ng Bibliya

Sa ilang bersiyon ng Bibliya, isinalin ang salitang Hebreo na “Sheol,” ang salitang Griego na “Hades,” bilang “impiyerno,” at sa ibang bersiyon naman isinalin itong libingan. (Awit 16:10; Gawa 2:27 a) Gaya ng artwork tungkol sa mga turo ng relihiyon na makikita sa artikulong ito, maraming tao ang naniniwala na ang impiyerno ay isang maapoy na lugar kung saan pinaparusahan ang masasama. Pero iyan ba ang itinuturo ng Bibliya?

Sa artikulong ito

Ang impiyerno ba ay isang lugar ng walang-hanggang pagpapahirap?

Hindi. Ang orihinal na mga salita na isinaling “impiyerno” sa ilang mas lumang salin ng Bibliya (Hebreo, “Sheol”; Griego, “Hades”) ay tumutukoy lang sa “Libingan,” o ang karaniwang libingan ng mga tao. Ipinapakita ng Bibliya na ang mga taong nasa “Libingan” ay hindi na umiiral.

Ang mga patay ay wala nang alam o malay, kaya hindi na rin sila nasasaktan. “Walang gawa, ni katuwiran, ni karunungan, ni kaalaman man, ang mapupunta sa impiyerno.” (Eclesiastes 9:10, Douay-Rheims Version) Ang impiyerno ay hindi punô ng mga taong dumaraing dahil sa sakit. Sa halip, ang sabi ng Bibliya: “Hiyain mo ang masasamang tao at pahimlayin mo silang tahimik sa libingan [impiyerno, Douay-Rheims].”—Awit 31:17; Ang Biblia—Bagong Salin sa Pilipino (30:18, Douay-Rheims); Awit 115:17.
Sinabi ng Diyos na kamatayan, hindi pagpapahirap sa maapoy na impiyerno, ang parusa sa kasalanan. Sinabi ng Diyos sa unang taong si Adan, na ang parusa sa pagsuway sa batas ng Diyos ay kamatayan. (Genesis 2:17) Wala siyang sinabi tungkol sa walang-hanggang pagpapahirap sa impiyerno. Nang magkasala si Adan, sinabi ng Diyos ang parusa sa kaniya: “Ikaw ay alabok, kaya sa alabok ka babalik.” (Genesis 3:19) Ibig sabihin, hindi na iiral si Adan. Kung talagang sa isang maapoy na impiyerno ilalagay ng Diyos si Adan, siguradong iyon ang sasabihin Niya. Hindi binago ng Diyos ang parusa sa sumusuway sa mga batas niya. Pagkalipas ng mahabang panahon mula nang magkasala si Adan, ipinasulat ng Diyos sa isang manunulat ng Bibliya: “Ang kabayaran para sa kasalanan ay kamatayan.” (Roma 6:23) Hindi na kailangan ng karagdagang parusa, dahil “ang taong namatay ay napawalang-sala na.”—Roma 6:7.
Ang ideya ng walang-hanggang pagpapahirap ay kasuklam-suklam sa Diyos. (Jeremias 32:35) Kabaligtaran ito ng itinuturo ng Bibliya na “ang Diyos ay pag-ibig.” (1 Juan 4:8) Gusto niya na sambahin natin siya dahil mahal natin siya at hindi dahil sa takot sa walang-hanggang pagpapahirap.—Mateo 22:36-38.
Napunta sa impiyerno ang mabubuting tao. Ayon sa mga Bibliya na gumamit ng salitang “impiyerno,” inaasahan ng mga tapat na lalaking gaya nina Jacob at Job na mapupunta sila sa impiyerno. (Genesis 37:35; Job 14:13) Kahit si Jesu-Kristo, sinabing napunta sa impiyerno noong namatay siya hanggang noong buhayin siyang muli. (Gawa 2:31, 32) Maliwanag, kapag ginagamit ang salitang “impiyerno” sa mga Bibliyang ito, tumutukoy lang ito sa Libingan. b

Ano ang ibig sabihin ng ilustrasyon ni Jesus tungkol sa taong mayaman at kay Lazaro?

Ginamit ni Jesus ang ilustrasyong ito na mababasa sa Lucas 16:19-31. Ang mga ilustrasyon o talinghaga ay nagtuturo ng mga pananaw ng Diyos sa mga bagay-bagay at ng mahahalagang katotohanan. Hindi totoong pangyayari ang ilustrasyon tungkol sa taong mayaman at kay Lazaro. (Mateo 13:34) Para sa higit pang impormasyon, tingnan ang artikulong “Sino ang Taong Mayaman at si Lazaro?”

