Baebele ya re go ithata ga go phoso fa fela re sa go feteletse. Go ithata go akaretsa go itlhokomela, go itlotla le go itsaya re le botlhokwa. (Mathaio 10:31) Baebele e tekatekano fa e bua ka kgang eno.

Re tshwanetse go rata mang pele?

1.   Re tshwanetse go rata Modimo pele. Baebele ya re taelo e e di gaisang tsotlhe ke e e reng: “O rate Jehofa Modimo wa gago ka pelo yotlhe ya gago.”​—Mareko 12:28-30; Duteronome 6:5.

2.   Taelo ya bobedi e e di gaisang tsotlhe ya re: “O rate moagelani wa gago jaaka o ithata.”​—Mareko 12:31; Lefitiko 19:18.

3.   Le fa go se na temana e e re kgothaletsang gore re ithate, taelo e e reng “o rate moagelani wa gago jaaka o ithata,” e re bontsha gore go ithata le go itlotla go botlhokwa fa re sa go feteletse.

Jesu o ne a rata mang pele?

 Jesu o ile a bontsha barutwa ba gagwe gore ba ka dirang go rata Modimo, moagelani le go ithata mme o ile a ba laela gore ba etse sekao sa gagwe.​—Johane 13:34, 35.

1.   O ne a rata Jehofa Modimo e bile tiro ya Modimo e ne e tla pele mo botshelong jwa gagwe. O ile a re: “Gore lefatshe le itse gore ke rata Rara, fela jaaka Rara a nneile taelo go dira, ke dira jalo.”​—Johane 14:31.

2.   Jesu o ne a rata baagelani ba gagwe mme o ile a bontsha seo ka go ba thusa ka dilo tse ba di tlhokang le go ba swela.​—Mathaio 20:28.

3.   O ne a bontsha gore o a ithata ka gonne o ne a ikhutsa, a ja le go ipha nako le barutwa ba gagwe le batho ba bangwe.​—Mareko 6:31, 32; Luke 5:29; Johane 2:1, 2; 12:2.

A go rata batho ba bangwe pele go ka dira gore o se ka wa tlhola o itumela kgotsa go itlotla?

 Nnyaa ka gonne re bopilwe mo setshwanong sa Modimo yo o lorato. (Genesise 1:27; 1 Johane 4:8) Seno se raya gore re kgona go rata batho ba bangwe. Le fa go ithata go le botlhokwa, re itumela thata fa re rata Modimo pele e bile re thusa batho ba bangwe. Baebele ya re: “Go na le boitumelo jo bogolo mo go abeng go na le jo bo leng gone mo go amogeleng.”​—Ditiro 20:35.

 Gompieno batho ba le bantsi ba re fa o batla go itumela, o tshwanetse go ikakanyetsa pele. Ga ba reetse taelo ya Modimo e e reng o rate moagelani wa gago jaaka o ithata. Mme dipatlisiso tse di dirilweng bosheng di bontsha gore batho ba ba latelang kgakololo ya Baebele e e reng “a mongwe le mongwe a nne a batle, e seng molemo wa gagwe, fa e se wa motho yo mongwe,” ba itumetse e bile ga ba lwale thata.​—1 Bakorintha 10:24.