Dingwaga di le masome a manè tse di fetileng ka Tlhakole 2, 1973, go ne ga tsenngwa metšhine e mesha ya go gatisa kwa Wallkill, New York, U.S.A., gore go gatisiwe dimakasine tsa Tora ya Tebelo le Tsogang!

Dingwaga di le lesome pele ga foo, Basupi ba ga Jehofa ba ne ba reka setsha kwa Wallkill gore ba leme dijo tse di neng di tla fepa badiri ba ba nnang kwa ntlokgolo ya bone kwa Brooklyn, New York. Mme jaanong setsha seno se ne se tla dirisediwa go tlhagisa mofuta mongwe wa dijo, dijo tsa semoya.—Mathaio 24:45-47.

Fa Philip Wilcox, yo ka nako eo a neng a okametse lefelo la metšhine ya go gatisa, a bua ka letsatsi la ntlha fa metšhine e simolola go bereka kwa Wallkill, o ne a re: “Re tsere mo e ka nnang kgwedi go rulaganya metšhine e e gatisang ka lobelo lo lo kwa godimo. Fa e siametse go bereka re ne ra simolola go e lekeletsa. Go ise go ye kae re ne re gatisitse dimakasine di le dikete di le mmalwa. Re ne ra di romela kwa bogatisetsong jwa rona kwa Brooklyn, mme tsa romelwa kwa diphuthegong. Re ne re sa batle go latlha dimakasine tseno.”

Basupi ba ga Jehofa ba ne ba aga bogatisetso jono jo bosha go oketsa tiro e kgolo ya go gatisa, e ka nako eo e neng e dirwa kwa Brooklyn. Mo masimologong a bo1970, go ne go tlhokega dikgatiso tse dintsi tsa Baebele go feta tse re neng re kgona go di gatisa ka letsatsi, ka jalo go ne go berekiwa le bosigo kwa bogatisetsong jwa kwa Brooklyn gore batho ba kgone go bona dikgatiso.

Fa kago ya ntlha ya bogatisetso e sena go wediwa kwa Wallkill, e ne ya tsenngwa metšhine e le menè ya go gatisa, lefelo la go paka dibuka le Holo ya Bogosi. Le fa go ntse jalo, pele kago eno e dirisiwa ka botlalo, go ne ga simolola go agiwa kago ya bobedi e kgolwane e e tshwaraganeng le ya ntlha. Dikgatiso tsa Baebele di ne di batlega thata jaana mo e leng gore mo kagong eno ya bobedi go ne ga tsenngwa metšhine e le merataro ya go gatisa, tota le e leng pele kago eno e wediwa.

Fa dingwaga di ntse di ya, go ne ga nna le kgatelopele mo thekenolojing ya go gatisa, mme go ne go tlhokega dikgatiso tse di oketsegileng tsa Baebele. Gore re kgone go dirisa thekenoloji eo, re ne ra tshwanelwa ke go tlhabolola le go oketsa bogatisetso jwa Wallkill ka makgetlo a le mmalwa. Ka bo1980, go ne ga tsenngwa metšhine e e gatisang ka lobelo lo lo kwa godimo mo boemong jwa metšhine ya bogologolo ya ditlhaka.

Ka 2004, bogatisetso jwa kwa Brooklyn bo ne jwa tswalwa, mme dibuka di ne tsa simolola go gatisiwa lekgetlo la ntlha kwa Wallkill. Ka 2010, dimakasine tsone di ne tsa simolola go gatisiwa kwa bokone, kwa lekaleng la Basupi ba ga Jehofa la Canada. Motšhine o mosha wa koo o kgona go gatisa dimakasine di le 200 000 ka ura.

Gompieno, lefelo la bogatisetso la kwa Wallkill ke madirelo a maemo a a kwa godimo a a dirisang didirisiwa tsa bosheng tsa thekenoloji e bile mo lefelong leno go dira baithaopi ba banna le ba basadi ba le 280. Ngogola go ile ga gatisiwa dibuka le Dibaebele di feta dimilione di le 17 mo lefelong leno. Kwantle ga bogatisetso jwa Wallkill le Canada kwa Amerika Bokone, Basupi ba ga Jehofa ba na le mafelo a mangwe a bogatisetso a le 12—mo Afrika, Asia, Australia, Yuropa le Amerika Borwa—a a thusang go fepa dimilionemilione semoyeng.—Mathaio 5:3.