Ang impiyerno ba ay pagiging nakahiwalay sa Diyos?

Hindi. Salungat sa turo ng Bibliya ang doktrina na alam ng mga patay na nakahiwalay sila sa Diyos. Kasi, malinaw na itinuturo ng Bibliya na ang mga patay ay wala nang alam.—Awit 146:3, 4; Eclesiastes 9:5.

May nakalaya na ba mula sa impiyerno?

Oo. Siyam na tao ang iniulat sa Bibliya na napunta sa Libingan (isinaling “impiyerno” sa ilang Bibliya) at binuhay-muli. c Kung alam nila ang nangyayari sa kanila sa impiyerno, ikinuwento na sana nila ang mga naranasan nila. Pero walang kahit isa sa kanila ang nagkuwento na pinahirapan sila o may naranasan silang anuman. Bakit? Kasi gaya ng itinuturo ng Bibliya, wala silang alam noong panahong patay sila, na para bang “natutulog” sila nang mahimbing.—Juan 11:11-14; 1 Corinto 15:3-6.

a Karamihan ng makabagong translation sa Tagalog ay hindi gumagamit ng salitang “impiyerno” sa Gawa 2:27. Sa halip, ang ginagamit ng ilan ay “libingan,” (Ang Biblia—Bagong Salin sa Pilipino); “daigdig ng mga patay” (Magandang Balita Biblia). Tinumbasan naman ng ilan ng transliterasyon na “Hades” ang orihinal na salitang Griego.—Ang Biblia.

b Tingnan ang kahong “ Mga Salita sa Orihinal na Wika ng Bibliya.”

c Tingnan ang 1 Hari 17:17-24; 2 Hari 4:32-37; 13:20, 21; Mateo 28:5, 6; Lucas 7:11-17; 8:40-56; Juan 11:38-44; Gawa 9:36-42; 20:7-12.

Mga teksto sa Bibliya tungkol sa impiyerno, o Libingan

Job 14:13: “O itago mo nawa ako sa Libingan [“impiyerno,” Douay-Rheims Version]; . . . magtakda ka nawa ng panahon at alalahanin mo ako!”

Ibig sabihin: Alam ng tapat na si Job na kapag napunta na siya sa impiyerno (Libingan) matatapos na ang paghihirap niya at puwede siyang buhaying muli ng Diyos mula roon.

Awit 145:20: “Binabantayan ni Jehova ang lahat ng umiibig sa kaniya, pero ang lahat ng masasama ay lilipulin niya.”

Ibig sabihin: Lilipulin ng Diyos, o pupuksain, ang masasama. Kaya hindi niya sila hahayaang patuloy na mabuhay sa impiyerno para mapahirapan.

Eclesiastes 9:10: “Wala nang gawain, pagpaplano, kaalaman, o karunungan sa Libingan [“impiyerno,” Douay-Rheims Version], kung saan ka pupunta.”

Ibig sabihin: Dahil walang alam o malay ang mga nasa Libingan, o impiyerno, hindi sila puwedeng magdusa. Bukod diyan, maliwanag na kasama ang mabubuting tao sa tinutukoy ng manunulat na ito ng Bibliya.

Gawa 2:31: “Siya, na patiunang nakakita nito ay nagsalita tungkol sa pagkabuhay-muli ni Kristo, na ang kaluluwa niya ay hindi pinabayaan sa impiyerno.”—King James Version.

Ibig sabihin: Napunta si Jesu-Kristo sa impiyerno (Libingan) noong mamatay siya.

Roma 6:23: “Ang kabayaran para sa kasalanan ay kamatayan.”

Ibig sabihin: Kamatayan, hindi pagpapahirap sa impiyerno, ang pinakaparusa sa kasalanan.

Apocalipsis 20:13: “Ibinigay ng kamatayan at ng impiyerno ang mga patay na nasa kanila.”—King James Version.

Ibig sabihin: Mga patay ang nasa impiyerno. Pero puwedeng buhayin sila ulit.

Apocalipsis 20:14: “Ang kamatayan at impiyerno ay itinapon sa lawa ng apoy.”—King James Version.

Ibig sabihin: Kapag nawalan na ng laman ang impiyerno (Libingan) dahil binuhay na muli ang mga patay, sisirain na ito magpakailanman na parang tinupok ng apoy. Kaya mawawala na ang kamatayan na resulta ng kasalanan ni Adan.—Roma 5:12.

