Dikgato tse motho a tlhokang go di tsaya go nna Mosupi wa ga Jehofa di ile tsa tlhalosiwa ke Jesu mo go Mathaio 28:19, 20. Gape ditemana tseno di tlhalosa se motho a tlhokang go se dira go nna molatedi wa ga Keresete mme seo se akaretsa go bua kgotsa go naya bosupi ka Jehofa.

 Kgato ya ntlha: Ithute Baebele. Jesu o ne a laela balatedi ba gagwe gore ba ‘dire batho barutwa le go ba ruta.’ (Mathaio 28:19, 20) Lefoko “morutwa” le kaya “motho yo o ithutang.” Dilo tse Jesu a neng a di ruta tse di mo Baebeleng di kgona go re thusa gore re itumelele botshelo. (2 Timotheo 3:16, 17) Re rata go ruta batho Baebele, ke ka moo re nang le thulaganyo ya go ithuta Baebele mahala le batho kwa malapeng a bone.—Mathaio 10:7, 8; 1 Bathesalonika 2:13.

 Kgato ya bobedi: Dirisa dilo tse o ithutang tsone. Jesu o ne a re motho yo o ithutang o tshwanetse go ‘boloka dilo tsotlhe tse a ithutang tsone.’ (Mathaio 28:20) Seno se raya gore go ithuta ga ya tshwanela go nna selo se re se dirang fela go itlosa bodutu kgotsa go oketsa kitso e re nang le yone, go na le moo re tshwanetse go letla Baebele gore e re thuse go fetola tsela e re akanyang le e re itshwarang ka yone. (Ditiro 10:42; Baefeso 4:22-29; Bahebera 10:24, 25) Batho ba ba ikobelang ditaelo tsa ga Jesu ba feleletsa ba ineetse mo go Jehofa Modimo.—Mathaio 16:24.

 Kgato ya boraro: Go kolobediwa. (Mathaio 28:19) Baebele e tshwantsha go kolobediwa le go fitlhwa. (Bona Baroma 6:2-4.) Kolobetso e bontsha gore o tlogela botshelo jwa kgale mme o simolola jo bosha. Fa motho a kolobediwa, o bontsha ba bangwe gore o tsere dikgato tsa ntlha tse pedi tse Jesu a buileng ka tsone mme jaanong o kopa Modimo gore a mo neye segakolodi se se phepa.—Bahebera 9:14; 1 Petere 3:21.

 Bua le bagolwane ba phuthego e o leng mo go yone. Ba tla bua le wena go tlhomamisa gore o tlhaloganya gore kolobetso e kayang, gore a o dirisa dilo tse o ithutang tsone mo Baebeleng le gore a o setse o ineetse mo Modimo ka go rata.—Ditiro 20:28; 1 Petere 5:1-3.

 Ee. Re latela kgakololo ya Baebele ya gore re godise bana ba rona mo “kotlhaong le mo taolong ya mogopolo ya ga Jehofa.” (Baefeso 6:4) Le fa go ntse jalo, fa ba gola, ba tshwanetse go itirela tshwetso ya gore a ba dumela se ba se ithutileng mo Baebeleng, a ba tla se amogela le go se dirisa pele ba ka tshwanelega go kolobediwa. (Baroma 12:2) Mongwe le mongwe o tla ikarabelela mo Modimong.—Baroma 14:12; Bagalatia 6:5.