Mga salita sa orihinal na wika ng Bibliya

Gaya ng makikita sa listahan sa ibaba, nagkaroon ng kalituhan dahil gumamit ng salitang “impiyerno” ang mga translator ng Bibliya para sa mga salita sa orihinal na wika ng Bibliya na may ibang kahulugan. Sa ilang kaso, lumilitaw na gusto nilang ituro ang ideya na ang masasama ay walang-hanggang pinapahirapan at hindi pinupuksa.

Sheol (Hebreo שְׁאוֹל), Hades (Griego ᾅδης)

Ibig sabihin: Libingan ng mga tao sa pangkalahatan.—Awit 16:10; Gawa 2:31

Mga translation: Libingan, impiyerno, hukay (King James Version); “daigdig ng mga patay” (Magandang Balita Biblia)
Gehenna (Griego γέεννα)

Ibig sabihin: Pagkapuksa magpakailanman.—Mateo 5:30

Mga translation: Gehenna; impiyerno (King James Version, New International Version)
Tartaro (Griego ταρταρόω)

Ibig sabihin: Ang kahiya-hiyang kalagayan ng mga demonyo, na masasamang espiritung nilalang.—2 Pedro 2:4

Mga translation: Tartaro; impiyerno (King James Version, New International Version); mababang impiyerno (Douay-Rheims Version)

Kasaysayan ng apoy ng impiyerno

Galing sa pagano: Naniniwala sa maapoy na impiyerno ang mga sinaunang Ehipsiyo. Ang Book Ȧm-Ṭuat (Amduat), na sinasabi ng mga historian na mula pa noong ika-16 na siglo B.C.E., ay may binabanggit na mga “ihahagis sa mga hukay ng apoy; at . . . hindi makakatakas mula sa mga lagablab.”—The Egyptian Heaven and Hell.

Hindi itinuro ng mga unang Kristiyano: “Kapansin-pansin na sa B[agong] T[ipan] hindi natin makikitang kasama ang apoy ng impiyerno sa mga ipinangaral ng mga [unang Kristiyano].”—A Dictionary of Christian Theology.

Impluwensiya ng pilosopiyang Griego: “Mula sa kalagitnaan ng ika-2 siglo [C.E.], ang mga Kristiyano na nag-aral ng pilosopiyang Griego ay nakadama ng pangangailangang ipahayag ang kanilang pananampalataya ayon sa pilosopiyang ito . . . Ang pilosopiyang angkop na angkop sa kanila ay ang Platonismo [mga turo ni Plato].” (Encyclopædia Britannica) Kasama sa pilosopiyang iyon ang paniniwala na pinapahirapan sa apoy ang mga namatay. “Sa lahat ng sinaunang pilosopong Griego, si Plato ang may pinakamalaking impluwensiya sa paniniwala tungkol sa Impiyerno.”—Histoire des enfers (Ang Kasaysayan ng Impiyerno).

Ginamit ang turo ng apoy ng impiyerno para ipakitang tama ang pagpapahirap sa mga tao: Noong panahon na karaniwang tinatawag na Inkisisyong Kastila, sinusunog sa tulos ang mga erehe, o kumokontra sa turo ng simbahan bilang “patikim ng walang-hanggang pagpaparusa sa impiyerno,” para daw magsisi ang mga ito bago mamatay. (The Spanish Inquisition, ni Jean Plaidy) Ganiyan ang ginawa ni Queen Mary I ng England nang ipasunog niya sa tulos ang mga 300 Protestante. Ayon sa ulat, naniniwala siya na “yamang masusunog naman magpakailanman sa impiyerno ang kaluluwa ng mga erehe pagkamatay nila, angkop lamang na tularan ko ang paghihiganti ng Diyos sa pamamagitan ng pagsunog sa kanila dito pa lamang sa lupa.”—Universal History, ni Alexander Tytler.

Binago ngayon: Pinagaan ng ilang relihiyon ang turo nila tungkol sa impiyerno. Pero lumilitaw na hindi dahil alam nila na mali ang turong ito, kundi para makuha ang loob ng kanilang mga miyembro. (2 Timoteo 4:3) “Gusto ng mga tao ang isang Diyos na magiliw at mapagmahal . . . Salungat sa kasalukuyang kultura ang magsalita tungkol sa kasalanan at pagkadama ng pagkakasala.”—Professor Jackson W. Carroll.